Nochi tlakatl mikis
9
Ika tlen melauak, nejua oninotekimakak para onikixtlaloj, niman ouel oniknextij ika Dios kinyekana on tlen kichiuaj on tlakamej kuajkualtin niman tlamatkej. Sen tlakatl xkimati tla oksekimej kitlasjojtlaskej noso tla kitlauelitaskej, pampa xkimati tlinon ipan nochiuas. 2 Nochimej sano ijki impan nochiua: on yejuan yolmelajki niman on yejuan xyolmelajki, on yejuan kuajli tlakatl niman on yejuan xkuajli tlakatl, on yejuan yolchipauak niman on yejuan xyolchipauak, on yejuan tlauentlalia niman on yejuan xtlauentlalia, on yejuan xtlajtlakolej niman on tlajtlakolej, on yejuan notlajtolmaka ixpan Dios niman on yejuan xnotlatolmaka.3 In yejua on tlen xkuajli nochiua ipan in tlaltikpaktli: ika nochimej sano ijki impan nochiua. No ijki, ika iyojlo sen tlakatl tentika ika on tlen xkuajli; niman on xkuajli tlamachilistli kiyekana iyojlo; niman sakin, ¡ajsi miktlan! 4 Nochi tlakatl kuajli para kimatis niman tlamachas ika yejkos itlaj tlen kuajli chika nemi; pampa se tlajtojli ijkin kijtoua: "más ueyi kijtosneki sen chichi yoltikaj xken sen león miktok". 5 In melauak pampa yejuan nemij kimatstokej ika mikiskej, pero on yejuan yomikkej xokuitlaj kimatij, nion xokuitlaj kichaj kiseliskej tlanilistli, niman xakaj kinmelnamiki. 6 No ijki ompa tlami intetlajsojtlalis, intlauel niman innexikol; niman xokaman itlaj kichiuaskej de on tlen nochiua ipan in tlaltikpaktli.
Xnemikan ikan pakilistli
7 Yejua ika, aman xpakatlakua; xpakaoni movino, pampa Dios kita kuajli on tlen tikchiua. 8 Nochipa xtlali motlaken istak, niman xmotlalili ipan motsontekon chauak ajuiyalistli. 9 Xmopakti ipan in nemilistli iuan on siuatl yejuan tikneki, ipan in motlaixkajkayaualnemilis yejuan Dios mitsmaka ipan in tlaltikpaktli, pampa on san yejua tiktlani ika sanoyej titekiti ipan in tlaltikpaktli. 10 Niman nochi tlen uelis tikchiuas, xchiua ikan nochi moyojlo; pampa ipan on tlalkontli kampaka tejua tiau, xitlaj nochiua, nion xitlaj nonemilia, xonkaj tlaixmatkilistli nion tlamatkilistli.
On tlen xkuajli nochiua ipan tonemilis
11 No onikitak okseki más ipan in tlaltikpaktli: ika ipan sen tlaksalistli xnochipa tetlani on yejuan más tlaksa, nion ipan sen nouijsokilistli xnochipa tetlani on yejuan más tlauelej; ika on tlamatkej xnochipa kipiyaj tlen kuaskej, nion on tlamachilisyejkej xnochipa nochiuaj ricos, nion on tlaixmatkej xnochipa kuajli kiminseliaj. Yej nochimej ajsi tonajli ijkuak kiseliaj tlen kuajli noso xkuajli tla kimelaua noso ka. 12 No ijki, xakaj tlakatl kimati kamanon itlaj ipan nochiuas: ijkon kenon michimej nokauaj ipan on matlatl, noso on totomej nokauaj kampa kintlatlaliliaj, no ijki sen tlakatl, san ipan yejkotetsi on tlen xkuajli.
Más ueyi kijtosneki sen tlakatl yejuan tlamatki, xken sen rey yejuan tonto
13 No ijki, onikitak ipan in tlaltikpaktli sen tlamatkilistli yejuan para nejua ueyi kijtosneki. 14 Ijkin onikitak, sen sanoyej pitentsin kalpan, kampa xtojlan chantiua. Ouajlaj sen ueyixtikaj rey yejuan okiyejyeualoj on kalpan ikan sanoyej miyek soldados niman okitlalilij iyeualkan sen kojtik tlajtlapechtli para ipan opanok niman okuijsok. 15 Ipan on kalpan chantiya sen mayankatlakatl, yejuan tlamatki. Niman ika itlamatkilis ueliskia kimanauiskia on kalpan, ¡pero xakaj okelnamik on tlakatl! 16 Yejua ika, nejua nikijtoua ika más kuajli tla sen tlakatl tlamatki xken se yejuan kojtik, maski tla itlamatkilis on tlakatl mayanki xakaj kichiuilia cuentaj ijkuak tlajtlajtoua. 17 Más uelis tikakis iyemankatlajtol sen tlamatki, xken ichikajkatlajtol sen rey tonto yejuan nemi intsajlan on yejuan tontos. 18 Más tlapaleuiya on tlamatkilistli xken on armastin yejuan kitekitiltiaj ipan guerra. San ika sen tlajtlakolejketl nopopoloua, ueli kixoxotonia miyek tlen kuajli.