8
Xnemi yakaj yejuan no ijki ken sen tlamatki, nion xnemi yejuan kimati ken nochi tlaojonkaj. Sen tlakatl tlamatki, nochipa nesi ipan ixayak ika paki, niman kichiua para ma tenotski.Xtlakamatikan on yejuan tekiuaj
2 Xchiua on tlen mitsnauatia on rey, pampa ijki yotimotlajtolmakak ixpan Dios. 3 Maka xisijkakisa ixpan on rey. Maka xchiua on tlen xkuajli, pampa yejua uelis mitschiuilis tlen kinekis. 4 On tlen tlanauatia on rey ijki nochiua, niman xakaj uelis kitlajtoltis tline ijkon kichiua. 5 Sen tlakatl yejuan kichiua tlen kinauatiaj, xitlaj ipan nochiuas tlen xkuajli, niman yejuan tlamatki kajsikamati kamanon niman kenijki kichiuas. 6 Ika tlen melauak, kipiya kamanon niman kenijki nochiua on tlen nochiua, pero iueyi problema sen tlakatl 7 on ika xkaman kimati on tlen nochiuas, niman xakaj nemi akin kijlis on tlen nochiuas.
Xakaj uelis kiteltis on mikilistli
8 Xakaj tlakatl uelis kiueyakilis on nemilistli, nion xakaj uelis kiteltis on mikilistli. Xakaj uelis nomanauis de on mikilistli. On xkuajli tlakatl xitlaj ika kipaleuis on tlen xkuajli kichiua.
9 Nochi in onikitak pampa oninotekimakak para nikmatis on tlen nochiua ipan in tlaltikpaktli, niman no onikitak ika sen tlakatl kipiya poder para ika nauiltia niman kichiuilia tlen xkuajli okse tlakatl.
Onkaj tlen nochiua yejuan xitlaj kijtosneki
10 No ijki yonikitak ika on xkuajkualtin tlakamej, yejuan xkaman oyajkej ipan on ueyitiopan, ijkuak mikij niman kintôkaj, sanoyej kinueyiteneuaj, niman ipan on ueyikalpan kampa okichijkej on tlen xkuajli, kelkauaj on tlen xkuajli okichijkej. Yejua in no sen tlaixkajkayaualistli, 11 pampa ijkuak xnimantsin castigarouaj sen tlakatl yejuan kichiua tlen xkuajli, on oksekimej tlakamej kinemiliaj xtlajtlakojli kichiuaskej on tlen xkuajli. 12 Maski sen tlajtlakolej yejuan kichiua miyekpa on tlen xkuajli uejkaui nemi, nikmatstikaj ika on yejuan kitlakaitaj Dios más kuajli impan nochiua. 13 Pero on yejuan xkuajkualtin tlakamej impan nochiua on tlen xkuajli, niman innemilis panos ken itlaj tlaseuajlotl pampa xkitlakaitaj Dios.
14 Ipan in tlaltikpaktli nochiua tlamach yejuan xtikajsikamatij: on kuajkualtin tlakamej tlajyouiyaj ken tla xkuajkualtin yeskiaj, niman on xkuajkualtin tlakamej nemij ikan paktli ken kuajkualtin yeskia. ¡Nejua nikijtoua ika in no san tlaixkajkayaua!
15 Yejua ika nikijtoua: "Ma onya pakilistli." Niman on tlakatl ipan in tlaltikpaktli ma tlakua, ma tlaoni niman ma paki. Ijkin ma kichiua pampa in san yejua uelis kichiuas ika on tlen kitlani ijkuak tekiti chika kipiya inemilis yejuan Dios kimaka ipan in tlaltikpaktli.
16 Ijkon tej, más oninotekimakak para ninomachtis niman nikmatis nochi tlen nochiua ipan in tlaltikpaktli. Oninomachitij ijkuak tlajokaj niman tlayoua ijkuak xok ueliya nikochi nion achijtsin. 17 Ijkin, más kuajli onikitak ika sen tlakatl xueli kajsikamati on tlen Dios kichiua, nion on tlen nochiua ipan in tlaltikpaktli. Maski sanoyej oniktejtemoj on tlen niknekiya nikmatis, xoniknextij. Niman maski sen tlamatki kijtoskia ika kixmati, xmelauak kinextia.