IKA OME TLAXELOJLI: ON NEMILISTLI UEYI KIJTOSNEKI IJKUAK SE KUAJLI NOUIKA IUAN DIOS (7.1-12.14)
Tlajtojli para nemilistli ipan in tlaltikpaktli kampa onkaj xompayejyeualistli (7.1- 12.14)
On tlamatkilistli más ueyi kijtosneki xken on tontojyotl
7
Más kuajli mitsixmatiskej ika tikuajli, xken on patioj ajuiyalistli. Más kuajli on tonajli ijkuak se miki xken ijkuak se tlakati.2 Más kuajli se yas kampa mikapan, xken yas kampa iluipan; pampa nochi tlakatl ye kipiya kamanon mikis, niman on yejuan aman nemij, kuajli para xkelkauaskej ika innemilis ueyi kijtosneki.
3 Más kuajli sen ajmantli xken sen paktli; maski xkuajli nesi ixayak yejuan najmana, on ajmantli kuajli kichiuilia iyojlo.
4 Sen tlakatl tlamatki nonemilia kenijki mikis, pero on yejuan xtlamatki, san kinemilia nopaktis.
5 Más kuajli tikakis inchikajkanotsalis yejuan tlamatkej xken tikakis inueyiteneualis yejuan xtlamatkej.
6 Iuetskalis sen tlakatl tonto kakisti ken ijkuak totopoka ipan tlitl on uitskuamatli ijkuak tlatla amanaman. Niman in no san tlaixkajkayaua pampa iuetskalis xitlaj kitosneki.
7 Hasta sen tlamatki tlamachilispoliui, tla kiichtakamakaj tomin, niman kijtlakouilia iyojlo.
8 Más kuajli on tlen tlami nochiua, xken on yejua peua nochiua.
Más kuajli tikpiyas moijyouilis xken timoueyimatis.
9 Maka xkauili ma mitsyekana on tlauejli, pampa on tlauejli kinyekana on yejuan xtlamatkej.
10 Maka xmotlajtolti tline on tlen achtopa onochiu más kuajli katka, xken aman, pampa in xejua notlajtoltia yejuan tlamatki.
11 On tlamatkilistli ken itlaj kuajli herencia, niman tepaleuij ipan in tlaltikpaktli. 12 In melauak pampa on tlamatkilistli tepaleuiya no ijki ken kichiua on tomin. Pero on tlamatkilistli más tepaleuij pampa kimanauiya inemilis on yejuan tlamatki.
13 Kuajli xkixtlalo on tlen Dios okichijchiu. ¿Akinon uelis kimelauas on yejuan yejua okinoloj? 14 Ijkuak nochi kuajli mopan nochiua, sanoyej xpaki ika on tlen kuajli, pero ijkuak mopan nochiua tlen xkuajli, xseli niman xnemili ika on tlen kuajli niman tlen xkuajli Dios kauilia ma nochiua, niman ika on tlakatl xkimati tlinon más sankin ipan nochiuas.
15 Nochi in yonikitak ipan in notlaixkajkayaualnemilis: nemij tlakamej yejuan kuajkualtin niman xuejkauij nemij, niman on xkuajkualtin tlakamej yej uejkaui nemij. 16 Yejua ika, maka xmochiua ken sanoyej tikuajli nion maka xmouika ken sanoyej titlamatki. ¿Tline tikmochiuilis on tlen xkuajli? 17 Maka xchiua tlen sanoyej xkuajli, nion maka xmochiua sanoyej titonto. ¿Tline timikis ijkuak xe ajsi tonajli? 18 Maka xmopapanolti ipan nochi on tlen tikchiua. Yejuan kitlakaita Dios nochi tlen kichiua kuajli kisa.
19 Sen tlakatl tlamatki kiselia más poder de on tlamatkilistli, xken majtlataktli tlayekankej ipan se ueyikalpan.
20 Ika tlen melauak: xakaj nemi ipan in tlaltikpaktli yejuan kichiua nochi tlen kuajli niman xkaman tlajtlakoua.
21 Maka xkaki nochi tlen oksekimej kijtouaj, pampa uelis tikakis ijkuak motekitkau mitsijtouilis tlen xkuajli, 22 pampa tejua no kuajli tikmatstikaj, ika miyekpa tikinmijtouilia oksekimej on tlen xkuajli.
Kitejtemouaj tlamatkilistli
23 Nochi yonikixtlaloj ikan tlamatkilistli, pampa onikijtoj ika nejua nitlamatki yes, pero xonikajxilij ken niknekiya. 24 Xniueli nikajsikamati on tlajtlamach pampa sanoyej ueyi kijtosneki. ¿Akinon uelis kajsikamatis? ¡Xakaj uelis! 25 Oninotekimakak para ninomachtis, nitlaixmatki yes, niman niktejtemos tlinon kijtosneki tlajtlamach. Niman onikitak ika xkuajli xtitlamatki yes, niman xtipiyas kuajli motlamachilis tla itlaj xnimantsin tikajsokamati.
26 Oniknextij on tlen más chichik xken on mikilistli: in sen siuatl yejuan mitstlatlalilis ikan inejnekilis niman mitsnapalos ikan imauan ken itlaj teposcadena yeskia. Akin kichiua on tlen Dios tlanauatia, nomanauis de yejua, pero on yejuan tlajtlakolej uetsis ipan imatlauan.
27 Ijkuak nejua akin niTemachtijketl niknekiya nikajsikamatis miyek tlajtlamach, yejua in onikajsikamat: 28 ¡hasta aman xniknextia on tlen melauak nikneki nikmatis! Yej oniknextij san se kuajli tlakatl intsajlan se mil tlakamej, pero nion sen kuajli siuatl xoniknextij intsajlan nochimej on siuamej. 29 No ijki, ijkin oniknextij: Dios nochi tlakatl, okichijchiu chipauak, pero on tlakamej okijtlakojkej innemilis.