Nemilistli yejuan xitlaj kijtosneki
6
Ipan in tlaltikpaktli onkaj okse tlen sanoyej xkuajli yejuan onikitak intech in tlakamej: 2 Sekimej tlakamej Dios kinmaka miyek riquezas niman ueyilistlij, niman xkaman itlaj kimpoloua on tlen keleuiyaj. Pero xkinkauilia para nochi ma kipakakuikan, yej oksekimej kiseliaj on tlen kuajli. Yejua in no ijki san tlaixkajkayaua niman sanoyej teajman. 3 Sen tlakatl uelis kipiyas cien ikoneuan niman nemis miyek xipan, pero maski sanoyej miyek xipan nemis, tla on tlen kipiya xkimaka paktli, niman ijkuak miki nion siquiera xkitlaltôkaj ipan itlalkon ken kitocaroua, nejua nikijtoua ika más kuajli ipan nochiua sen konetsintli yejuan san uetsi niman miki ijkuak tlakati, xken on tlakatl. 4 Tej, maski in konetsintli san popoliuis ipan tlayouajlotl, kampa itoka xkaman kimatiskej, 5 niman maski xokitak tlanexyotl niman xitlaj* okimat, yejua más kipiyas neseuijli xken on tlakatl, 6 yejuan ueliskia nemis kanaj ome mil xipan, pero xitlaj paktli okipix ika on tlen kipiyaya. Niman kemaj nochimej sano ijki mikij.7 Nochi tlakatl sanoyej tekiti para kipiya tlen kikua, pero xkaman nokaua iyolika. 8 ¿Tlinon kipiya on tlamatki yejuan xkipiya on xtlamatki? ¿Tlinon kiselis on mayanki tla kuajli kimati ken nouikas imixpan oksekimej?
9 Xpiya pakilistli ika on tlen tikpiya, niman maka yej xkoneleuijtia on tlen xtikpiya. Tla se koneleuijtikaj on tlen xkipiya no ijki ken tla yakaj kinekiskia kajsis ikan ima on ajakatl.
10 Dios okichijchiu nochi tlen onkaj ipan in tlaltikpaktli ken yejua okinek. Niman Dios otechchijchiu tejuamej titlaltikpaktlamej ken yejua okinek. Yejua ika, xakaj uelis kixnamikis on Dios yejuan más Ueyixtikaj.
11 In yejua tlen melauak: kampa noijtoua miyek tlajtojli, no noijtoua on tlen xitlaj kijtosneki. Niman on xakaj kipaleuiya.
12 In yejua tlen melauak: xakaj kimati tlinon más kuajli para on tlakatl ipan in iachijtsinnemilis yejuan ken san tlaixkajkayaua. Para yejua, on tonaltin panos ken itlaj tlajseuajlotl; xakaj uelis kijlis on tlen nochiuas ipan in tlaltikpaktli sakin ijkuak yejua yomik.