Melauak xmaka Dios on tlen tikijkoua tikmakas
5
Ijkuak tias ipan iueyitiopan Dios, xpiya cuidado ken tias: maka yej titlauentlalis kenon tlakamej yejuan xtlamatkej niman xkimatij ika kichiuaj on tlen xkuajli. Yej, xuiya tlayakapan para nochi tikakis niman xchiua on tlen Dios tlanauatia. 2 Maka tikijtos, nion maka san amanaman tiknemilis tiknemilis ipan moyojlo itlaj tikmakas Dios, pampa Dios nemi ne iluikak niman tejua tinemi ipan in tlaltikpaktli. Yejua ika, maka miyek tlajtojli xtekitilti ixpan Dios, 3 Ijkon ken se kipiya xkuajli temiktli tla sanoyej tlanemilia, no ijki sen tonto kijtoua tontoyotl tla sanoyej tlajtlajtoua.4 Ijkuak tikprometerouilia Dios ika itlaj tikchiuas ipampa noso itlaj tikmakas, maka timouejkauas tichiuas, pampa yejua xpaki inuan on tontos tlakamej yejuan xkichiuaj tlen kijtouaj. 5 Más kuajli tla xitlaj tikprometeros xken tla tikprometeroua niman yej xtikchiua. 6 Maka xkauili mokamak ma mitschiualti titlajtlakos, niman kemaj tikijlis itiopixkau Dios yej otikchiu pampa otimopopoloj ijkuak otikprometerouilij Dios. ¿Tline tikchiualtis Dios ma kualani ika on tlen otikprometerouilij niman kixoxotonis on tlen yotikchijchiu?
7 Melauak tej, itlajtolmakalis sen tonto ken itlaj temiktli yejuan xitlaj kijtosneki, niman san tlajtoltin miyek yejuan xitlaj kijtosneki. Pero tejua xteititi ika tiktlakaita Dios.
On tlen kuajli niman xkuajli nochiua ipan in nemilistli
8 Maka mitstlatlachaltis tla tikita ipan sen país on ueyitekiuaj kintlajyouiltia on mayankej, noso xkichiua tlen melajki impampa yejuamej niman xkimpaleuiya ken kitocaroua. In ueyitekiuaj ijkon kichiua pampa okse yejuan más ueyixtikaj kipaleuiya, niman in omemej uejueyitekiuajkej kinmanauiya okse ueyitekiuaj yejuan más ueyixtikaj xken yejuamej. 9 Niman ijkuak ijkon nochiua, maski xnejli, kijtouaj ika in país ye tlejkotiu niman on rey kuajli tlen kichiua para nochi on tetlalpan. + \fr 5.9 \ft In texto ipan tlajtojli hebreo xmás kimelajkaijtoua. No ueli kijtoua: Noso on tlen kitlakitia on tlajli, nochimej kiseliaj, niman on rey kipiya sen tlajli kampa kitlatôkiliaj.
10 Yejuan sanoyej kineki kipiyas tomin, nochipa kineki más; yejuan sanoyej kineki riquezas, xkaman yolpachiui, yej kineki más. In no yejua sen tlaixkajkayaualistli, 11 pampa tla más nopiya itlaj, no más miyekiyaj on yejuan tlakuaj. ¿Niman tlinon kitlanis on akin kipiya nochi? San kitlani on tlen kixpakaita. 12 Sen tlakatl tekitki, maski kikua miyek itlaj noso kikua achijtsin, nochipa iyolika kochi; pero sen rico, xkaman iyolika kochi, yej sa komatstikaj on tlen miyek kipiya.
13 Yonikitak on tlen sanoyej xkuajli nochiua ipan in tlaltikpaktli niman sanoyej teajman. In yejua: On riquezas yejuan sanoyej kixtlajsojtlaj, kichiuilia xkuajli on axkauaj, 14 pampa tla on riquezas xkuajli kitekitij, uelis nochi tlamis popoliuis, niman tla nemi sen tekoneu, xok kipiyas tlinon kauilijteuas ken iherencia. 15 Niman ijkon ken xitlaj okuajkik ijkuak oualaj ipan in tlaltikpaktli, oksejpa ijki yas. Xitlaj kiktis on tlen okitlan. 16 Yejua in no sanoyej teajman: ijkon ken oualaj ipan in tlaltikpaktli, oksejpa ijki yas. Niman xitlaj kiselis maski sanoyej otekit. 17 Ijkon panos nochi inemilis ipan tlayouajlotl ikan miyek pajsolouilistli, kokolistli, niman ikan tlauejli.
18 Pero ijkin nikixtlaloua: chika Dios kimaka sen tlakatl iachijtsinnemilis ipan in tlaltikpaktli, más kuajli para ma kikua niman ma koni ikan pakilistli de on tlen okitlan ikan itekiu ipan in tlaltikpaktli . 19 Pero on akin Dios kimaka miyek riquezas, niman kauilia para ma kipakakua, niman ma kiseli on tlen yejua kitocaroua, niman paki ika itekiu, kitocaroua kitlajsojkamachilis Dios, pampa yejua kimaka nochi in tlajtlamach. 20 Niman pampa Dios kitemiltia ipan iyojlo ikan miyek paktli, xsanoyej kontematstikaj on tlen ipan inemilis nochiuas.