4
Kemaj onikixtlaloj on miyek tlajtlamach tlen oksekimej sanoyej xkuajli kitechiuiliaj ipan in tlaltikpaktli. Kemaj onikixtlaloj on tlen nochiua, on tlen sanoyej xkuajli kitechiuiliaj miyek xmelajkanemilistli ipan in tlaltikpaktli. Niman onikitak kenijki chokaj on yejuan kintlajyouiltiaj, pero xakaj nemiya akinon kinyoltlalis, yej, más kintlajyouiltiayaj ikan tlauejli niman xakaj nemiya akinon kinyolchikauas. 2 Yejua ika, onikitak más pakij on yejuan yomikkej xken on yejuan yoltokej; 3 but más kuajli para on yejuan xe uajnemij xken on yejuan yonikinteneu, pampa xe kitaj on tlen xkuajli nochiua ipan in tlaltikpaktli.4 No ijki onikitak ika on tlakamej sanoyej tekitij para nochi kipiyaskej, pero in san pampa oksekimej no kinekiskej kipiyaskej on tlajtlamach. Pero nochi in san tlaixkajkayaua no ijki ken tla se kinekiskia kasis ikan ima on ajakatl.
5 Sekimej ijkin kijtouaj: "Sen tlakatl tontoj xkineki tekitis; yejua ika kipiya mayantli." 6 On kas melauak, pero nejua nikikijtoua: "Más kuajli titekitis ken tikitokaroua, niman tikpiyas achitsin neseuijli, xken sanoyej tichikajkatekitis niman tikpiyas miyek, pero xtikpiyas neseuijli. Yejua in no sen tlaixkajkayaualistli ken tla se kinekiskia kajsis ikan ima on ajakatl."
7 Kemaj onikixtlaloj okse tlaixkajkayaualistli ipan in tlaltikpaktli: 8 onikitak, sen tlakatl iselti; xkipiya itetlajsojkaxiu, nion ikoneuan nion ikniuan. Yejua xkaman noseuijtikaj niman xkaman siaui, nion xkaman kajkaua ika kixpakaita on tlen miyek kipiya. Niman nion xnotlajtoltia: "¿Akinon itech nokauas in tlajtlamach tlen nikpiya? ¿Tline niknonenekilia on tlajtlamach yejuan uelis nechpaktis? No ijki tej, in nochi san tlaixkajkayaualistli niman sen tesiauitij tekitl.
On tlen nosepanmati más isijkapan nochiua
9 Más kuajli omemej xken se san iselti, pampa más ueyi kiseliskej intlaxtlauil de on intekiu yejuan kichiuaj. 10 Niman tla se de yejuamej uetsi, on okse kuiteuas; pero on yejuan san iselti, xnemis akinon kuiteuas. 11 No ijki, tla san sekan kochij omemej, se kixotlaltis on okse; pero tla se san iselti, ¿kenijki noxotlaltis? 12 Se san iselti uelis kitlaniskej, pero omemej uelis tetlaniskej. Niman no ijki, sen mekatl de yeyi tlamalintli xnimantsin kotoni.
On tlamatkilistli ueli kipiya san akinon, konetl noso ueuentsin
13 No ijki, sen telpochtli mayanki yejuan tlamatki más ueyi kitosneki xken sen rey ye ueuentsin, yejuan tonto niman xkineki ma kitlakanonotsakan. 14-15 Maski tla yejua on telpochtli sanoyej mayanki niman okitsakukaj ipan carcej, niman kemaj kalaki ken rey para kipatla on ueuentsin rey, onikitak ika on tlaltikpaktlakamej okitokakej niman okipaleuijkej. 16 Niman sanoyej tojlamej yejuan kinmandarouaya, pero on tekoneuan yejuan uajnentiaskej, niman iuejkakoneuan xkiseliskej ikan paktli. Yejua in no sen tlaixkajkayaualistli ken tla se kinekiskia kajsis ikan ima on ajakatl.