On Ichpochtli
2
Nejua niken on xochitl rosa yejuan onkaj ne Sarón, niman niken on askalxochitl yejuan onkaj ipan on ixtlauatl.On telpochtli
2 De nochimej on siuamej, tejua notlajsojkatsin ken tiitlaj on askalxochitl yejuan onkaj itsajlan miyek uitstli.
On ichpochtli
3 De nochimej on tlakamej, tejua notlajsojkatsin ken tiitlaj on manzanajkojtli yejuan onkaj itsajlan on kojyoj. ¡Sanoyej nikuelita ninoseuiya ipan itlaseuajlo, niman nikuelita nikua on tsopelik itlakyo! 4 Yejua onechuikak ipan on iluilkajli, para nochimej ueliskej kitaskej ika sanoyej nechneki. 5 ¡Xnechmakakan chikaualistli, ikan on memelatsitsimej de uvajtetsojli; xnechtlakualtikan ikan manzanas, pampa sanoyej nechkualotla in nekilistli yejuan nikpiya! 6 ¡Ma kitlali iopochma tlatsintlan de notsontekon, niman ika iyekma, ma nechnapalo!
On telpochtli
7 Siuamej de Jerusalén, xnechprometerouilikan, ika intoka on yolkej gacelas niman ika intoka on masakokonej yejuan nemij ipan campo, para maka xtechpajsolokan chika tinemij ipan nejnekilistli.
Ika ome kuikatl
On ichpochtli
8 ¡Ye uajlau on notlajsojkatsin! ¡Yoniktenkak ika yejua! Uajtsikuintiu ipan on tepemej, uajtsikuintiu ipan on tepetsitsimej. 9 On notlajsojkatsin ken sen masatl, ken sen masakonetl. ¡Ye nikan nemi, ikuitlapan in tsakuijlotl; uajtlajtlacha ipan on ventana, Nechajichtakaijita itsajlan on tsatsastik tsakuijlotl.
10 On notlajsojkatsin onechijlij: "Xmokuiteua notlajsojkatsin, xuajla nouan, tejua kualtetsin siuatl. 11 Xkita, on seuayan yopanok, niman on kiautli no yokpanok. 12 On xochimej yoxichiponkej ipan tepemej, niman yoyejkok on tiempo para titokuikatiskej. Ye kakisti ipan totlal ken nokuikatiaj on kokotetsitsimej. 13 On higuerajkojtli ye tlaktikaj, niman on uvasyoj yonochayau iajuiyalis. Xmokuiteua notlajsojkatsin, xuajla nouan, tejua siuatl kualtetsin.
14 "Tejua nopaloma, yejuan timiyana intsajlan on uejueyimej temej, yejuan timiyana ijtik on ueuejkapanmej teostomej, xnechkauili ma nikita moxayakatsin; xnechkauili ma nimitskaki ijkuak titlajtoua. ¡Sanoyej nipaki ijkuak nimitsita! ¡Sanoyej nimitsuelkaki ijkuak titlajtoua!"
On telpochtli
15 Isijkapan xkinmajsikan on ototsitsimej, on ostositsimej yejuan kokonej, chika xe kixpolouaj touvasyo, on touvasyoj yejuan kemach xochiyouatikaj.
On Ichpochtli
16 On notlajsojkatsin, yejua noyaxka, niman nejua niiyaxka. Yejua kintlakuajkualtia iborregos ijtik on xochitlan de rosas. 17 Chika yejko on tlanexyotl, niman nejkuania on tlayouajlotl, tejua notlajsojkatsin, xmokuepa notech. Xuajmotlalo ken sen masatl, ken sen masakonetl yejuan notlaloua ipan on tepetsitsimej de on tlajli Beter.