On Ichpochtli
3
Ipan notlapech ijkuak tlayoua, oniktejtemoj on akin nikneki ikan nochi noyojlo. Oniktejtemoj, pero xoniknextij. 2 Kemaj oninokuiteu niman oniaj imanian on ueyikalpan, ipan on calles niman ipan on plazas, para oniktejtemoto on akin nikneki ikan nochi noyojlo. Oniktejtemoj, pero xoniknextij. 3 Onikintlajtoltij on tlakamej yejuan tlajpiyaj ipan on ueyikalpan: "¿Xkanaj nenkitaj on akin nikneki ikan nochi noyojlo?" 4 Ijkuak kemach nikintlalkauiyaya on yejuan oninkintlajtoltij, kemaj nimantsin oniknextij on akin nikneki ikan nochi noyojlo. Nimantsin onikajsik ipan ima, niman xok onikmakau hasta ijki onikajxiltij ipan ichan nonanaj.On telpochtli
5 Siuamej de Jerusalén, xnechprometerouilikan ika intoka on gacelas niman ika intoka on masakokonej yejuan nemij ipan on kojyoj, para maka xtechpajsolokan chika tinemij ipan nejnekilistli!
Ika yeyi kuikatl
Ichpokamej de Jerusalén
6 ¿Akinonon nepa uajlau ipan on xalpatlajkan, niman inajnakastlan uajnejnemi ome pilar mimiltikej de poktli, ipokyo on iajuiyalis mirra, poktli ken kopalpopochtli niman poktli ken nochi okseki ajuiyalistin? 7 ¡Ah, tlakaj on rey Salomón, uajlau ipan icarreta de nouijsokilistli! Kuajcuidarojtiuij 60 soldados de israel yejuan más uelij tlauijsokij. 8 Nochimej yejuamej sanoyej uelij tlauijsokij ikan espada. Cada se ixijlan kikti iespada para ika kimanauiya on rey ijkuak tlayoua.
9 On rey Salomón yokinochijchiuilij sen carreta de nouijsokilistli kualtetsin, ikan tablas yejuan más kuajli yejuan ualeua Líbano. 10 On kojtin yejuan mantiuij, okalauilij plata; on kampa se ueli notlatsa, okalauilij oro; on kampa notlalia, okisouilij tela morada, niman ijtik on carreta, on siuamej de Jerusalén yejuamej okitlajmachyotijkej ika on miyek nekilistli de iminyojlo.
On Ichpochtli
11 ¡Siuamej yejuan nenchantij ne Jerusalén, xualakan para xkitakan on rey Salomon! Ipan itsontekon kuakij on corona yejuan okitlaliltij inanaj ijkuak ononamiktij, ipan on tonajli ijkuak más okipix paktli ipan inemilis.