On telpochtli
4
¡Sanoyej tikualtetsin, tejua notlajsojkatsin! ¡Melauak sanoyej tikualtetsin! Mixtololojuan, nesij ken omemej palomas yejuan iyantokej tlatsintlan de movelo. On motson, ken itlaj on chivitos yejuan uajnajauiltijtiuij ipan itepeuan on tlajli Galaad. 2 Motlanuan sanoyej istakej, kenon borregos yejuan kemach yokinxinkej niman yokinmaltijkej. Nochimej yejuamej kipiyaj innamik, xitlaj motlan poliui. 3 On okan moten chichiltikej kenon liston, niman motlajtol sanoyej kualtetsin kakisti. On ome moxayak, nesi ken ome tlatlajkotipan granada yejuan iyantokej tlatsintlan de movelo. 4 Mokechkojyo nesi kenon kualtetsin torre yejuan okichijchiuilijkej David ikan temej yejuan tlajxintin. Ipan mokoskau pipilkatiuij tetsitsimej yejuan kualtsitsimej yejuan ika kitlajmachyotia mokechkojyo. On tetsitsimej nesij ken se mil escudos yejuan pipilkakej ipan on torre, ken on iminescudos on yejuan sanoyej ueliyaj tlauijsokij. 5 Mochichiualtsitsiuan ken on omemej yolkej gacelas yejuan kouatsitsimej, yejuan tlakuajkuaj imanian on rosajxochiyoj.6 Chika yejko on tlanesyotl niman nejkuania on tlayouajlotl, nias ipan on tepetl kampa onkaj mirra, niman ipan on tepetsintli kampa onkaj kopajli. 7 ¡Sanoyej tikualtetsin, tejua notlajsojkatsin, tikualtetsin desde ipan mokxiuan hasta ipan motsontekon! ¡Xitlaj tikpiya tlen xkuajli ipan nochi motlalnakayo!
8 Tiauij noyenkuikasiuatsin; ma titemokan de in tlajli Líbano. Xkonixtlalo on ixtlauatl desde ikuapan on tepetl Amaná, desde ikuapan on tepetl Senir niman on tepetl Hermón, desde on teostomej kampa chantij on leones, niman desde on tepemej kampa nemij on yolkej leopardos. 9 Otinechyoltilan noknijtisin, noyenkuikasiuatsin. Otinechyoltilan san ika otinechalitak, niman san ika sen tetsintli ipan mokoskau. 10 ¡Sanoyej nikuelita ken tinechnejneki, tejua noknitsin, noyenkuikasiuatsin! ¡Más nikuelita ken tinechnejneki, xken tla nikonis on tsopelik vino, niman más nikajuiyakaijnekui on tejua moajuiyalis, xken on oksekimej ajuiyalistin yejuan onkaj! 11 Noyenkukasiuatsin, ipan mokamaktsin meya nekutli. ¡Nekutli niman leche onkaj tlatsintlan de monenepil! Kenon ajuiyalistli onkaj ne Líbano no ijki ajuiyak on mokualtsintlaken.
12 Tejua noknitsin, noyenkuikasiuatsin ken tixochitlan kampa xakaj okse tlakatl ueli kalaki, ken tiamejli kampa xakaj okse tlakatl ueli atli, tejua sen tiamejli yejuan san para nejua. 13 Ken tixochitlan kampa onkaj on kojtin yejuan kitlakitiaj on uelik granadas, xochitlan kampa onkaj on xochitl itoka alheña, 14 nardo niman azafrán, kampa onkaj on ajuiyalistli cálamo niman canela, niman nochi on kojtin yejuan kipiya kopajli ajuiyak, on ajuiyalistli mirra niman de áloe, ¡niman nochi on sesekneka yejuan más kuajli ajuiyalistli! 15 Tejua ken tiamejli ipan se xochitlan kampa meya atl yejuan nechmaka nemilistli, atl yejuan kualtsin ken on atl yejuan ualeua desde on tepetl Líbano.
On ichpochtli
16 Ajakatl yejuan tiualeua tlakpakopa, ¡xtlacha! Ajakatl yejuan tiualeua tlatsintlankopa, ¡xuala nikan! ¡Xchiuakan ma ajaka ipan noxochitlan niman ma nochayaua on nemoajuiyalis! Xuajla notlajsojkatsin, ipan in moxochitlan, niman xmokualti on tlen sanoyej uelik.