On telpochtli
5
Ye kuajli yonikalak ipan noxochitlan, notentsin, noyenkuikasiuatsin. Yonikuik on mirra niman okseki ajuiyalis; yonikuaj on nekutli niman yonikonik vino niman leche. Nochi in nejua noyaxka.On ichpochtli
Notlajsokaikniuan, xtlakuakan niman xtlaonikan, ¡xkonikan nochi tlinon nenkinekiskej!
Ika naui kuikatl
On ichpochtli
2 Nejua nikochiya, pero noyoltsin tlachixtoya. Niman onitemik ika on notlajsojkatzin nechajnotsa desde on tsakuijlotl.
On telpochtli
"¡Xnechtlatlapouili notlajsojkatsin, notentsin, nokokotetsin! ¡Notsontekon yopatsiu ikan ajuichtli! On ajuichtli yejuan xini tlayoua sa tejtemotikaj ipan notson!"
On ichpochtli
3 "Nejua yoninotlakenkixtijka, ¡nonekis oksejpa ninotlakentis! Yoninokxipajpakka, ¡oksejpa tlalteuyouaskej nokxiuan!
4 On notlajsojkatsin okuajkalaktij ima para okitlapoj on tsakuijlotl, ¡niman nejua machisti sanoyej onipak! 5 Kemaj oninokuiteu para oniktlatlapouilito on notlajsojkau. De ipan nomauan niman nomajpiluan okis on iajuiyalis mirra niman ochijchipin ipan ipasador on tsakuijlotl. ¡Ijkuak onikak otlajtoj nikmatiya ken nimikis! 6 Oniktlapoj on tsakuijlotl para on notlajsojkatsin, pero yejua xok ompa nemiya. Oniktejtemoj pero xoniknextij. Oniknots pero xonechnankilij. 7 Onikinnamik on tlakamej yejuan tlajpiyaj ipan on ueyikalpan, pero onechmajmailijkej niman onechkojkokojkej. ¡On yejuan tlajpiyaj ikalakiyan on ueyikalpan, ikan tlauejli onechkixtilijkej notlaken niman onechkajkej tzotzoltik!
8 Siuamej de Jerusalén, tla nenkinextiaj on notlajsojkatsin, xnechprometerouilikan ika nenkijliskej ika sanoyej nechkualotla in nekilistli yejuan nikpiya.
On ichpokamej de Jerusalén
9 ¿Tlinon sanoyej kualtetsin nesi ipan on motlajsojkatsin, tejua siuatl, akin más tikualtetsin de nochimej on siuamej? ¿Tlinon sanoyej kualtetsin nesi ipan on motlajsojkatsin, yejua ika tikneki ijkon ma timitsprometerouilikan?
On ichpochtli
10 On notlajsojkatsin sanoyej chikajtikaj niman kualtsin itlalnakayo. Sanoyej ixmachyoj intech miles tlakamej. 11 Itsontekon tentikaj ikan itlamachilis ken itlaj on oro yejuan más chipauak. Itson kojkolochtik niman tliltika ken itlaj kakalotl. 12 Ixtololojuan nesij ken ome palomas yejuan yonaltijkej ikan leche, yejuan yeuatokej itempan atl yejuan yajtok. 13 On okan ixayak ken ome xochitlan kampa tentikaj ikan miyek xochitl ajuiyak. Itlapajlo on okan itentsin ken itlaj on xochitl rosa yejuan ipan nalaua iyayo on ajuiyalistli mirra. 14 Ipan iimapiluan onkaj anillos de oro, niman ipan on anillos tlajmachyokej ikan on tetl topacio. Itlalnakayo nesi kenon marfil yejuan sanoyej petstik, niman tlajmachyoj ikan on tetl zafiro. 15 Ikxiuan nesij ken ome pilares de on tetl mármol, yejuan kipiya itsintlatok de oro yejuan más chipauak. Yejua sanoyej ixmachyoj, kenon cedrojkojtin de Líbano. 16 Itlajtol sanoyej tsopelik. ¡Nochimej sanoyej kipakaitaj! Ijkon nesi notlajsojkatsin, siuamej de Jerusalén. Ijkon nesi on yejuan sanoyej nikneki.