Dios kichiuas para xok onyas nouijsokilistli ipan in tlaltikpaktli
(Miq 4.1-3)
2
In yejua tiotlajtojli yejuan Isaías, ikoneu Amós, okiselij ipan sen tlatlachalistli ken itemikpan de on tlinon impan nochiuas on chanejkej Judá niman Jerusalén:2 Ipan on sa ika nochi tonaltin ijkin nochiuas: on tepetl kampa onkaj iueyitiopan toTEKO, yejua más ueyixtias de nochimej oksekimej tepemej, niman nochimej on tlaltikpaktlakamej uajlaskej ompa. 3 Sanoyej miyek tlakatl de miyekan naciones ompa yejkoskej, niman kinojliskej: "Tiauij, ma titlejkokan ipan itepeu toTEKO, nepa kampa onkaj iueyitiopan iDios Jacob, para yejua ma techmachti on itlanauatiluan niman tejuamej tikintlakamatiskej."Ijkon kinojliskej on tlakamej de miyekan naciones pampa ipan on tepetl Sión ualeuas itlamachtiluan toTEKO; ne Jerusalén ualeuas itlajtol.
4 On naciones yejuan notlauelitaj, toTEKO yejua kijtos katlejua kipiya tlajtlakojli, niman yejua kimpaleuis ma noyoltlalikan on miyekej uejueyikalpanmej. Niman on inespadas kinkuepaskej tepostlaxoponaltin, niman inlanzas kinkuepaskej sakatektli yejuan ika pixkaskej. On chanejkej ipan on naciones xokaman nouijsokiskej, nion xok kintlayejyekoltiskej para ueliskej tlauisokiskej. Los habitantes de las naciones ya nunca pelearán, ni les enseñarán a pelear. 5 ¡Xuajlakan, nemejuamej iuejkakoneuan Jacob, ma titoyekanakan ipan itlamachtiluan toTEKO, pampa on yejua tlauijli ipan tonemilis!
Dios kincastigaros on yejuan nouejueyimatij
6 Isaías okijtoj: "NoTEKO, tejua yotikintlalkauij motlapejpeniluan, yejuan iuejkakoneuan Jacob. Otikintlalkauij pampa onotlajtolmakakej iminuan on xchanejkej yejuan oualejkej kampaka ikisayan tonaltsintli, tlakamej yejuan tetlatejtemouiliaj niman kichiuaj magia kenon filisteos. 7 Ipan in país miyek onkaj oro niman plata; tentikaj ikan sanoyej miyek tlen patioj. In país tentikaj ika miyek caballos, niman sanoyej miyek carretas de guerra. 8 ¡Pero no ijki tentikaj ikan ídolos! On tlakamej kinmauistiliaj on dioses yejuan san okinmachijchijkej. 9 Yejua ika, nochi tlakatl noknelis niman nopinajtis. ¡Maka xkintlapojpolui noTEKO!
10 'Aman nemejuamej israelitas nenmiyanaskej intsajlan on uejueyitemej niman ijtik on teostokaltin, para nenmomanauiskej de on itemojtijtlauel toTEKO, niman nenmiyanaskej de on iueyilis niman iueyipoder. 11 On yejuan nouejueyimatij nokneliskej; on yejuan noueyiteneuaj kimpinajtiskej. Ipan on tonajli san toTEKO kiueyiteneuaskej. 12 Ipan on tonajli, toTEKO akin nochi ueli kichiua, kinyolyemanilis niman kinmiknopiyas nochimej on yejuan nouejueyimatij niman nouejueyiteneuaj. 13 Niman nochimej on yejuan kinekij ma kimpakaitakan kenon uejueyimej cedrojkojtin yejuan onokej ne Líbano niman kenon auakojtin yejuan onokej ne Basán, Dios kichiuas ma noknelikan. 14 Kichiuas ma noknelikan on yejuan nomatij uejueyixtokej kenon uejueyimej tepemej niman kenon uejuejkapanmej tepetsitsimej. 15 No, kichiuas ma noknelikan on yejuan nomatij uejueyixtokej kenon uejueyimej torres noso kenon kojtikej tepanchinantin; 16 yejuan nomatij kenon uejueyimej niman kualtsitsimej barcos de tarsis. 17 On yejuan nouejueyimatij niman on yejuan nouejueyiteneuaj, Dios kichiuas sanoyej ma noknelikan. Ipan on tonajli san toTEKO kiteititis iueyilis, 18 niman on ídolos xok onyaskej.
19 'Ijkuak toTEKO kichiuas ipan in tlajli on tlen sanoyej temojtij, on tlakamej niyanaskej intsajlan on uejueyitemej niman ijtik on teostokaltin niman kampa tlaltsayankan. Yejuamej niyanaskej pampa kipiyaskej sanoyej ueyi nemojtijli pampa toTEKO uajlas ikan iueyilis, ikan itemojtijtlauel niman ikan iueyipoder. 20 Ipan on tonajli, on tlakamej kominxiniskej iminídolos kampa nemij uisakomej niman tsinakanmej, on ídolos tlachijchijtin ika oro niman plata yejuan sano yejuamej okinchijchijkej para kinmauistiliaj. 21 Ijkuakon, on tlakamej niyanaskej kampa tsayankej on uejueyimej temej, ijtik on teostomej, pampa kipiyaskej sanoyej ueyi nemojtijli ijkuak toTEKO uajlas ikan iueyilis niman ikan iueyipoder. Ijkon kichiuaskej ijkuak toTEKO kichiuas ipan in tlajli on tlen sanoyej temojtij. 22 Yejua ika, makasa xtlalikan nemoyojlo itech yakaj tlakatl pampa inemilis sen tlakatl nion xuejkaui onkaj, no ijki ken itlaj ijyotl."