Dios kinyolkuitis on chanejkej ipan on ueyikalpan Jerusalén niman nochimej on chanejkej ipan on ueyitlalpan Judá
3
Isaías okijtoj: "¡Kuajli xkakikan! ToTEKO yejuan nochi ueli kichiua, kinkixtis ne Jerusalén niman ne Judá on yejuan ompa ontlanemakaj ika on tlajtlamach tlen kitekitiltiaj, niman kinkuilis nochi on tlakuajli niman on atl. 2 No kinmejkuanis on yolchikajkej, on uelij tlauisokij, on teyolkuitijkej, on tiotlajtojkej, on tetlatejtemouilijkej, on tlajtlajmatkej tlayekankej, 3 on soldadostlayekankej, on ricos, on tetlakanonotskej, on magos niman on nanaualtin. 4 Niman kintlalis para ma tlamandarokan on yejuan kokonej; ma tekiuajtikan on telpokamej. 5 Ijkon tej, ueyi tlajyouilistli onyas ipan on nación. Cada se iuan notlajyouiltis inisiuchanejkau; on telpokamej kinmixnamikiskej on ueuentsitsimej, niman on tlakamej yejuan xuejueyixtokej kinmixnamikiskej on yejuan uejueyixtokej. 6 Ijkuakon sen tlakatl kinotsas ikniu yejuan iuan chanti itataj, niman ijkin kijlis: 'Tejua uej tikpiya maski sentetl motlaken, yejua ika, tejua tiuelis titlayekanas ipan in tlaxoxotonkan.' 7 'Niman on okse ijkin kinankilis: 'Nejua xuelis nemechpaleuis. Ipan nochan xnikpiya tlakuajli nion tlakentli para niktlalis. Maka xnechteneuakan nemotlayekankau.'
8 'Melauak Jerusalén ye uetstikaj, niman Judá xoxotonkok, pampa ompa nochimej kijtouiliaj toTEKO on tlen xkuajli, niman kuijuikaltiaj iueyilis. 9 Inmixko nesi ika xkuajli tlen kichiuaj, niman hasta xok pinauaj; xkiyanaj imintlajtlakol ken nochiuaya Sodoma. ¡Sanoyej tlajyouiskej yejuamej, pampa sano yejuamej kichiuaj impan ma uetsi incastigo.
10 'Xkinmijlikan on yolmelajkej, ika yejuamej kuajli nemiskej, niman pampa kichiuaj tlen kuajli, no kiseliskej intlaxtlauil yejuan kuajli. 11 ¡Pero sanoyej tlajyouiskej on xompayejyeuamej, pampa yejuamej uej xkuajli nemiskej. Dios no kiminmakas intlaxtlauil pampa sanoyej xkuajli tlinon kichiuaj.
12 'On telpokamej niman on siuamej, yej yejuamej kinmandarouaj on notlapejpeniluan niman kintlajyouiltiaj. On yejuan mechyekanaj mechkajkayauaj; yejuamej mechuikaj ipan on xmelajkiojtli.
13 'ToTEKO ye nemi listo para teyolkuitis; ye nemi listo para kintlajtlakolmakas itlapejpeniluan. 14 ToTEKO kintekuitlanis on jueces niman intlayekankauan on israelitas para kinyolkuitis, niman ijkin kinmixkomakas: 'Nemejuamej yonenkinmixpolojkej on notlapejpeniluan israelitas yejuan nikinta ken nouvajtlatôk; yonenkintlachtekilijkej on mayankej, niman on tlen yonenkichtekej yonenkejkej nemokalijtik. 15 ¿Akinon mechkauilia para xkintlajyouiltikan on notlapejpeniluan niman inka xmauiltikan on mayankej? Nejua nemoTEKO yejuan nochi ueli nikchiua, ijki nikijtoua."
Dios kincastigaros on siuamej yejuan chantij Jerusalén
16 No kijtoua toTEKO: "Nemejuamej siuamej yejuan nenchanejkej Jerusalén, sanoyej nenmoueyimatij; hasta nenmokechanaltiaj ikan noueyimatilistli ijkuak nennejnemij, niman nentetlajyelitaj. Ijkuak nennejnemij ken nenmijtotijtiuij niman nenkakistilijtiuij on nemokxitlajmachyouan. 17 Yejua ika tej, nejua nemechcastigaros ika on kokolistli sauatl para xtsonxinikan, niman nikchiuas para xmokauakan tsotsoltikej para sanoyej xpinauakan ixpan nochi tlakatl.
18 'Ipan on tonajli, nejua nemoTEKO nikimpopolos nochi on nemotlajmachyouan: on nemokxitlajmachyouan, on diademas yejuan nenkitlaliaj ipan nemotsontekon niman on ken tlajkometstli yejuan nenkimopilouiliaj ipan nemokoskau. 19 No, nikimpopolos on pipiloltin, on makoskamej, on velos, 20 on listontlalpiltin, on teposcadenitas yejuan nenkâkiltiaj nemokxikechtlan, on xijlanilpikamej, on ajuiyalistekontsitsimej niman on tlen nenkimopilouiliaj yejuan nenkinemiliaj mechmanauiya de nochi tlen xkuajli. 21 No ijki, nikimpopolos on anillos, on yakpipiloltin, 22 on patiojkej tlakentin, on tlakempanimej, on tela yejuan ika nenmokechpantejkuiyaj, on bolsas yejuan nenkimopilouiliaj, 23 on teskaitajli, on telas yejuan patiojkej, on kualtsitsimej paños niman on telas de manta yejuan kajkanajkej. 24 Ipan on tonajli xok onyas ajuiyalistli, yej onyas tlen molonki; xok onyas xijlanilpikatl patioj, yej san onyas mekatl; xok nenmotlalpiliskej kualtetsin, yej nenkuatexikaltikej yeskej; xok nenkitlaliskej patioj tlakentli, yej nenkitlaliskej ajmankatlakentli; xok nenkipiyaskej on kualtsin tlachalistli, yej mechteposkechiskej.