4
'Ipan on tonaltin nokauaskej sa keskimej tlakamej. Yejua ika, chikomemej siuamej nokuikuiliskej sentetl tlakatl, niman kijliskej: 'Tejuamej tiktejtemoskej tlinon tikuaskej niman tejuamej titekitiskej para titotlakentiskej, yej san xtechkauili ma mouan titonamiktikan, para maka toka uetskaskej pampa xotiknextijkej akinon iuan tinemiskej.' "Dios kiprometeroua ika sakin, kuajkis pakilistli ne Jerusalén
2 Dios no okijtoj: "Ipan on tonaltin, nejua nikchiuas para on nación de Israel itsmolinis ken sen kojtli. Iitsmolinajlo sanoyej kualtsin yes niman sanoyej ueyixtias. Niman on tlen tlakis ipan on tlajli, yejua inueyilis niman intlakaitalis yes on achijtsitsimej chanejkej yejuan nokauaskej ne Israel. 3 On yejuan xmikiskej, nikinkauilis ma chantikan Jerusalén, niman nikintokayotis 'Yolchipajkej Notech'. 4 Ijkuak nejua nikuajtitlanis on castigo, nikinchipauas on chanejkej Jerusalén de on miyek temiktilistli yejuan okichijkej niman de nochi okseki tlatlamach tlen xkuajli ompa okichijkej. 5 Niman ipan nochi on tlajli kampa onkaj on tepetl Sión, kampa nosentlaliskej notlapejpeniluan, tlakpak niktlalis sen moxtli tilauak ijkuak tlajokaj, niman ijkuak tlayoua niktlalis tlitl yejuan kauantias niman kualtsin tlanestos. Niman impan nochimej niktlalis noueyilis, 6 para nikintlapachos niman nikinmanauis. Ijkuak sanoyej tonas ompa notonalseuiskej niman ijkuak kiauis niman ajakakiauis ompa niyanaskej."