Judá, ken sen uvajtlatôktli (5.1 – 6.13)
Iuvajtlatôk toTEKO
5
Isaías okijtoj: "Aman ninokuikatis sen kuikatl itechkopa iuvajtlatôk sen notlajsojkaikniu.'Notlajsojkaikniu kipiyaya sen iuvajtlatôk
ipan sen tlajli kampa kuajli tlatlaki.
2 Okixoponij on tlajli, niman okitekixtij;
kemaj okitôkak itemekayo on más kuajli uvas yejuan okitlapejpenij.
Itlajkotian on uvajtlatôktli okichijchiu sen torre,
niman no otlachijchiu kampa kipatskas on uvas para kichijchiuas vino.
Notlajsojkaikniu kinekiya ma tlaki uvas yejuan kuajli tsopelik,
pero yej otlak uvas yejuan xokok.
3 Yejua ika, on Dios yejuan notlajsojkaikniu ijkin kijtoua:
"Aman xnechijlikan nemejuamej chanejkej Jerusalén niman chanejkej Judá,
¿akinon kipiya tlajtlakojli, nejua noso on nouvajtlatôk?
4 ¿Tlinon tej opoliuito nikchiuiliskia on nouvajtlatôk niman xonikchiuilij?
Nejua nikchaya ma tlaki uvas yejuan tsopelik,
tla ijkon, ¿tline yej otlak uvas yejuan xokok?
5 Yejua ika tej, aman xkakikan tlinon niknemilia nikchiuilis on nouvajtlatôk:
Nejua nikxoxotonis on tepanchinantli yejuan ika yeualtsakutikaj
niman ika nomanauiya,
niman nikinkauilis on tepeyolkej ma kikuakan niman ma kichojcholokan.
6 Nejua niktlalkauis para ma noxomikti.
Xok kitejtekiliskej imakojyotsitsiuan yejuan xtlaki,
nion kixtiliskej on xkuajli xojtli,
niman sanoyej uitsyouas niman xojyouas.
Nejua niknauatis on moxtli para ompa maka kuajtitlanis kiautli."
7 Kemaj Isaías ijkin okinmijlij on israelitas:
"On toTEKO yejuan nochi ueli kichiua, mechita nemejuamej chanejkej Israel niman chanejkej Judá,
ken iuvajtlatôk yeskia yejuan más kitlajsojtla.
Yejua toTEKO kichaya nemejuamej xtlakamatikan itlanauatiluan,
pero yej kita sanoyej nentemiktiaj;
kichaya kitas nemomelajkanemilis,
pero yej kita inchokilis on yejuan kintlajyouiltiaj."
On tlen kijyouiskej on yejuan xkuajkualtin
8 No ijki Isaías okinmachistij on chanejkej Judá on tlinon xkuajli impan nochiuas. Ijkin okinmijlij: "¡Sanoyej nentlajyouiskej nemejuamej yejuan nenkinkouaj miyek kaltin, niman no nenkinmoyaxkatiaj miyek tlaltin niman xnentekauiliaj para oksekimej no ma kipiyakan, niman ijki san nemejuamej nenchantiskej ipan in país! 9 ToTEKO yejuan nochi ueli kichiua ijkin onechtlajtolmakak: 'Sanoyej miyek kaltin xoxotoniskej; niman maski uejueyimej niman kualtsitsimej yeskej, xakaj ompa chantis. 10 Yejua ika, ipan on tlajli de yeyi hectaria, kitôkaskej uvas niman san kisas ompoajli uan naui litro vino. Niman kampa kitôkaskej majtlaktli costal ixinachyo trigo, tlakis san se costal.'
11 '¡Sanoyej nentlajyouiske nemejuamej, yejuan saniman nentlachaj para nentlauanij, niman ijkuak yonenkuelilijkej on vino, más nenkonij hasta ijki nentlayouiliaj! 12 Ipan on iluitl yejuan nenkichiuaj, sanoyej kakisti ken tlatsotsonalo ikan arpas, salterios, tambores niman ikan akatlapitsaltin, niman onkaj miyek vino kampa nentlakuaj, pero xkaman nenkinemiliaj noso nenkajsikamatij on tlen kichiua toTEKO. 13 Yejua ika, pampa nemejuamej itlapejpeniluan toTEKO xonenkinekkej onentlakakkej, mechuikaskej ken esclavos ipan okse país. Nemochimej iminuan nemotlayekankauan nenmikiskej ikan apistli niman amiktli.
14 'Niman on tlalkontli yejuan ken itlaj tekuani yolki yejuan sanoyej kamakoyauak, mechtolos nemochimej iminuan nemotlayekankauan yejuan sanoyej pakij ijkuak kichiuaj tlen xkuajli. 15 Nochi tlakatl sanoyej nopinajtis, on yejuan noueyimatij nokneliskej. 16 Pero on toTEKO yejuan nochi ueli kichiua, kiueyiteneuaskej pampa kitaskej ika kichiua tlen melajki; on Dios yejuan yektli, kiteititis iyekchipaualis ijkuak tecastigaros ken kitocaroua. 17 On uejueyikalpamej kinxoxotoniskej niman on kampa tlaxoxotontos ompa tlakuajkuaskej borregos niman chivos.
18 'Sanoyej nentlajyouiskej nenmejuamej yejuan sanoyej nentlakajkauaj, niman ijki, on nenmotlajtlakoluan xok ueli nenkintlalkauaiyaj! 19 Nemejuamej hasta ika nenuetskaj Dios niman nenkijtouaj: 'On tlen Dios kijtoua kichiuas, nimantsin ma kichiua para ma tikitakan; on Dios de Israel yejuan yektli, nimantsin ma kichiua on tlinon kinemilia kichiuas, para tejuamej no tikmatiskej tlinonon.'
20 '¡Sanoyej nentlajyouiskej nemejuamej, yejuan nenkitouaj kuajli, on tlen xkuajli, niman on tlen xkuajli yej nenkijtoua kuajli; on tlastajlotl nenkijtouaj tlayouajlotl, niman on tlayouajlotl nenkijtouaj tlastajlotl; on tlen chichik nenkijtouaj tsopelik, niman on tsopelik nenkijtouaj chichik!
21 '¡Sanoyej nentlajyouiskej nemejuamej, yejuan nemoteneuaj nentlamatkej niman nenkijtouaj nentlamachilisyejkej!
22 '¡Sanoyej nentlajyouiskej nemejuamej, yejuan xakaj mechtlani ken nenkonij on vino, niman xakaj mechtlani para nenkichijchiuaj on tlen tetlauantia! 23 Nemejuamej, yejuan san ichtaka nenkiseliaj tomin para nenkimakauaj on yejuan kichiua tlen xkuajli, niman yej nenkitlajtlakolmakaj on yejuan xkipiya tlajtlakojli. 24 Yejua ika, ijkon kenon tlitl kitlatia on tlajsojli niman on tlimilinajli tlami kitlatia on xojtli uaki, no ijki nemejuamej nenpopoliuiskej, ken itlaj xojtli yejuan neluayopalani niman ixochiyo ajkotokoua ken itlaj tlalkuechtli. Ijkon tej, nenpopoliuiskej pampa xonenkiselijkej on itemachtiluan niman itlanauatiluan toTEKO yejuan nochi ueli kichiua, on Dios de Israel yejuan yektli. 25 Yejua ika, toTEKO sanoyej yokualan nemouan, yejuan nenitlapejpeniluan, niman yomechcastigaroj. On tepemej ouiuixkakej, on mikatsitsimej xintokej ipan on kalpanojtli ken itlaj tlajsojli. Niman maski ijki yonochiu, itlauel toTEKO xseui. ToTEKO kijtoua ika más mechcastigaros.
26 'ToTEKO kuiteuas sen bandera para ika kinotsas sen nación yejuan uejka onkaj. Niman desde kampa más uejka de in tlaltikpaktli, on soldados de on nación amanaman uajlaskej. 27 Imintech on soldados xnemij yejuan xkojtikej noso yejuan siautokej, niman nochipa tlachixtokej, xakaj nemi yejuan xkuajli tlajkotilintikaj ika xijlanilpikatl, xakaj nemi yejuan yotekojkoton ikakmekayo. 28 Iminarcostlaminaluan sanoyej yakapitstikej, inarcos sanoyej tilinkej, inmistikakauayo incaballos ken itlaj temej yejuan sanoyej chikajkej, niman on incarretas de guerra, iminruedas notlalouaj ken itlaj ajkomalakotl. 29 Ijkuak on soldados tsajtsij, kakistij ken itlaj león ijkuak nanalka, ijkuak kajsi sen yolki yejuan kuika para kikuas niman xakaj ueli kuilia. 30 Ijkuak yejkos on tonajli, on nación kokomokas chikauak ken itlaj mar impan on chanejkej Israel. Tla yakaj ontlachas imanian on tlajli de Israel, san uelis kitas sen xkuajli tlayouajlotl, pampa on moxtli sanoyej tlilijki kitsakuilijtias on tlastajlotl yejuan uajleua ipan cielo."