Dios okinots Isaías
6
Ipan on xipan ijkuak omik on rey Ozías, onikitak toTEKO ipan sen tlatlachalistli ken notemikpan. Yejua yeuatikatka ipan sen trono yejuan onkatka sanoyej tlakpak; itenko on itlakempani, sojtikatka ipan nochi ipiso on ueyitiopan. 2 Ikuatipanika Dios patlantinemiyaj on más uejueyixtokej ángeles intoka serafines. Cada se kipiyaya chikuasen imastlakapal. Ome inmastlakapal ika nixtlapachojtiayaj, okse ome ika notlapachouayaj de inxijlan para tlatsintlan, niman on okse ome ika patlaniyaj. 3 Niman ijkuak tlajtouayaj, nonankiliayaj. Ijkin kijtouayaj: "Yektli, yektli, yektli yejua toTEKO yejuan nochi ueli kichiua; ipan nochi in tlaltikpaktli tentikaj ikan iueyilis."4 Chika yejuamej kiueyiteneuayaj toTEKO, itsakuijlouan on ueyitiopan opeu uiuixkaj, niman ijtik on ueyitiopan ouajtlapokten.
5 Kemaj nejua onikijtoj: "¡Nejua semi nixpolijtikaj! ¡Aman kemaj nimikis, pampa nejua yejuan nitlajtlakolej niman nichanti intsajlan on tlajtlakolejkej, ikan nixtololojuan yonikitak on Rey, on toTEKO yejuan nochi ueli kichiua!"
6 Kemaj semej on serafines ouajpatlan notech. Niman ika sen tepostlakitskijli, okuajkik sen tlixochtli yejuan okonkuik ne tlaixpan. 7 Kemaj ika onechteloj ipan noten, niman onechijlij: "Ika in tlixochtli yejuan ika onikteloj moten, Dios yokipopoloj moxompayejyeualis niman yomitsintlapojpoluilij motlajtlakoluan."
8 Kemaj onikak itlajtol toTEKO, yejuan kijtouaya: "¿Akinon tikontitlaniskej para yas totechkopa? ¿Akinon konteijlis notlajtol?" Nejua oniknankilij: "Nikan ninemi, nejua xnechtitlani." "¿Akinon tikontitlaniskej para yas totechkopa?
9 Niman yejua onechijlij: "Xuiya niman ijkin xkinmijli on israelitas: 'Maski miyekpa nenkakiskej notlajtol, xnenkajsikamatiskej, maski más nenkitaskej on uejueyitlajtlamach yejuan nikchiua, xnenkimatiskej tlinon kijtosneki. 10 Yejua in nochiua, pampa nemotlamachilis xtekiti. Nemejuamej nennakastsajtsakutokej niman nenmixtsajtsakutokej para maka nentlachaskej ikan nenmixtololojuan, nion maka nentlakakiskej ikan nemonakasuan, nion maka itlaj nenkajsikamatiskej ikan nenmotlamachilis, nion maka nemokuepaskej notechika para ijki nejua xnemechmakixtis."
11 Kemaj nejua oniktlajtoltij: "NoTEKO, ¿kech ika uejkauis ika ijkin nochiuas?" Niman yejua onechnankilij: "Hasta kaman on uejueyikalpanmej tlamis kinxoxotoniskej niman xok yakaj chantis impan; niman ijkuak ijtik on kaltin xok yakaj chantis, niman ipan on tlaltin yotlauajuak niman xok yakaj ompa nemis. 12 Niman no uejkauis san kech ika toTEKO kinkixtis nochimej on tlakamej nikan ipan intlal, niman kemaj ipan in país xok yakaj chantis. 13 Niman tla saman nokaua sa se parte de on majtlaktlitipan de on chanejkej, yejuamej no kinmiktiskej, no ijki ken ijkuak kitsontekij sen roblejkojtli noso sen auakojtli, niman sa nokaua on kojtejtepojli. (Pero on kojtejtepojli a itsmolinis, niman on iitsmolinyo tlatiochijtli yes.)"