Dios kintekitiltis on asirios para kimpopolos on israelitas
Sen temachistijli para Acaz
7
Ipan on tonaltin ijkuak Acaz, ikoneu Jotam, niman teixuiu itech Uzías, rey katka ne Judá, Peka, ikoneu Remalías, rey katka ne Israel. Ijkuakon, Rezín on rey de Siria niman Peka oyajkej okinuijsokitoj on chanejkej Jerusalén, pampa kinekiyaj kinoyaxkatiskej on ueyikalpan, pero xouelkej okintlankej.2 Ijkuakon, on rey Acaz, iuejkakoneu on rey David, ijkin okijlitoj: "On sirios iminuan yonotlajtolmakakej iuejkakoneuan Efraín para techajuijsokiskej." Ijkuak on rey Acaz ijkon okak, yejua iuan ichanejkauan opejkej sanoyej kuekuetlakaj ken ijkuak uiuixkaj on kojtin ijkuak chikauak ajaka.
3 Kemaj toTEKO ijkin okijlij Isaías: "Xuiya iuan mokoneu Sear-jasuba niman xnamikiti on rey Acaz ne kampa ontlami on apantli yejuan onejtok ipan on ueyiamantli yejuan onkaj tlakpakopa, ipan on ojtli yejuan yau ipan on mijlaj itoka Tlapakaloyan, 4 niman xkijli: 'Xpiya cuidado, niman maka xmojkamiki; maka xmakajsi itlauel on rey Rezín iminuan on sirios, nion maka xmakajsi on ikoneu Remalías. On omemej ken tlikojtin yejuan san popokaj. 5 On sirios niman iuejkakoneuan Efraín, niman on ikoneu Remalías, yokinemilijkej mitschiuiliskej tlen xkuajli, niman ijkin yokijtojkej: 6 'Ma tiktoyaxkatitij Judá niman ma tikmojkakuitikan; niman kemaj ma tiktlalikan ken rey on ikoneu Tabeel.'
7 'Pero nejua moTEKO Dios ijkin nikijtoua: '¡On xkaman nochiuas! ¡Yejuamej xkaman kitlaniskej Jerusalén! 8-9 Siria kipiya ken icapital on ueyikalpan Damasco, niman Rezín yejua rey ne Damasco. On ueyikalpan Samaria yejua icapital Efraín, niman ikoneu Remalías yejua rey ne Samaria. Pero sakin, ipan 65 xipan, Efraín xok yes sen nación, niman tla nemejuamej xnenkitlaliaj nemoyojlo notech, nemejuamej no ijki mechtlaniskej.'"
Isaías okijtoj ika tlakatis Emanuel
10 ToTEKO no okijlij Acaz: 11 "Xnechtlajtlanili nejua moTEKO Dios ma nikchiua sen milagro yejuan mitsititis ika melauak nochiuas tlinon nimitsijlia. On milagro uelis nikchiuas maski kampa más uejkatlan de on tlaltikpaktli, noso kampa más tlakpak de on cielo."
12 Acaz ijkin otlanankilij: "Ka, nejua xniktlajtlanilis noTEKO Dios sen milagro para ika niktlatlatas."
13 Kemaj Isaías ijkin okijlij Acaz: "Xkakikan tlinon nemechijlis, teuejkakoneuan itech David. ¿Nenkitaj xueyi kijtosneki ika yonenkualanijkej nochi tlakatl niman aman no yonenkualanijkej toTEKO? 14 ToTEKO tej, sano yejua mechmakas sen señal: Sen ichpochtli kanas ikonetsin niman kitlakatilis, niman kitokayotis Emanuel. b 15 Ijkuak in konetsintli noskaltis niman ye kikuas lechejtetsajki ken yogur niman ye kikuas nekutli, uelis kimatis kichiuas on tlen kuajli niman xkichiuas on tlen xkuajli. 16 Pero san chika xe tlamachiliskui on tlakakonetl, ipan on ome país de on omemej reyes yejuan sanoyej tikinmakajsi, ontlaxoxotoniskej niman ompa xok yakaj chantis."
17 Isaías no okijtoj: "ToTEKO kichiuas para mopan uajlas niman impan mochanejkauan niman ipan mofamilia tejua rey, on xkuajli tonaltin yejuan xkaman ijki nochiuaya desde ijkuak Efraín onoxeloj iuan Judá. ToTEKO kuajuikas on rey de Asiria.
Ixneskayomej yejuan imimpan nesij kenijki tlaxoxotoniskej on soldados, intlauelikniuan on israelitas Imágenes donde se ve cómo van a destruir los soldados enemigos de los israelitas
18 'Ipan on tonaltin toTEKO kichiuas para ma uajlakan on soldados ken itlaj sayolimej yejuan nemij impan on ríos de Egipto, niman no uajlaskej ken itlaj on kormenastin yejuan chantij ne Asiria. 19 Nochimej yejuamej uajnochantiskej ipan on tlakopiltin ueuejkatlanmej, niman ijtik on teostokaltin, ipan on kampa uitskojyoj niman nochiuiyan kampa atlij on yolkamej. 20 Ipan on tonajli, toTEKO kuajuikas on rey de Asiria yejuan kitekitiltis ken itlaj navaja yejuan tetlaneuilis más uejka de on río Éufrates, niman on israelitas kinximilis imintson, intentson, niman no de inxijlan para tlatsintlan.
21 'Ipan on tonaltin, yejuan kipiyas sen siuauakax niman ome siuaborrego 22 kipiyas sanoyej miyek leche, yejua ika uelis kikuas on lechejtetsajki ken yogur. Niman on keski tlakatl yejuan xmikis, ijkuak kixoxotoniskej on país, yejuamej ueliskej kuaskej on lechejtetsajki ken yogur iuan nekutli.
23 'Ipan on tonaltin, sen uvajtlatôktli yejuan kipiyaya mil uvajtemekatl niman nonemakaya ika mil tomin de plata, nokuepas uitskojyoj niman tlakoyoj. 24 Ompa, se san uelis kalakis ikan iarco niman itlaminaluan para kinmojmotlas yolkej, pampa ipan nochi on país temis ikan uitskojtin niman tlakotepajsoltin. 25 Niman ipan on tepetsitsimej kampa tlatôkayaj ikan uitsoktli, sanoyej uitskojyouas niman sanoyej tlakoyouas. Yejua ika, ompa xok yakaj uelis kalakis. Yej san kitekitiltiskej para ompa tlakuajkuaskej uakaxtin, borregos niman chivos."