ToTEKO kinyolkuitia on naciones
66
ToTEKO ijkin kijtoua: "On cielo yejua notrono, niman ipan on tlaltikpaktli noseuijtokej nokxiuan. ¿Kanon uelis nenkichijchiuaskej sen kajli para nejua? niman, ¿kanon uelis nenkichijchiuaskej on kampa ninoseuis? 2 ¡Nochi tlen onkaj, nejua onikchijchiu, niman ijki nochi opeu onkaj! Nejua nemoTEKO ijki nikijtoua.'On yejuan mayankej niman tlajyouiyaj, yejuan kitlakamatij notlajtoltsin, yejuamej nikintlajsojtla. 3 Pero nemij yejuan nechuentlaliliaj sen uakax, niman no kimiktiaj sen tlakatl; kechkoyoniaj sen borrego para nechuentlaliliaj, niman no kechtsontekij sen chichi para kinuentlaliliaj oksekimej dioses; nechuentlaliliaj trigo, niman kemaj kej konuentlaliaj iyesyo pitso intech on ídolos; kitlatiaj kopajli para nechmauistiliaj, pero no kimauistiliaj sen ídolo. On yejuan kichiuaj tlinon yejuamej kinekij, sanoyej kimpaktia kichiuaj on tlen sanoyej tetlajyeloj. 4 Yejua ika tej, nejua nikincastigaros niman nikinuajtitlanilis on tlen yejuamej sanoyej kimakajsij. Ijkon nikchiuas pampa ijkuak nejua onikinnots, xakaj onechnankilij; ijkuak onitlajtoj xakaj onechkak. Okichijkej on tlen nejua xnikneki ma kichiuakan; okitlapejpenijkej para okichijkej on tlen nejua sanoyej nechkualania."
5 Isaías okijtoj: "Xkakikan tlinon kijtoua toTEKO, nemejuamej yejuan nenkitlakaitaj niman nenkitlakamatij itlajtoltsin: Yejua kijtoua ika sekimej nemochanejkauan mechtlauelitaj niman mechtlaueltokatinemij pampa nenkiyekteneuaj yejua toTEKO. Niman no, nemoka uetskaj niman ijkin kijtouaj: 'Ma toTEKO impan noteititi ikan iueyilis niman ma kinmakixti; tejuamej tiknekij tikintaskej ika melauak kipiyaj paktli.' Pero on yejuan mechpijpinauiyaj, yej yejuamej nopinajtiskej. 6 On chikauak kokomokalistli yejuan ualeua ipan on ueyikalpan, on kakistilistli yejuan ualeua ipan on ueyitiopan, on pampa toTEKO ye kincastigarojtikaj ken kitocaroua on yejuan itlaluelikniuan.
7 'Antes peuas nokokos Jerusalén, amanaman okitlakatilij ikonetsin. 8 ¿Akinon kamanian yokakka noso yokitaka itlaj kenon? ¿Akinon yokitaka ika ueli peua onkaj sen nación san ipan se tonajli? ¿Akinon yokitaka ika ueli amanaman nochiua sen ueyikalpan? ¡Xakaj! Pero kemaj ueli, pampa ijkuak Jerusalén kemach peuaya nokokoua para tlanemitis, amanaman okitlakatilij sen nación. 9 ¿Kenijki ueliskia nikteltiskia Jerusalén para maka kimpiya ikoneuan, tla sano nejua onikinmakak on nemilistli? Nejua nemoTEKO ijki nikijtoua."
10 Dios okijtoj: "¡Xpakikan iuan Jerusalén! ¡Sanoyej xtemikan ikan miyek paktli iuan in ueyikalpan nemochimej yejuan sanoyej nenkitlajsojtlaj! ¡Iuan xpakikan nemochimej yejuan ipampa onenchokakej! 11 Yejua ken sen nantli. Mechmakas sen tlakuajli yejuan ika nenmixuiskej, ijkon ken sen nantli kixuiltia ikoneu ijkuak kichichitia. 12 Ijkin nochiuas pampa nejua nemoTEKO, nikijtoua ika nejua nikchiuas para ipan ma uajla yolseuilistli ken sen río, niman on riquezas de on naciones ma uajla ken sen ayajtok yejuan pankisa. Jerusalén mechmakas tlen nenkikuaskej niman mechmayanas, niman mechnejnekis ijkuak mechtlalis ipan iteteponuan. 13 Ijkon ken sen nantli kiyoltlalia ikonetsin, nejua no ijki nemechyoltlalis, niman nenkipiyaskej yolseuilistli ne Jerusalén."
14 Isaías okijtoj: "Ijkuak nemejuamej ijkin nenkitaskej, nemoyojlo sanoyej pakis; nemotlalnakayo yenkuiyas ikan chikaualistli. ToTEKO kiteititis iueyi poder impan itekipanojkauan, niman impan itlauelikniuan uej kiteititis itlauel. 15 ToTEKO uajlas itlajkotian tlitl, icarretas de nouijsokilistli nesiskej ken itlaj ajkomalakotl. Nochi itlauel toTEKO uetsis impan itlauelikniuan. On castigo yejuan kuajkis, sanoyej totonki yes ken tlimilinajli. 16 ToTEKO kiyolkuitis nochi tlaltikpaktlakatl ikan tlitl niman ikan mikilistli. Ijkuakon, miyekej mikiskej."
17-18 ToTEKO ijkin kimelajkaijtoua: "On yejuan noteyaxkatiaj niman nochipauaj para kinmauistiliaj on ídolos, on yejuan notekpantiuij para yauij ipan on yekxochitlanmej, on yejuan kikuaj pitsonakatl, uisakomej niman okseki tlakuajli yejuan tetlajyeloj, kiseliskej sen ueyi castigo. Ijkon impan nochiuas pampa nejua nikmatstikaj nochi tlinon kichiuaj niman tlinon kinemiliaj.
'Kemaj sano nejua niuajlas para nikinsentlalis on chanejkej ipan nochimej on naciones niman nochimej yejuan tlajtouaj sesekneka tlajtoltin. Yejuamej uajlaskej niman kitaskej noueyilis. 19 Nejua nikinmakas sen señal. On yejuan xmikiskej ikan on castigo, nikintitlanis ipan in naciones: Tarsis, Libia niman Lidia, kampa sanoyej uelij kitekitiltiaj arcojtlaminaltin. Niman no, nikintitlanis ipan in naciones de Tubal, Grecia niman ipan on países yejuan onokej itempan mar kampa xkaman okakkej de nejua, nion xkaman okitakej noueyilis. Yejuamej kiteijliskej noueyilis ipan on naciones. 20 Yejuamej kinuajuikaskej nochimej on nemochanejkauan. Kinuajuikaskej ipan caballos, ipan carretas de nouisojkilistli, ipan oksekimej carretas, ipan mulas niman camellos. Yejuamej nochiuaskej uentli para nejua ne Jerusalén ipan noyektepeu, kenon uentli yejuan on israelitas kuajkij ikan vasos chipajkej ipan noyektiopan. ¡Nejua nemoTEKO ijki yonikijtoj!
21 'Sekimej nikintlapejpenis para tiopixkej, niman sekimej para levitas. Nejua nemoTEKO, ijki nikijtoua."
22 ToTEKO no kijtoua: "Ijkon kenon yenkuik cielo niman on yenkuik tlaltikpaktli yejuan nejua nikintlalis onyas para nochipa, no ijki para nochipa nemiskej nemouejkakoneuan, niman nemotoka yes para nochipa. 23 Niman cada metstli, ipan on tonajli ijkuak yenkuik metstli, niman cada semana ijkuak sábado, nochi tlakatl uajlas uajnotlakuantelketsas nixpan. ¡Nejua nemoTEKO ijki yonikijtoj nochiuas!
24 'Ijkuak kisaskej, kintaskej inmikatlalnakayouan on yejuan xipan onechitakej. On okuilimej yejuan kinkuaskej on mikatlalnakayomej xkaman mikiskej, niman on tlitl kampa xintoskej on mikatlalnakayomej, xkaman seuis. ¡Nochi tlakatl, sanoyej kitlajyelitas ijkuak ijkon kitas!"