Castigo para on yejuan xipan teitaj
65
ToTEKO ijkin kijtoua: "Yejuan xitlaj nechtlajtlaniliayaj, aman uajlauij notech; yejuan xnechtejtemouayaj, onechnextijkej. On yejuan xnechueyikatsajtsiliayaj, onikinmijlij: 'Nikan ninemi'. 2 Nejua nochipa niknekiya nikinselis on yejuan xipan nechitaj, yejuan nouikaj ipan xkuajli ojtli niman kichiuaj tlen yejuamej kinekij. 3 Yejuamej nixpan kichiuaj nochipa tlen xkuajli para nechkualaniaj. Kinmiktiaj yolkej para kinuentlaliliaj on dioses ipan on yekxochitlan kampa kinmauistiliaj ídolos, niman kitlatiaj kopajli ipan on tabiquejtlaixpantin. 4 No ijki, ijkuak tlayoua, yauij kampa onokej tlalkontin niman kampa tlaiyankan para kinmauistiliaj on mikatsitsimej. Yejuamej kikuaj pitsonakatl, niman inkonuan tetentokej ikan iyayo pitsonakatl. Nochi on sanoyej niktlajyelita. 5 Yejuamej kijtouaj: 'Paon xnemi, maka xnechnisiui, pampa nejua nitlatiochijtli, xken tejua.' Pero on xnejli, pampa yejuamej yej mojmostla kichiuaj para más ma nikualani, niman sanoyej nechpajsolouaj kenon poktli yejuan sanoyej teyakakokoj.6 'Pero ye nikan nikpiya imincastigo tlajkuilolnestikaj. Nejua xsan ninokauas, yej nikincastigaros ken kitocaroua 7 ipampa on tlajtlakoltin yejuan kichiuaj niman ipampa on tlajtlakoltin yejuan okichijkej inuejkatajuan. Yejuamej sanoyej onechkualanijkej pampa okitlatijkej kopalpopochtli inmixpan on ídolos ipan tepemej niman ipan tepetsitsimej. Achtoj kuajli nikixtlalos de nochi on tlen okichijkej, niman kemaj nikincastigaros ken kitocaroua. ¡Nejua nemoTEKO ijki yonikijtoj nochiuas!"
ToTEKO kiprometeroua itlatiochiualis
8 ToTEKO no okijtoj: "Ijkon ken onkaj uvas yejuan kuajkuajli niman yejuan xkuajkuajli, on israelitas no nemij yejuan kuajli nouikaj ken kitocaroua. Yejua ika tej, on notekiuajkauan israelitas, xnochimej nikimpopolos pampa sanoyej nikintlajsojtla. 9 Nejua nikchiuas para Israel niman Judá kipiyaskej miyek inuejkakoneuan, niman chantiskej ipan in tlajli kampa onkaj tepetsitsimej niman tepemej. Yejuamej yonikintlapejpenij para kiseliskej on tlajli, niman on notekipanojkauan ompa chantiskej. 10 Ipan on ixtlauatl itoka Sarón, miyekiyaskej on borregos, niman ipan on ixtlauatl itoka Acor, tlakuajkuaskej on uakaxtin yejuan kimpiyaskej on notlapejpeniluan yejuan nechtejtemoskej.
11 'Pero xijki yes para nemejuamej yejuan nennechtlalkauiyaj nejua nemoTEKO, niman nenkelkauaj noueyitiopan nemejuamej yejuan nenkiuentlaliliaj tlakuajli niman vino on dioses Gad niman Mení, pampa nenkinemiliaj yejuamej mechmakaj kuajli suerte. 12 Nemejuamej yej nenkipiyaskej xkuajli suerte, pampa nikchiuas para ma mechmiktikan ipan nouijsokilistli. Ijkon nochiuas pampa ijkuak onemechnots xonennechnankilijkej. Ijkuak onitlajtoj xonennechkakej, yej onenkichijkej on tlen nejua xniknekiya xchiuakan. Onenkitlapejpenijkej nenkichiuaskej on tlen nejua sanoyej nechkualania."
13 Yejua ika toTEKO kijtoua: "Notekipanojkauan kipiyaskej tlen kikuaskej, pero nemejuamej nenkipiyaskej apistli; yejuamej kipiyaskej tlen koniskej, pero nemejuamej nemkipiyaskej amiktli; yejuamej kipiyaskej paktli, pero nemejuamej nemopijpinajtiskej; 14 yejuamej nokuikatiskej ikan paktli ipan iminyojlo, pero nemejuamej nenajmankachokaskej pampa nenkipiyaskej miyek ajmantli niman tlajyouilistli. 15 On notlapejpeniluan kitekitiltiskej nemotoka para kintlaueliskeja oksekimej para ma mikikan, pero on notekipanojkauan nikintlalilis yenkuik intoka. 16 San akinon yejuan ipan in país kitlajtlanis tlatiochiualistli, noneki kitlajtlanis ikan notokatsin, pampa nejua nochipa niktemaka tlen nechtlajtlaniliaj; san akinon yejuan kichiuas tlajtolmakalistli ipan in país, noneki kichiuas ikan notokatsin, pampa nejua nochipa nikchiua tlen nikprometeroua. Nejua nemechkixtilis on tlajyouilistli, niman nikelkauas nochi on tlen xkuajli onenkichijkej.
ToTEKO kiyenkuilia on cielo niman on tlaltikpaktli
17 'Kuajli xkitakan, nejua nikchiuas para ma yenkuiya on cielo niman ma yenkuiya on tlaltikpaktli. Nochi on tlen achtoj oonyak, nochimej kelkauaskej; xokaman yakaj kelnamikis. 18 Sanoyej xpakikan, niman nochipa xyolpaktiakan ipampa on tlen nejua nikchiuas. Nejua oksejpa nikchijchiuas on ueyikalpan Jerusalén kampa sanoyej onyas paktli, niman on yejuan ompa chantiskej, nochipa kipiyaskej pakilistli. 19 Niman sano nejua sanoyej nikpiyas miyek yolpakilistli ipampa Jerusalén niman nipakis impampa notlapejpeniluan. Ompa Jerusalén, xokaman kakiskej yakaj choka nion xok yakaj kakiskej ajmankatsajtsi.
20 'Ompa xok mikiskej selikakokonej, nion mikiskej ueuentsitsimej tla xe ajsi tonajli para mikiskej. Yejuan mikis ijkuak kipiyas 100 xipan, kitaskej ken telpochtli yeskia, niman tla yej se xkajxitis 100 xipan, kitaskej ken sen tlauelijli. 21 On chanejkej kinchijchiuaskej inkaluan niman kuajli ompa chantiskej, tlatôkaskej ikan uvas, niman yejuamej kikuaskej itlakyo on uvas. 22 Ompa xkichijchiuaskej inkal niman yej oksekimej ompa chantiskej, nion tlatȏkaskej niman yej oksekimej kikuaskej on tlakijlotl. Notlapejpeniluan sanoyej uejkauis nemiskej kenon kojtin uejkauij onokej; yejuamej sanoyej kipiyaskej paktli pampa inyaxka yes on tlen yejuamej kitekitiskej. 23 Intekiu xsanenkaj kichiuaskej, nion inkoneuan xmikiskej ijkuak xe ajsi tonajli para mikiskej. Ijkon nochiuas pampa yejuamej teuejkakoneuan intech on yejuan toTEKO yokintiochiu, niman no ijki impan nochiuas iminuejkakoneuan. 24 Antes nechnotsaskej yejuamej, nejua nikinnankilis; antes tlamis nechnotsaskej, nejua nikinkakis. 25 On lobo niman on borreguito san sekan tlakuajkuaskej, on león kikuas sakatl ken itlaj uakax, niman on kouatl kikuas tlajli. Ipan nochi noyektepeu xakaj kitechiuilis tlen xkuajli. ¡Nejua nemoTEKO ijki yonikijtoj nochiuas!"