64
'ToTEKO, ¡xtlapo on cielo niman xuajtemo ipan in tlaltikpaktli! Tla ijkon tikchiuas, on tepemej uiuixkaskej ikan nemojtijli ijkuak mitsitaskej. 2 Xuajtemo kenon tlitl yejuan kitlatia on uitstin niman kuakualatsa on atl. Niman ijkuakon, on motlauelikniuan kimatiskej ika sanoyej tiueyixtikaj, niman on naciones mixpan kuekuetlakaskej. 3 Yeuejkaui ijkuak otiuajtemoka, otikchiu tlajtlamach tlen temojtij yejuan xtikchixtikatkaj, niman on tepemej mixpan okuekuetlakakej. 4 Xkaman yakaj okak nion okitak okse dios ken tejua, yejuan no ijki ueli kichiua on tlajtlamach impampa on yejuan itech yejua kitlaliaj inyojlo. 5 Tejua tikselia yejuan ikan paktli kichiua tlen kuajli, yejuan xkelkaua kitlakamatis motlanauatiluan.'Pero touan yotikualan pampa yotitlajtlakojkej, pampa desde yeuejkaui otimitsajmankamakakej. 6 Tinochimej kech tinemij sanoyej yotijtlakaukej ikan totlajtlakoluan; nochi on tlen tikchiuaj maski tikuitiaj kuajli, ken itlaj tojtontli yejuan sanoyej tlajloj. Tinochimej yotixinkej ken itlaj xojtli pilinki, niman on tlen sanoyej xkuajli tikchiuaj, ken itlaj ajakatl techteuilana. 7 ToTEKO, xok yakaj nemi yejuan mitsmauistilia, nion xok yakaj mitstlajtlanilia para kitejtemoua motlapaleuil. Yejua ika, otimiyan de tejuamej niman otitechtlalkauij ipampa nochi on tlen xkuajli tikchiuaj.
8 'Pero tejua toTEKO, tejua titoueyiTajtsin; tejuamej titochiuaj kenon sokitl, niman tejua timochiua kenon konchijchijketl para tejuamej. ¡Tinochimej tejua otitechchijchiu! 9 ToTEKO, maka sanoyej xmotlauelti topampa, nion maka nochipa xkonmatstia on tlen xkuajli otikchijkej. ¡Yej xtechita ken timotlapejpeniluan tinochimej! 10 On kampa onkatkaj mouejueyiyekkalpanuan xokuitlaj onkaj, yej yonokau ken xalpatlajkan. Hasta Jerusalén nochi xoxotontok. 11 On toueyitiopan yejuan sanoyej ueyixtikatka, kampa touejkatajuan omitsmauistilijkej, xok onkaj, pampa on tlitl okipopoloj. ¡Nochi on tlen más tiktlajsojtlayaj xoxotontok! 12 Niman ipampa nochi in tlen yonochiu, tejua toTEKO, ¿xitlaj tikchiuas topampa tejuamej? ¿Xitlaj tikijtos, niman ijkon más sanoyej titechtlajyouiltis?"