Itetlanilis toTEKO ipan Edom niman impan oksekimej naciones
63
On tiotlajtojketl Isaías tetlajtotia:—¿Akinonon uajlau, yejuan oualeu ipan on ueyikalpan Bosra, kampa icapital on país de Edom? ¿Akinonon uajlau ikan itlaken tlapajloj chichiltik, niman sanoyej uajkualnestiu niman uajnejnentiu ikan sen temojtij poder?
ToTEKO kinankilia:
—On nejua akin niDios, yejuan nitemachistia ika nitetlanis niman nikpiya nochi poder para nitemakixtis.
2 Kemaj Isaías okitlajtoltij:
—¿Man tline tikpiya motlaken chichiltik, niman tinesi kenon yejuan yokixaxakualoj uvas ikan ikxiuan?
3 ToTEKO kinankilia:
—Kemaj, melauak, pero on yej onikinxaxakualoj on notlauelikniuan ken kixaxakualouaj on uvas ijkuak kichijchiuaj vino. Niman onikchiu noselti, xakaj onechpaluij. Onikinxaxakualoj ikan nochi notlauel, yejua ika, in notlaken oyeschijchipin. 4 Nejua yonikijtojka ika yejkos in tonajli ijkuak nikincastigaros notlauelikniuan, niman nikinmanauis notlapejpeniluan. 5 Onechtlatlachaltij ijkuak onikitak ika xakaj nemiya akin nechpaleuis. Pero notlauel niman noueyi poder onechpaleuijkej para onitetlan. 6 Ikan nochi notlauel onikinxoxotonij on naciones, ikan nochi notlauel oniktoyau inyesyo ipan tlajli.
Iueyitetlajsojtlalis Dios para Israel
7 Isaías okijtoj: "Nejua nikneki nitlajtos de on itetlajsojtlalis toTEKO, nikneki ninokuikatis kuikamej ipampa nochi on tlen yejua topampa yokichiu, pampa kipiya kuajli iyojlo iminuan on israelitas yejuan itlapejpeniluan, niman pampa yokintitij iueyiteiknelilis niman iueyitetlajsojtlalis."
8 'ToTEKO okijtoj: 'Yejuamej notlapejpeniluan yejuan xkaman nopan nokuepaskej.' Yejua ika tej, yejua okinmakixtij 9 de nochi intlajyouilis. Yejua xsan ouajtlatitlan para okinmakixtiko on israelitas, yej sano yejua toTEKO ouajlaj okinmakixtiko. Yejua okinmanauij pampa kintlajsojtla niman pampa kinmiknelia. Okinkuiteu niman okinnapaloj, ijkon ken nochipa okinuajpaleuijtiaj desde yeuejkaui.
10 'Pero yejuamej xipan okitakej toTEKO, niman okiajmankamakakej iEspíritu Santo. Yejua ika, toTEKO onochiu intlauelikniu niman yejua ika okinuijsokiko. 11 Ijkuakon, yejuamej okelnamikkej on tlen impan onochijka inuejkatajuan ijkuak Moisés, okinmanauij ne Egipto, niman ijkin onotlajtoltijkej: '¿Kanon nemi on Dios yejuan okitlapoj on Mar Rojo para okimpanoltij on isrelitas yejuan okinyekan Moisés? ¿Kanon nemi on Dios yejuan okitlalij iEspíritu ipan Moisés? 12 ¿Kanon nemi on Dios yejuan ika iueyi poder nochipa okipaleuij Moisés, on Dios yejuan okitlapoj on mar imixpan nochimej on israelitas, yejua ika sanoyej okixmatkej nochiuiyan niman para nochipa? 13 ¿Kanon nemi on yejuan okimpanoltij ijtik on mar ipan tlaluaki, niman nion xakaj onalau ijkon kenon caballos xnalauaj ijkuak notlalouaj ipan on xalpatlajkan?' 14 Dios okinmakak neseuijli sanoyej kuajli on itlapejpeniluan, ijkon kenon uakaxtin kuajli noseuiyaj ijkuak ontlakuajkuaj ipan on ixtlauatl. Ijkon iEspíritu toTEKO okincuidaroj itlapejpeniluan. Pampa ijkon okinyekan itlapejpeniluan, yejua sanoyej okixmatkej niman sanoyej okipix ueyilistli.
Sen noueyikatsajtsilistli para se kiselis teiknelilistli niman tlapaleuilistli
15 'Xuajtlacha toTEKO desde ne iluikak, desde ne mochan kampa tlayekkan, kampa ueyixtikaj motrono. ¿Kanon onkaj on sanoyej ueyi motetlajsojtlalis niman on moueyipoder? ¿Kanon onkaj on moueyiyolkexanalis yejuan tikpiya touan? ¿Tlen yotlan on moueyiteiknelilis touan? 16 ¡Tejua titoueyiTajtsin! Maski Abraham technenekiskia, niman Israel xtechelnamikiskia, tejua toTEKO, titoueyiTajtsin yejuan nochipa titechmakixtiya. 17 ¿ToTEKO, tline otitechkauilij ma tiktlalkauikan moojui? ¿Tline otitechkauilij ma titoyoltechikauakan para xok timitstlakaitaj? Xmokuepa touan, ipampa on tetlajsojtalistli yejuan titechpiyalia tejuamej motekipanojkauan, niman impampa on tribus yejuan moyaxkauan. 18 Tejuamej yejuan timoyektlapejpeniluan sanoyej achijtsin tiempo otikpixkej on moyekueyitiopan ipan in país. Niman aman on totlauelikniuan yokixoxotonikej on moyekueyitiopan. 19 Tinemij kenon yejuan tejua xkaman titechmandaroskia; tinemij kenon yejuan xtejua titoDios yeskia."