Iyenkuik ueyilis Jerusalén
62
Isaías okijtoj: "Pampa sanoyej nemechtlajsojtla, nemejuamej chanejkej Jerusalén, nejua ninotenkixtis nochipa nemopampa. Pampa sanoyej nemechtlajsojtla, nejua xkaman ninoseuis hasta nikitas ken toTEKO mechpaleuis nentetlaniskej ijkuak mechmakixtis. Niman nemotetlanilis kimatiskej nochiuiyan. 2 Nochimej on naciones kitaskej ken Dios mechmakixtis, niman nochimej on reyes kitaskej nemoueyilis. Kemaj ijkuakon, toTEKO sano yejua mechtlalilis nemotoka yejuan yenkuik. 3 Nemejuamej nenyeskej ken sen kualtetsin icorona sen rey yejuan onyas ipan imauan toTEKO Dios. 4 On nemoueyikalpan Jerusalén, xokaman kuitiskej 'Kauajli', yej itoka yes 'Yejuan Más Nikneki'. Niman on nemotlal xok kuitiskej 'Tlalxoxotonki', yej itoka yes 'Nosiuatsin'. Ijkon nochiuas pampa nemejuamej más mechneki toTEKO, niman yejua yes ken sen iueuentsin nemopaís. 5 Ijkon ken sen telpochtli nonamiktia iuan inovia, toTEKO no ijki nonamiktis iuan nemoueyikalpan. Yejua oksejpa kichijchiuas nemoueyikalpan, niman ijki sanoyej iuan pakis, ijkon ken sen tlakatl paki iuan isiuau.Intekiu on soldadojtlajpixkej
6 'Jerusalén, ipan on motepanchinan yonikintlalij soldadojtlajpixkej yejuan nochipa ikan tonajli niman ikan yeuajli ijkin kiteijlijtokej: 'Maka xmoteltikan nemejuamej yejuan nenkiyekteneuaj toTEKO. 7 Maka xkauilikan ma noseui hasta kaman tlami kikuektlalia Jerusalén, niman hasta ijkuak kichiuas para nochi tlaltikpaktlakatl ma kiueyiteneua on ueyikalpan.'
On tlajtojli yejuan okitemakak toTEKO
8 'Dios, ikan iueyipoder ijkin yonotlajtolmakak: 'Xokaman nikinkauilis nemotlauelikniuan ma kikuakan nemotrigo, nion on yejuan xchanejkej ma konikan nemovino yejuan nemejuamej onenkitekitkej. 9 Yej sano nemejuamej nenkonkuiskej on tlen yotlak, nemejuamej nekikuaskej niman ijkon nennechueyiteneuaskej. Niman no ijki, nenkonsentlaliskej nemouvas niman nenkoniskej nemovino ipan ikiauak noyektiopan.' "
Intekiu on israelitas
10 Isaías no ijkin okijtoj: "Nemejuamej chanejkej Jerusalén, xkisakan, xuajkisakan ipan ikalakiyan on ueyikalpan. Xtlapokan sen ojtli para on yejuan uajnokuepaj de oksekimej paises. Kualtsin chijchiuakan on melajki ojtli, niman kuajli xkinmejkuanikan on temej. Xkajkokuikan sen bandera para ika xkinnotsakan on naciones. 11 ToTEKO ijkin kinmachistia nochimej on tlaltikpakchanejkej: 'Xkijlikan on ueyikalpan Jerusalén ika ye uajlau itemakixtijkau. ToTEKO kinuajuika itlapejpeniluan yejuan yotlan kinmakixtia.' 12 Niman itlapejpeniluan kinkuitiskej 'Yekchanejkej', niman on 'Itlamanauiluan toTEKO'. Niman on Jerusalén kuitiskej 'On ueyikalpan yejuan más kinekij', 'Ueyikalpan yejuan xokitlalkauijkej' ".