Itekiu on iTekipanojkau toDios niman on tlen ones okichiu ipan itekiu
61
On itekipanojkau Dios kijtoua: "IEspíritu toTEKO nopan nemi, pampa yejua yonechtlapejpenij para nias nikinmijlis on mayankej on kuajli tlajtojli, para nikimpajtis on yejuan noyolkokouaj, para nikinmachistis on yejuan tsakutokej ipan cárcel ika kinmakauaskej. 2 Yejua no yonechtlapejpenij para nikinmachistis ika yoyejkok on kuajli tonajli ijkuak toTEKO techmakixtis niman kintlakuepiltis on totlauelikniuan. No ijki, onechajtitlan para nikinyoltlalis nochimej yejuan nemij ipan ajmantli, 3 para nikinmachistis on yejuan chantij Jerusalén, ika xok kintlankapiyaskej, yej kipiyaskej tetlanilistli; xkinmakaskej chokistli, yej kinmakaskej miyek paktli ken itlaj ajuiyalistli; xkinmakaskej nemojtijli, yej kinmakaskej kuikatl de ueyilistli.'Yejuamej kintokayotiskej 'auakojtin tetlankej', kojtin yejuan sano toTEKO okintôkak para okiteititij iueyilis.
4 'On tepansosoltin yejuan xoxotontokej, oksejpa kinkuektlaliskej. Oksejpa kinchijchiuaskej on kaltin yejuan yeuejkaui okinxoxotonijkaj, niman no kinkuektlaliskej on uejueyikalpanmej yejuan xoxotontokej. 5 On yejuan xchanejkej uajlaskej kintlajpiyaskej nemoborregos, nemotlaluan niman nemouvajtlatokuan. 6 Niman nemejuamej mechtokayotiskej 'Itiopixkauan toTEKO', 'Imelauaktekipanojkauan Dios.' Nenkipakapiyaskej on riquezas de oksekimej naciones, niman nemokualnextiskej ika on tlajmachyomej de yejuamej. 7 Niman pampa nemejuamej sanoyej omechtlajyouiltijkej niman omechpijpinauijkej, no ijki nenkiseliskej ipan nemopaís ometipan on riquezas, niman para nochipa nenkipiyaskej miyek paktli." 8 Dios okijtoj: "Nejua nemoTEKO nikneki ma nochiua nochi on tlen melajki, niman sanoyej nechkualania on tlachtekyotl niman on tlen sanoyej xkuajli nochiua. Nejua nikinmakas notlapejpeniluan ken kitocaroua on intlaxtlauil, niman iminuan nikchiuas sen pacto yejuan xkaman popoliuis. 9 On iminuejkakoneuan sanoyej kinmixmatiskej ipan nochi naciones. Nimantsin kinmixmatiskej ika yejuamej notlapejpeniluan nejua nemoTEKO, niman ika nejua sanoyej yonikintiochiu."
10 Jerusalén kijtoua: "Sanoyej nitemi ikan paktli, pampa noDios yonechmakak itemakixtilis niman yonechpaleuij ikan iyolmelajkanemilis. Okichiu ken nechtlakentiskia ikan patiojkej tlakentin. ¡Yoninochiu ken yakaj novio ijkuak kitlaliltiaj icorona, noso kenon novia yejuan kitlaliliaj miyek tlajmachyotl. 11 Pampa ijkon ken ixua on xinachtli ipan tlajli, niman itsmolinij on plantas ipan sen xochitlan, no ijki kichiuas toTEKO para onyas on yolmelajkanimilistli], niman para nochimej naciones nokuikatiskej ikan yekteneualistli."