Iueyilis on yenkuik Jerusalén yejuan onyas intsajlan on naciones (60.1 – 22)
On naciones yaskej ipan on yenkuik Jerusalén
60
Isaías okijtoj: "Xmokuiteua Jerusalén ika on mokualtsinueyilis, pampa yoyejkok motlauil, niman iueyilis moTEKO petlani mopan. 2 On tlayouajlotl kitlapachoua in tlaltikpaktli niman kintlapachoua on naciones, pero toTEKO mopan kitlalis ipetlanalis, niman mopan kipannextis iueyilis. 3 On naciones uajlaskej itech motlauil; on reyes uajlaskej itechika on ipetlanalis on tlanexyotl yejuan tikpiyas."4 Dios okijtoj: "Jerusalén, xontlacha moyeualkan. Xkita ken nochimej on mokoneuan uajlauij niman nosentlaliaj motech. Desde uejka uajlauij on mokoneuan tlakamej, niman on mokoneuan siuamej kinuajmayantiuij. 5 Ijkuak tejua tikintas sanoyej tipakis. Moyojlo temis ikan miyek paktli. Yejuamej mitsajkuiliskej nochi on tlen patioj yejuan kuajkiskej de on países yejuan onokej itenko mar; mitsmaktiliskej on riquezas de on naciones. 6 Sanoyej miyekej uajlaskej yejuan ualetiaskej ipan miyekej camellos yejuan ualeuaskej Madián, de Efa niman de Sabá. On camellos uajtlamamajtiaskej ikan oro niman ikan kopalpopochtli ajuiyak. Niman kiteijliskej on uejueyitlajtlamach yejuan yonikichiu nejua nemoTEKO. 7 Nochimej on borregos de itribu* Cédar moyaxkauan yeskej; on tojtomajkej borregos de on itribu* Nebaiot, uelis tinechinuentlalilis ipan notlaixpan ken uentli yejuan ajuiyak para nejua moTEKO. Niman ipan on tonaltin, nejua más nikualtsintilis on noueyitiopan.
8 '¿Akinonmej on yejuan nesij kenon moxtli yejuan uajlauij ipan ajakatl, niman nesij kenon palomas yejuan yauij para onkalakiskej ipan iminchan? 9 On tlen nikita, tlakaj on barcos de Tarsis yejuan ualakatstiuij. Yejuamej oualejkej uejka, kinuajuikaj mokoneuan yejuan kuajkij miyek oro niman plata. On oro niman on plata kuajkij para notlakaitalis nejua akin nimoTEKO, akin niiDios Israel niman akin niYektli, yejuan onikchiu para nochimej on naciones ma mitstlakaitakan."
On naciones yejuan okixoxotonikej Jerusalén oksejpa yejuamej kikuektlaliskej
10 ToTEKO sanken kinotstikaj Jerusalén, niman kijlia: "On tlakamej yejuan xchanejkej oksejpa kichijchiuaskej motepanchinanuan, niman on iminreyes mitstekipanoskej. Ijkon tej, maski nejua akin nimoTEKO onimitscastigaroj ijkuak nikualantikatka, aman ikan noueyitetlajsojtlalis yonimitsiknelij. 11 On mouejueyitsakuijlouan xkaman kintsakuaskej; xkintsakuaskej tlajokaj nion tlayoua, para on reyes de on naciones uelis mitsajkuiliskej iminriquezas. 12 Nochimej on naciones yejuan xkinekiskej mitstekipanoskej, nochimej kuajli popoliuiskej."
13 ToTEKO no ijkin kijlia Jerusalén: "Iriquezas on país de Líbano tikselis nochi. Tikselis on kojtin de pinos, abetos niman cipreses, para ika kualtsintiliskej noueyitiopan, para kipiyas ueyilistli on kampa onkaj notrono.
14 'Inkoneuan on yejuan moka onauiltijkej uajlaskej mixpan para nokneliskej. Nochimej yejuan omitschichijkej no ijki mixpan uajnotlakuantelketsaskej, niman mitstokayotiskej 'Iueyikalpan toTEKO', niman no, 'Jerusalén yejuan iyaxka on Dios de Israel akin Yektli.'
ToTEKO kichiuas para Jerusalén sanoyej ma kualtetsin niman ma ueyixtia para nochipa
15 'Aman, xok tinemis ken kauajli. Xok mitstlauelpiyaskej niman xok moselti yes. Yej nejua nimitsmakas ueyilistli para nochipa, niman tikpiyas pakilistli para nochipa. 16 On naciones mitsmakaskej yejuan más kuajli tlakuajli, niman on reyes mitsajkuiliskej iminriquezas. Ijkuakon, tikmatis ika nejua melauak nimoTEKO, yejuan nimotemakixtijkau, niiDios Jacob yejuan nochi ueli nikchiua, niman nimotemanauijkau.
17 'Nejua xnimitsmakas bronce, yej nimitsmakas oro; xnimitsmakas on tepostli hierro, yej nimitsmakas plata; xnimitsmakas tablas de kojtli, yej nimitsmakas bronce; xnimitsmakas temej, yej nimitsmakas on tepostli hierro. Nikchiuas para on motekiuajkauan makasa ma mitstlajyouiltikan; yej ma tekiuajtikan ikan yolmelajkilistli niman yolseuilistli. 18 Ipan on tlajli de Israel xokaman kakistis tla onkaj tlauelîjlotl. Nion xokaman tlaxoxotoniuas ipan nochi moueyitlalpan, pampa nimitsmanauis ken sen ueyitepanchinantli, niman tinechueyiteneuas pampa yonimitsmakixtij.
19 'On tonaltsintli xok nonekis mitstlauiluis ipan tonajli, nion on metstli mitstlauiluis ipan yeuajli, pampa nejua yejuan nimoTEKO, ninochiuas motlauil para yeyika; nejua akin nimoDios, ikan noueyilis nipetlantias para tejua. 20 On tonaltsintli xokaman kalakis nion on metstli xokaman kipolos itlastajlou, pampa nejua akin nimoTEKO, ninochiuas motlauil para yeyika, niman xokaman timajmanas.
21 'Nochimej on mochanejkauan, tejua Jerusalén, kuajli nouikaskej. Yejuamej kinoyaxkatiskej imintlal para nochipa. Yejuamej yeskej kenon tlatsmolintli de on planta yejuan sano nejua oniktôkak. On tlen onikchiu ikan nomauan, yejua kiteititis nochi noueyilis. 22 In keskimej nokoneuan miyekiyaskej hasta ajsiskej miles; in keskimej tlapoualtin aman, nochiuaskej sen ueyi nación. Ijkuak yejkos on tonajli yejuan yoniktlalij, nejua nemoTEKO nikchiuas para ma nochiua saniman."