On tiotlajtojketl kinmixkomaka intlajtlakoluan on israelitas
59
Isaías okijtoj: "ToTEKO kipiya nochi poder para mechmakixtia, niman nochi kuajli kaki ijkuak nenkinotsaj. 2 Pero on nemoxompayejyeualis yejuan onenkichijkej, yejua yomechxeloj iuan Dios. Nemotlajtlakoluan yokichiu para yejua ma nixtsakua niman xok kineki mechkakis. 3 Nemejuamej sanoyej yonenmijtlakojkej ikan nemotlajtlakoluan; nenkichiuaj sanoyej ma onya tlauejli niman sanoyej nentemiktiaj. Sanoyej nenistlakatij niman nentlauijuikaltiaj.4 'Ne kampa noteixpanuiloyan, xakaj kijtoua tlen melajki niman tlen melauak ijkuak nenmoteixpanuiyaj. Yej nenkuelitaj nenistlakatij niman xakaj kijtoua tlen melauak. Sanoyej nententokej ikan xompayejyeualistli. 5 Nemejuamej san nenkinejnemilijtokej nenkichiuaskej nemoxompayejyeualis, niman sanoyej nentemiktiaj. Nemejuamej nenkenon kouamej niman tokamej yejuan sanoyej pajyojkej niman temiktiaj. 6 Sa ika nennemij nenkichiuaj tlen xkuajli, niman nochi tlen nenkichiuaj, sanenkaj. Sa ika nennemij nenkichiuaj tlen xkuajli, niman sa ika nennemij nentlauijsoktinemij. 7 On nemokxiuan san nenkintekitiltiaj para nenmotlalouaj nenkonchiuaj tlen xkuajli, para amanaman nenajsij nenkonmiktiaj yakaj maski xkipiya tlajtlakojli. On nemotlamachilis san mechyekana para nenkichiuaskej tlen xkuajli, niman ipan nemonemilis san nenkajtiuij tlaxoxotonilistli. 8 Ipan nemonemilis xnenkipiyaj yolseuilistli, nion xnenkichiuaj tlen melajki. On ojtli kampa nenyauij, xmelajki, niman san akinon yejuan yau nemouan, xkaman kipiyas yolseuilistli."
On israelitas noyolkuitiaj ika kipiyaj intlajtlakoluan
9 Kemaj on israelitas ijkin okijtojkej: "Impampa nochi totlajtlakoluan, totemakixtilis xejko topan niman xtikpiyaj tomanauilis. Tiknekiyaj tinemiskej ipan tlastajlotl, niman yej tikistinemij kampa tlayouatok. 10 Tinejnemij ken ticiegos, niman ikan tomauan tiktejtemojtiuij tlinon ipan titokitskiskej. San tiktokaj sen tepantli ken xtikimpiyaskiaj tixtololojuan. Maski tlakualispan, tiuejuetstiuij ken tlayoua yeskia. Maski tikpiyaj nemilistli, yej ken yotimikkej. Maski xtikualoj tinemij kenon yejuan yomikkej. 11 Tinochimej sa tiknonanalkaj kenon yolkej osos, sa tiknotetenaj ken palomas. Tikchaj temakixtilistli, pero xejko; tikchaj tomanauilis, pero uejka onkaj de tejuamej. 12 Tejuamej sanoyej yotikualanijkej toTEKO, niman sano totlajtlakoluan techixkomakaj. Kuajli tikmatstokej on tlen xkuajli tikchiuaj. 13 Xipan otikitakej toTEKO, nion xmelauak otikneltokakej. Xotiknekej otiktokakej toDios, yej otikteneuilijkej tlen xkuajli niman ipan otitokuepkej. Otiknejnemilijkej kenijki tikinkajkayauaskej oksekimej."
14 Isaías okijtoj: "On tlen melajki, otikchichijkej, on tlen kuajli, uejka onkaj de tejuamej, xakaj kijtoua on tlen melauak ipan plaza kampa tojlan nosentlaliua, niman xakaj kichiua tlen chipauak.
ToTEKO kinmakixtis on israelitas
15 'Xok yakaj nemi yejuan kipiya san se itlajtol, niman tla yakaj xok kineki kichiuas tlen xkuajli, yej kitlauelitaj.
ToTEKO sanoyej kualani ika kita xok yakaj kichiua tlen melajki. 16 ToTEKO sanoyej okitlatlachaltij ika okitak xakaj kichiua kanika para kiteltis on tlen xkuajli. Yejua ika, sano yejua okinek kichipauas nochi ikan iueyi poder. Ijkon tej, otechmakak on temakixtilistli. 17 Okitekitiltij on yolmelajkilistli ken iteposchaleco yeskia; on temakixtilistli, ken icasco yeskia ipan itsontekon; on tetlakuepilijli, ken itlaken ueyak yeskia; niman on tlauejli, okitekitiltij ken itlaj ueyak tela yejuan ika notlapachoskia. 18 ToTEKO cada se kitlaxtlauilis ken kitocaroua; kincastigaros itlauelikniuan. On yejuan sanoyej kitlauelitaj, kiminmakas tlinon kinmelaua, maski tla yejuamej nemij ipan on países más uejka kampa onkaj mar. 19 Nochi tlakatl ipan in tlaltikpaktli desde ikisayan tonaltsintli hasta ikalakiyan, kitlakaitas toTEKO ijkuak kitas iueyipoder, pampa yejua uajlas ken sen ueyi río yejuan kuajuikas sen chikauak ajakatl.
20 'Yejua uajlas ipan on ueyikalpan Jerusalén ken sen temanauijketl para kinmanauis niman kinmakixtis nochimej iuejkakoneuan Jacob yejuan noyolpatlaskej niman kajkauaskej on tlen xkuajli kichiuaj. ToTEKO ijki yokijtoj."
21 ToTEKO okijtoj: "Nejua nikchiua in pacto nemouan: Nemechprometerouilia ika noEspiritu niman notemachtiluan nochipa onyaskej nemouan niman iminuan nemouejkakoneuan para nochipa."