On tlen Dios kineki (58.1 – 58.14)
On nesauajli yejuan melauak
58
Dios onechijlij: "¡Xtsajtsi chikauak, maka xmomojti! ¡Chikauak ma kakisti motlajtol ken chikauak kakisti sen trompeta! ¡Xkinmajua on notlapejpeniluan, iuejkakoneuan Jacob, ipampa on tlen xkuajli kitechiuiliaj, ipampa nochi intlajtlakoluan! 2 Yejuamej saman mojmostla nechtejtemouaj pampa kijtouaj kinekij más kimatiskej de notlanauatiluan. Ijkon tlajtlajtouaj maski xnejli kintlakamatij noleyes. Yejuamej kinekij ma nikimpaleui ken yejuamej kinekij, niman san nochiuaj ijkuak kijtouaj pakij pampa nechtekipanouaj ipan noYektiopan. 3 No ijki on israelitas kijtouaj: '¿Tlinon para titosauaskej tla Dios xkita? ¿Tlinon para titokneliskej tla yejua xkinomaka cuenta?' Pero nejua nikinmijlia: 'Ipan on tonaltin ijkuak nenmosauaj, nenkichiuaj san para nemejuamej nenmopaktiaj, niman inka nenmauiltiaj on nemotekitkauan. 4 On tonaltin ijkuak nenmosauaj, yej nenmokamauijsokij, niman ikan nemotlauel hasta nenmomajmailiaj ikan matepayojli. Niman ijki, on kenon nesauajli xitlaj ika mechpaleuiya, niman nejua xnikaki nemoueyikatsajtsilis. 5 ¿Tline nenkinemiliaj ika on nesauajli nechpaktia tla nemejuamej san nenmoajmankanejnekij ipampa nemotlajtlakoluan, noso sa nenmopachojtokej ken sen akatl nopechteka ijkuak ajaka niman nenmotekaj ipan tlikonextli ikan nenmoajmankatlaken?6 'Ka, on xejua nesauajli yejuan nikneki. On nesauajli yejuan nejua nechpaktia, yej kenin: makasa xtechiuilikan tlen xmelajki, xkinmakauakan on esclavos, xkinkixtikan on yejuan okinkalaktijkej ipan cárcel maski xitlaj okichijkej tlen xkuajli, niman makasa teka xmauiltikan. 7 Seki xkinmakakan tlen nenkikuaj on yejuan apismikij, xkinselikan nemochan yejuan xkipiyaj kanon chantiskej, xkintlayokolikan intlaken yejuan xkipiyaj, niman nochipa xkimpaleuikan on yejuan ken nenkintaj.
8 'Ijkuak ijkon nenkichiuaskej, nennesiskej kenon tlastajlotl ijkuak tlanesi, niman on kampa nentlakokoltin, nimantsin nempajtiskej. On tlen kuajli nenkichiuaskej kimatiskej on yejuan uejka chantij, niman noueyilis mechkuitlapanuis para mechmanauis. 9 Ijkuakon, tla nennechnotsaskej, nejua amanaman nemechnankilis; tla nenmoueyikatsajtsiliskej notech, nejua nemechijlis: 'Nikan ninemi'. Tla xok nentetlajyouiltiskej, tla xok nenkinuijuikaltiskej oksekimej nion impan nenijistlakatiskej oksekimej, 10 tla nenkinmakaskej tlen kikuaskej on yejuan apismikij, niman tla nenkimpaleuiskej on yejuan tlajyouiyaj, ijkuakon, on tlen nenkichiuaskej nesis kenon tlauijli ipan tlayouajlotl, hasta on tlayouajlotl petlanis kenon tlastajlotl ijkuak tlakualispan. 11 Tla ijkon nenkichiuaskej, nejua nochipa nemechyekanas. Nemechmakas miyek tlakuajli ijkuak nempanoskej ipan on xalpatlajkan, niman nenkipiyaskej chikaualistli ipan nemotlalnakayo. Nenyeskej kenon xochitlan yejuan nochipa katekiyaj niman kenon ameyajli yejuan xkaman uaki. 12 Nemejuamej oksejpa nenkinyenkuiliskej nochi on uejueyikalpanmej yejuan okinxoxotonijkej. Oksejpa nenkinchijchiuaskej on cimientos yejuan yeuejkaui okinchijchijkaj. Kemaj mechtokayotiskej: 'Tlakuejkuektlalijkej de on tepanchinanxoxotonkej.' 'Tlakuejkuektlalijkej de on kalxoxotonkej.' "
Kejeuaskej on tonajli sábado
13 Kemaj toTEKO okijtoj: "Xtlakaitakan on tonajli sábado pampa on tonajli nejua noyaxka. Yejua ika, ipan on tonajli yektli, maka nenkisaskej nemochan para nenyaskej uejka, maka xchiuakan itlaj nemotekiu, maka nentlakouaskej nion nentlanemakaskej, niman maka nenkichiuaskej itlaj ipan on tonajli nion maka nenkijijtoskej yejuan xitlaj kijtosneki. Yej xkejeuakan on tonajli ken sen tonajli de miyek paktli, ken sen tonajli yektli de nejua nemoTEKO yejuan noneki sanoyej nennechtlakaitaskej. 14 Tla nenkichiuaj ken nemechnauatia, nenkiseliskej miyek paktli pampa nennechtekipanouaj, niman nejua nikchiuas para xuejueyixtiakan ipan nemopaís. Niman no nikchiuas para nenkiseliskej on tlajli yejuan onikprometerouilij nemouejkatataj Jacob. ¡Nejua nemoTEKO ijki yonikijtoj nikchiuas!"