On iTekipanojkau toDios kinmixkomaka on yejuan kinmauistiliaj ídolos
57
Isaías okijtoj: "On yejuan yolchipajkej mikij, niman xakaj nokuapajsoloua. nion xakaj kajsikamati ika ijkuak mikij, nomanauiyaj de on tlajyouilistli, 2 niman nokauaj ipan sen neseuijli kampa inyolika nemij. Ijkuak nemiyaj ipan innemilis, okichijkej tlen kuajli, niman aman noseuijtokej ipan imintlalkon."3 Dios okijtoj: "Xuajlakan notech para nemechyolkuitis, nemejuamej tekoneuan intech nanaualtin, tekoneuan intech on auilsiuamej niman tekoneuan intech on tlakapapatlakej. 4 Nemejuamej san nennechpijpinauiyaj. Nennechititiaj ika xnenkinekij nouan nenmouikaskej. Nenkinemiliaj nejua nitonto. Nemejuamej nentekoneuan ipan tlajtlakojli, yejuan nentlakajkayauaj. 5 Kampa onokej on kojtin robles yejuan sanoyej mayeualtikej, ompa nenauilnemij. Kampa onkaj on ayajtoktsitsimej noso intsajlan on teostomej, ompa nenkinuentlaliaj nemokoneuan.
6 'Nemejuamej israelitas, yej más nenkuelitaj nenkinmauistiliaj on dioses de atlajpantemej petstikej yejuan onokej ipan on atlautin. Yej yejuamej onenkinuentlalilijkej vino, niman no, onenkinuentlalilijkej trigo. Yejua ika tej, pampa ijkon onenkichijkej, ¿nenkinemiliaj sanoyej nipaki? 7 Ipan on uejueyimej tepemej yejuan kuajkuayakapitstikej, onenajauilnenkej, niman no ompa onenkinuentlalijkej on uentin. 8 Inkuitlapan nemotsakuijlouan, onenkintlalijkej on nemoxompayejyejkauan ídolos. Nejua, onennechtlalkauijkej niman yej yejuamej onenkinmauistilijkej. Iminuan oksekimej naciones onenkichijkej pacto niman onenkinmauistilijkej on iminídolos.
9 'Onenkimauistilitoj on dios Mélec ijkuak onenkiktilijkej aceite niman miyek ajuiyalistin. No ijki, uejka onenkintitlankej nemotlajtojkauan, hasta okintlajtoltitoj on yejuan yomikkej kanon nemij oksekimej dioses para nenkinmauistiliskej. 10 Pampa sanoyej uejka onenyajkej, aman sanoyej yonensiaukej, pero nion xonenkinemilijkej ika on sanenkaj nenkichiuaj. Xitlaj omechpoloj, yej nochi nenkipiyayaj ipan nemomauan. Yejua ika onemoyolchikajkej.
11 '¿Akinomej on dioses yejuan sanoyej nenkinmakajsij niman nenkintlakaitaj, yejua ika xok nennechneltokaj niman yonennechtlalkauijkej? Ijkuak xok onennechmauistilijkej, nejua xok onemechnots, niman oninochiu ken xnemechitaskia. 12 Pero aman niktemachistis on tlen nenkichiuaj yejuan nenkuitiaj kuajli ken nenkichiuaj. 13 Ijkuak nenkintsajtsiliskej nemoídolos para ma mechpaleuikan, yejuamej xmechpaluiskej nion mechmanauiskej. Nochimej yejuamej kinmajkotoktis ajakatl; san sejpa ualajakas, niman yejuamej popoliuiskej. Pero on yejuan kitlalis iyojlo notech, nokauas ipan in país, niman nechmauistilis ipan noyektepeu."
On iTekipanojkau toDios temakas neseuijli niman kinyoltlalis on yejuan najmanaj
14 Kemaj Dios okijtoj: "Xkijixmanakan on ojtli, xkejkuanikan nochi on tlajtlamach yejuan tlatsakuilia, para uelis panoskej on notlapejpeniluan. 15 Ijkon xchiuakan pampa nejua yejuan Más Niueyixtikaj, yejuan nochipa ninemi, niman notokatsin Yektli, ijkin nikijtoua: Nejua nichanti kampa más tlakpak niman tlayekkan, pero no iuan ninemi on yejuan yolyemanki niman on yejuan najmana ipampa itlajtlakoluan, para nikyoleua niman nikyolchikaua. 16 Nejua xnochipa itlaj nikinmixkomakatias notlapejpeniluan, nion xnochipa nikualantias iminuan. Pampa tla ijkon nikinchiuilis, nochimej on tlaltikpaktlakamej yejuan yonikinmakak nemilistli, xok inyolika nemiskej. 17 Ipampa innexikoualis on notlapejpeniluan israelitas, sanoyej onikualan iminuan ipan se tiempo. Onikincastigaroj niman onikintlalkauij, pero yejuamej más onoyoltechikajkej niman okichijkej tlen yejuamej okinekej. 18 Nejua yonikitak ken xkuajli nouikaj, pero on inxipanteitalis nikinkixtilis niman nikinmakas neseuijli, niman kuajli inyolika nokauaskej. Nejua nikinyoltlalis on yejuan najmanaj, 19 niman ijkin nikinmijlis: ¡Xpiyakan yolseuilistli yejuan nennemij uejka, niman xpiyakan yolseuilistli yejuan nennemij nisiu! ¡Nejua nikinpajtis on notlapejpeniluan! 20 Pero on xompayejyeuamej no ijkej kenon mar yejuan chikauak koxoni niman xueli noteltia, niman san kixtia sokitl niman nochi tlen xchipauak. 21 ¡Xonkaj tej, yolseuilistli para on xompayejyeuamej! Nejua nemoTEKO, nejua ijki nikijtoua."