Dios kintiochiuas nochimej nationes yejuan kitlakamatij on pacto
56
Ijkin kijtoua toTEKO: "Xchiuakan tlen kuajli, tlen melajki, pampa saniman nias nemechonmakixtis ikan noueyipoder. 2 Sanoyej kipiyas paktli on yejuan kichiuas niman kitlakamatis in tlanauatiltin. Sanoyej kipiyas paktli on yejuan kejeuas niman kitlakaitas on tonajli sábado. Sanoyej kipiyas paktli on yejuan xitlaj kichiuas tlen xkuajli.3 'Tla se yejuan xchanej no tlaneltoka kenon israelitas, maka ijkin kinemilis: 'ToTEKO xkaman nechselis ken niitlapejpenil'. No ijki, on yejuan ocaparojkej, maka ijkin kinemilis: 'Pampa xniueli nikimpiya nokoneuan, xniuelis yes niitlapejpenil Dios'. 4 Tla on tlakamej yejuan okincaparojkej kitlakaitaj nosábados, niman tla kichiuaj tlinon nikneki ma kichiuakan, niman xkaman kikauaj nopacto, 5 nejua nikinmakas itlaj tlen más kuajli, xken tla kimpiyaskiaj inkoneuan tlakamej niman siuamej. Nikinkauilis para imintoka ma kijkuilokan ipan itepanuan noueyitiopan, niman ompa nestias para nochipa; nikchiuas para imintoka xkaman popoliuis ipan on tepantli.
6 'Niman tla on yejuan xchanejkej notemakaskej notech para nechtekipanoskej niman nechmauistiliskej ken notekiuajkauan, tla kejeuaskej niman kitlakaitaskej on tonajli sábado niman xkaman kikauaj nopacto yejuan onikchiu iminuan on israelitas, 7 nejua nikinuikas ipan noyektepeu niman nikchiuas ma pakikan ipan on nochan kampa kichiuaj oracion. Ompa nikinselilis iminuen yejuan nochi tlatla niman okseki uentin. Niman on noyektiopan itoka yes, nochan kampa kichiuaj oración nochimej on naciones. 8 Nejua nikchiuas para uajnokuepaskej on yejuan saken chayajtinemij ipan nochi on naciones. Nejua nemoTEKO nemechtlajtolmaka ika ijki nikchiuas, para on israelitas yejuan chayajtinemij nochiuiyan, oksejpa san sekan nemiskej."
On iTekipanojkau Dios kinmixkomaka intlayekankauan on israelitas ipampa on xompayejyeualistli yejuan kichiuaj
9 ToTEKO okinmijlij on naciones: "Xuajlakan nemejuamej yejuan ken nentepeyolkej tekuanimej yejuan nenchantij ijtik kojyoj, niman xkinuijsokikij on notlapejpeniluan israelitas. 10 Xuajlakan pampa on intlayekankauan notlapejpeniluan nochimej xtlachaj. Nesi ken xitlaj kimatij. Nochimej yejuamej kenon tlajpixkachichimej yejuan xok uelij tlakuakuaj para teixnamikij. Sa ika nokauaj kochij hasta temikij. Sanoyej kuelitaj kochij. 11 Yejuamej kenon chichimej yejuan sanoyej tlakuatemej niman xkaman ixuij. On tlayekankej xitlaj kajsikamatij. Cada se kitoka iojui yejuan kineki, niman san kineki kichiuas tlen yejua kineki. 12 Yejuamej kijtouaj: 'Tiauij tikontejtemouaj vino yejuan tetlauantij niman ma titlauanikan. Niman mostla, oksejpa ijki titlauaniskej ken aman, niman tla ueli hasta más titlauaniskej.' "