On iTekipanojkau toDios kinmilis on naciones ika kiseliskej temakixtilistli (55.1 - 56.8)
Itenotsal Dios para ma uajlakan itech
55
ToTEKO kijtoua: "Nochimej yejuan nenamikij, xuajlakan niman xkonikij atl. Nochimej yejuan xnenkipiyaj tomin, xuajlakan xkuikij trigo san ijki xikan tomin, niman xpiyakan tlen nenkikuaskej; xselikan vino niman leche, niman xitlaj nenkitlaxtlauaskej. 2 ¿Tline nenkouaj itlaj yejuan xpara nenkikuaj? ¿Tline on nemotlaxtlauiltomin yej ika nenkouaj on tlen xmechixuiltia? Aman kuajli xkakikan tlinon nemechijlia, niman nenkuaskej on kuajli tlakuajli yejuan uelik. 3 Aman xuajlakan notech niman kuajli xnechkakikan para nenkipiyaskej nemilistli. Nejua nemouan nikchiuas sen pacto yejuan xkaman poliuis, niman ijkon nicumpliros on promesas yejuan onikmakak David pampa oniktlajsojtlak. 4 Yejua oniktlalij ken testigo ipan nochimej naciones. Oniktlalij ken sen tlayekanketl niman temachtijketl para yejua kimachistis nochi tlakatl on tlen onikijlij. 5 Nemejuamej israelitas nenkinotsaskej nochi tlakatl yejuan xnenkinmixmatiyaj; on yejuan xmechixmatiyaj notlaloskej nemotech, pampa nejua nemoTEKO akin niDios de Israel yejuan niYektli, nikchiuas para nenkiseliskej tetlakaitalistli niman ueyilistli ipan on naciones."6 Isaías okijtoj: "Xtejtemokan nemoTEKO, chika uelis nenkinextiskej; xnotsakan chika nemi nisiu de nemejuamej.
Achtoj noneki on yolpatlalistli
7 On xompayejyeua ma kaua on xkuajli ojtli; on yejuan xipan teita ma kaua on tlen xkuajli kinemilia. Xmokuepakan itech toTEKO, niman yejua mechiknelis. Xmokuepakan itech toDios pampa yejua yolyemanki niman tetlapojpoluiya."
8 Dios okijtoj: "Notlamachilis xijki ken nemotlamachilis, niman on tlen nejua nikchiua, nemejuamej xnenkichiuaj. 9 Ijkon kenon cielo onkaj más tlakpak de in tlaltikpaktli, no ijki on tlen niknemilia niman tlen nikchiua onkaj más tlakpak de on tlen nemejuamej nenkinemiliaj niman nenkichiuaj.
Itlajtol Dios kipiya poder
10 'On kiautli niman on nieve uajxini de ne tlakpak niman xok nokuepa, yej kipatsoua in tlajli niman kichiua ma tlaixua niman ma tlaitsmolini. Kemaj, kichiua para ma onya xinachtli yejuan kitôkaj, niman onkaj tlakuajli para tlakualo. 11 Niman on notlajtoltsin yejuan nikijtoua, no xsan ijki uajnokuepa notech, yej kichiua nochi tlinon niknauatia niman nochipa nechtlakamati.
12 'Nemejuamej nenkisaskej Babilonia ikan paktli, niman nenyaskej ikan yolseuilistli ipan nemopaís. On tepemej niman tepetsitsimej peuas nokuikatiskej ikan paktli ijkuak mechitaskej, niman nochi on kojtin nomatlaxkaloskej ikan miyek paktli. 13 Kampa onkatka tlakouitstli, noskaltiskej pinojkojtin; kampa onkatka tsitsikastli, onyaskej arrayaneskojtin. In tlinon nochiuas sanoyej kuajkis ueyilistli para itokatsin toTEKO. In nokauas ken sen señal yejuan xkaman popoliuis."