On iTekipanojkau toDios kimprometerouilia on israelitas ika kincuidaros (54.1 – 17)
Itetlajsojtlalis toTEKO para on israelitas
54
Isaías kijtoua: "Tejua ueyikalpan Jerusalén, tinemi ken sen siuatl yejuan xokimpix ikoneuan. Pero aman, chikauak xmokuikati ikan paktli pampa toTEKO kijtoua: 'On siuamej yejuan xueli kanaj inkonetsin, más kimpiyaskej inkoneuan xken on siuamej yejuan tlaskaltiaj.' Las mujeres que no pueden concebir hijos, tendrán más hijos que las mujeres que están criando.' 2 Más xkueyili mokajkal. Más xkueyikatili kampa tichanti. Xkinueueyakili on mekamej yejuan ika tiksasaloua on mokajkal niman kuajli xkintlatlalakti on estacas, 3 pampa tejua sanoyej tikonemiyekiyas, niman on mouejkakoneuan hasta xexelijtiaskej ipan nochi on motlal. On mouejkakoneuan kintlaniskej miyekkej naciones niman chantiskej impan on uejueyikalpanmej kampa aman tlaxoxotontok niman xakaj chanti. 4 Maka xmomojti, tejua xok tinemis ipan pinaualistli pampa xok tlamach mitsteneuiliskej. Yej tikelkauas on pinaualistli yejuan otikpix ijkuak más tikonetl katka. No ijki, xok tikelnamikis on ajmantli yejuan otikpix ijkuak otikaualtik, 5 pampa toTEKO yejuan omitsmakak nemilistli, aman ken yejua moueuentsin yes yejuan mitscuidaros. Yejua itoka, toTEKO yejuan nochi ueli kichiua. On Dios de Israel akin Yektli, yejuan Dios de nochi in tlaltikpaktli, yejua motemakixtijkau.6 'Tejua tikatka ken sen tesiuau yejuan konetl, yejuan sanoyej najmanaya pampa okajteu iueuentsin. Pero moDios oksejpa mitsnotsa, niman mitsijlia: 7 'Nejua onimitstlalkauij achijtsin tiempo, pero ikan noueyiteiknelilis oksejpa nimitsselis. 8 Ipan on achijtsin tiempo ijkuak onikualan mouan, xok niknekiya nimitsitas, pero kemaj, ikan on notetlajsojtlalis yejuan xkaman tlamis, sanoyej onimitsiknelij." Ijkin kijtoua toTEKO, yejuan motemanauijkau.
9 Dios ijkin okinmijlij on israelitas: "Ijkon ken oniktlajtolmakak Noé ijkuak oonyak on temojtij apachiuilistli, ika xokaman apachiuilos ipan nochi in tlaltikpaktli, no ijki ninotlajtolmaka aman, ika xokaman nikualanis nemouan, nion xokaman nemechcastigaros. 10 Maski on tepemej nejkuaniskej kampa onokej niman on tlamimiltin popoliuiskej, on notetlajsojtlalis yejuan nemechpiyalia xkaman nopatlas, nion popoliuis on nopacto de yoltlalilistli. Ijki nemechijlia, nejua nemoTEKO yejuan sanoyej nemechiknelia.
On yenkuik Jerusalén
11 '¡Sanoyej titlajyouis tejua ueyikalpan Jerusalén, yejuan sanoyej timajmana pampa sanoyej omitsxoxotonijkej niman xakaj mitsyoltlalia! Nejua oksejpa nimitschijchiuas ikan on temej yejuan más patiojkej, niman mocimientos nikinchijchiuas ikan on temej zafiros. 12 Motorres nikinchijchiuas ikan on temej rubíes, mouejueyitsakuijlouan nikintlalilis on temej berilo, niman nochi on motepanchinanuan nikinchijchiuas ikan on temej yejuan más patiojkej. 13 Nejua nikinmachtis nochimej on mokoneuan. Nochimej yejuamej sanoyej kuajli nemiskej. 14 On melajkachiualistli niman melajkanemilistli mitsyolchikauaskej, niman on motlauelikniuan xok tikinmakajsis niman xok mitstlankapiyaskej, yej moyolika tinemis. 15 Tla yakaj kinekis mitsuijsokis, xnejua niktitlanis, pero tejua tiktlanis san akinon yejuan kinekis mitsuijsokis.
16 'Xkita, nejua onikmakak nemilistli on teposchijchijketl yejuan kitlalia tlitl ipan on tlixochtli niman kinchijchiua sesentlamantikej teposmej. Niman no, nejua onikmakak nemilistli on soldado yejuan tlaxoxotonijtinemi. 17 Pero xakaj kichijchiua on arma yejuan uelis mitsmiktis tejua. Niman san akinon yejuan kinekis mitsteixpanuis, tejua uelis tikamatsakuas. In yejua nikinmaka on notekipanojkauan: tetlanilistli. ¡Nejua nemoTEKO ijki kijtoua!"