On iTekipanojkau toDios ouajlaj para otlajyouiko
53
Isaías kijtoua: "¿Akinon kineltoka on tlen yotiktemachistijkej? ¿Akinon yokitak ipoder toTEKO? 2 ToTEKO okinek para iTekipanojkau ma noskalti ken sen planta selik yejuan kuajli noneluayotia ipan tlajli uaki. Yejua xkualtsin tlajtlamatiya para ma tikpakaitakan. 3 Nochimej sanoyej okichichijkej niman xokiselijkej. Yejua sanoyej otlajyouij, ueyi tlajyouilistli okixmat. Nion achijtsin xotiknekej otikitakej, yej sanoyej otikichichijkej niman xotikixtlajsojtlakej.On iTekipanojkau toDios otlayouij impampa oksekimej
4 'Pero maski ijkon otikchiuilijkej, yejua sanoyej otlajyouij topampa; yejua okipix on nekokojli yejuan tejuamej tikpiyaskiaj. Tejuamej tiknemiliayaj ipampa yejua itlajtlakoluan tlajyouiyaya, pampa Dios ocastigaroj. 5 Pero yej okojkokojkej ipampa tejuamej totlajtlakoluan; okimajmailijkej ipampa toxompayejyeualis. On castigo yejuan ipan ouajlaj, otechajkuilij yolseuilistli, niman on nekokojli yejuan okipix, tejuamej ika otipajtikej.
6 'Tinochimej yotitopojpolojkaj ken borregos, cada se oyaj kampaka yejua okinek. Pero toTEKO okimamaltij on iTekipanojkau nochi on totlajtlakoluan de tinochimej.
7 'Maski yejua sanoyej ika onauiltijkej, yejua okinokauilij niman xitlaj okijtoj. Ken sen borreguito okuikakej kampa okimiktijkej, pero nion xitlaj okijtoj, nion xonauat ken sen borrego ijkuak kiximaj. 8 Okajsikej niman okuikakej maski xitlaj tlajtlakojli kipiyaya, niman xakaj okimanauij; nochimej san ompa okajkej. Okixtijkej de in tlaltikpaktli; okimiktijkej ipampa totlajtlakoluan. 9 Maski yejua xkaman otlajtlakoj niman xkaman otlakajkayau, okitlaltôkakej iminuan on tlakamej xompayejyeuamej niman okitlaltôkakej ipan itlalkon sen ricojtlakatl.
On iTekipanojkau toDios kiselis itlaxtaluil ipampa itlajyouilis
10 'ToTEKO yejua okinek okitlajyouiltij. Niman pampa yejua onouentlalij ipampa on tlajtlakojli, kipiyas ueyi nemilistli niman kintas iuejkakoneuan. Niman itechkopa yejua, nochi kuajli kisas on tlen toTEKO yokijtoj kichiuas. 11 Niman sakin, ijkuak kitas ika ipampa itlajyouilis ouajlaj tlen sanoyej kuajli, iyolika nokauas. Niman on iTekipanojkau toTEKO akin yolchipauak, miyekej kinmakixtis, pampa kinkixtilis on intlajtlakoluan. 12 Niman Dios okijtoj: "Yejua ika, niktlalis kampa nemij on yejuan tetlanij niman uejueyixtokej, pampa onotemakak para ma kimiktikan. Niman iuan okipojkej on tlajtlakolejkej pampa yejua okinomamaltij itlajtlakol miyek tlakatl, niman impampa okichiu oración para yejuamej otlapojpoluilok intlajtlakoluan."