52
Dios kijtoua: "¡Xtlacha Jerusalén, xtlacha! ¡Xmokuiteua niman xmokojtili! Tejua ueyikalpan Jerusalén akin tiyektli, xmotlakenti ikan motlaken yejuan más kualtetsin, pampa on yejuan xnechneltokaj, yejuan xchipajkej, xokaman oksejpa kalakiskej mopan tejua ueyikalpan. 2 ¡Xmokuiteua Jerusalén! Xmotsejtselouili on tlalteutli niman xmotlali ipan on trono. Tejua ichpokatl Jerusalén, yejuan omitsajsikej niman omitsuikakej ipan okse país, xmokixtili on teposcadenas yejuan ika tisalijtikaj."3 ToTEKO Dios, no ijkin kijtoua: "Pampa nejua xitlaj tomin onikselij ijkuak nemejuamej onemechtemakak ken esclavos, aman no xitlaj tomin niktemakas para oksejpa nemechnoyaxkatis. 4 Yeuejkaui, on notlapejpeniluan kimpiyayaj Egipto, niman ompa nemiyaj ken xchanejkej. Sakin, kej oualajkej on asirios niman okintlajyouiltijkej on notlapejpeniluan, maski on notlapejpeniluan xitlaj ika kimpajsolouayaj on asirios. 5 Niman aman, ¿tlinon nochijtikaj? Maski notlapejpeniluan xitlaj kitechiuiliayaj, aman ika onkaj kej kinuikaskej ken esclavos. 6 Pero yejkos on tonajli ijkuak on notlapejpeniluan nechixmatiskej, niman kimatiskej ika nejua yejuan onikiminnots, nejua niiminTEKO.”
7 Isaías kijtoua: "¡Sanoyej kualtsin nesi ijkuak sen tlakatl uajnejnemi ipan on tepetsitsimej para kuajtemachistis tlen kuajli, para kuajteijlis ika ye onyas yoltlalilistli niman manauilistli. Niman ijkin kijlia on ueyikalpan Jerusalén: 'MoDios yejua tlamandaroua ken Rey'! 8 ¡Xkaki! On mosoldadostlajpixkauan tsajtsij san se tipan ikan paktli de tetlanilistli, pampa kitaj ikan inmixtololojuan kenijki toTEKO oksejpa uajlau ne Jerusalén. 9 ¡Xtsajtsikan nochi tlen xoxotontok ne Jerusalén, pampa toTEKO yokinmiknelij itlapejpeniluan, yokimanauij Jerusalén! 10 ToTEKO kiteititis ipoder imixpan nochimej on naciones. Imanian in tlaltikpaktli machiyas ika toDios yotechmanauij. 11 ¡Xkisakan, xkisakan ne kampa nennemij esclavos! ¡Maka nenkimatokaskej itlaj tlen xchipauak niman xkisakan de ompa! ¡Xchipajkanemikan nemejuamej yejuan nenkiktij on tlajtlamach yejuan notekitiltia ipan iyektiopan toTEKO! 12 Pero maka nenmotlajtlaloskej ijkuak nenkisaskej, maka san nencholojteuaskej, pampa toTEKO, iDios Israel, yejua mechmanauis."
ITekipanojkau toDios tlajyouiya pero kiselia on tetlanilistli
13 Dios kijtoua: "On tlen kichiuas noTekipanojkau nochi kuajli kisas. Yejua, sanoyej kiueyiteneuaskej. 14 Miyekej okimojkaitakej ijkuak okitakej, pampa sanoyej xkuajli ken okauilijkej ixko, niman hasta xok ixmachyej katka ken sen tlaltikpaktlakatl. 15 Miyekej naciones no ijki kimojkaitaskej. Ijkuak on reyes kitaskej, hasta xok uelis tlajtoskej, pampa kitaskej niman kajsikamatiskej on tlinon xkaman kakiyaj."