On iTekipanojkau toDios kinyolchikaua on israelitas
51
ToTEKO kijtoua: "Xnechkakikan nochimej nemejuamej yejuan nenkinekij nennemiskej ikan yolmelajkilistli niman yejuan nennechtejtemouaj. Nemejuamej neniuejkakoneuan Abraham niman Sara. 2 Xtlanemilikan itech Abraham, nemouejkatataj, niman itech Sara, yejuan omechtlakatilij. Ijkuak nejua oniknots Abraham, xitlaj kipiyaya ikoneu, pero oniktiochiu niman onikmakak miyek iuejkakoneu.3 'Nejua oksejpa nikpaleuis on ueyikalpan Jerusalén yejuan okixoxotonijkej. Maski semi tlaxoxotontok, nikauas ken sen kualtsin xochitlan, kenon xochitlan yejuan onkatka ne Edén. Ompa onyas pakilistli niman pakanemilistli, tlatsotsonaskej niman kinokuikatiskej kuikamej yejuan ika nechueyiteneuaskej.
4 'Xnechkakikan nemejuamej notlapejpeniluan; xnechkaki Israel. Nejua nikchayauas notlanauatiluan yejuan kintlauiluis on naciones. 5 On notetlanilis nisiu onkaj; on notemakixtilis ye uajlajtikaj. Ikan nopoder, nikinmandaros on naciones. On chanejkej imanian itempan mar, nechchaj ma nikinmakixti; yejuamej kitlaliaj inyojlo ipan nopoder.
6 'Xontlachakan tlakpak ipan cielo, niman no xontlachakan ipan on tlaltikpaktli. On cielo popoliuis ken itlaj poktli, on tlaltikpaktli ijsoliuis ken sen tlakentli, niman on tlaltikpaktlakamej yejuan ompa chantij, mikiskej ken mikij on sayolimej. Pero on notemakixtilis yes para nochipa, niman on noyolmelajkilis xkaman tlamis.
7 'Xnechkakikan nemejuamej yejuan nenkimatstokej tlen melajki niman nenkitlakamatij notlanauatiluan. Maka xmomojtikan tla oksekimej tlamach mechteneuiliaj, niman maka xmajmanakan tla mechuijuikaltiaj, 8 pampa on yejuan ijkon mechchiuiliaj, popoliuiskej kenon tlakentli yejuan ijsoliui, niman tlamiskej kenon tela de lana yejuan kikuaj kuijlimej. Pero on noyolmelajkilis xkaman tlamis, niman on notemakixtilis yes para nochipa.”
9 On israelitas ijkin chikauak noueyikatsajtsiliaj: "¡Xtlacha toTEKO! Xtekitilti mopoder ken yeuejkaui otikchiu ijkuak otikinmiktij on egipcios. Tejua otikmiktij Rahab, on temojtij yolki yejuan nemi ijtik on mar. 10 Otikuats on mar yejuan sanoyej uejkatlan, niman ompa otiktlalij sen ojtli para ompa onojuitijkej mokoneuan yejuan otikinkixtij Egipto. 11 Niman on yejuan tikinmanauis, no ijki uajnokuepaskej, uajtsajtsitiaskej ikan paktli ijkuak kalakiskej ne Jerusalén. Yejuamej nochipa kipiyaskej paktli, niman nochi on chokistli niman tlen tekokoj nochi popoliuis."
12 Dios kijtoua: "Nejua, sano nejua nemechyolchikaua. ¿Akinonmej nenkinmakajsij? ¿Nenkinmakajsij on tlaltikpaktlakamej? On tlaltikpaktlakamej iminnemilis semi kenon xojtli yejuan san uajpilini. 13 ¿Tlen yonennechelkajkej nejua nemoTEKO yejuan onemechmakak nemilistli niman yejuan oniktlalij on cielo niman on tlaltikpaktli? ¿Nochipa nenmomojtijtiaskej pampa on nemotlauelikniuan kinekij mechmiktiskej? Nixpan nejua, on intlauel popoliui. 14 On yejuan okinmajsijkej, saniman nomanauiskej. Yejuamej xmikiskej ipan cárcel nion xkimpolos tlen kikuaskej.
15 'Nejua ninemoTEKO Dios yejuan nikchiua para chikauak ma kakisti on mar ijkuak chikauak koxoni. Nejua notoka, Dios yejuan nochi ueli kichiua. 16 Nejua oniktlalij on cielo niman on tlaltikpaktli. Nejua nemechmaka on tlajtoltin yejuan nenkijtouaj, niman nejua nemechpiya ipan nomatsin para nemechcuidaroua. Nejua onikinmijlij on israelitas: 'Nemejuamej nennotlapejpeniluan.’ ”
On iTekipanojkau toDios kinmanauiya itlapejpeniluan
17 Isaías kijtoua: "¡Xtlacha Jerusalén, xtlacha niman xmokuiteua! Tejua omitscastigaroj toTEKO ken ijkuak sen tlakatl koni vino, niman koni hasta kampa kitlamiya, niman hasta kampa tlauani. 18 De nochimej on mokoneuan yejuan otikimpix, xakaj ueli mitsyekana. De nochimej on mokoneuan yejuan otikinmiskaltij, xakaj ueli mitsmayana. 19 In ome ueyicastigo mopan ouajlaj: ipan mopaís otlaxoxotonijkej niman otlachtekej, niman mochanejkauan omikej ikan apistli niman ikan guerra. Niman aman, ¿akinon mitsiknelis niman akinon mitsyoltlalis? 20 Mokoneuan xok kojtikej, pampa okinmajsikej kenon masamej yejuan okintlatlalilijkej. Yejuamej xintokej tlakokoltin ipan calles pampa toTEKO Dios sanoyej okualan niman okincastigaroj. 21 Pero aman, nemejuamej ichanekauan Jerusalén yejuan sanoyej nentlajyouiyaj niman nentlauankej maski xnenkonij vino, xkakikan tlinon nemechijlia: 22 NemoTEKO niman nemoDios, yejuan kinmanauiya itlapejpeniluan, ijkin kijtoua: 'Nemechkixtilis on tlajyouilistli yejuan nenkipiyaj, niman xokaman nemechcastigaros. 23 Yej, nikintlajyouiltis on yejuan omechtlajyouiltijkej, yejuan omechijlijkej: 'Xmotekakan ipan tlajli, para nemopan ticholoskej.' Niman nemejuamej onenkintlakamatkej, niman nemopan ocholojkej ken kicholouaj on tlajli.”