50
ToTEKO kijtoua: “Maka xnemilikan tla nejua oniktlalkauij on nación Israel, yejuan nemonanaj, ken sen tlakatl kitlalkauiya isiuau. Noso maka xnemiliaj onemechnemakak ken esclavos pampa nikteuikiliaya. Nemejuamej onemechnemakak, pampa onentlajtlakojkej. On nación Israel, yejuan ken nemonanaj, oniktlalkauij pampa nemejuamej xipan onennechitakej. 2 ¿Tline ijkuak oniuajlaj para nemechmakixtis, xakaj oniknextij? ¿Tline ijkuak onemechnots, xakaj onechnankilij? ¿Tlen nenkinemiliayaj, nejua xniuelis nemechmanauis? ¿Nenkinemiliayaj xniuelis nemechpaleuis para ma mechmakauakan? Nejua uelis san nitlanauatis para on mar niman on ayajtokmej ma uakikan, para on michimej ma mikikan niman ma palanikan pampa xitlaj atl. 3 Nejua, nikchiua para ixko on cielo ma tlayouatia, para nesi ken notlakentiskia ikan ajmankatlakentli.”On iTekipanojkau toTEKO noneki kitlakaitaskej niman kitlakamatiskej
4 On Tekipanojketl ijkin kijtoua: "ToTEKO yonechmakak tlamatkilistli para uelis nikinyoltlalis on yejuan najmanaj niman yejuan siautokej. Cada kualkan nechpaleuiya para ma nikaki on tlen nechmachtia. 5 ToTEKO yonechmakak kajsikamatilistli, niman nejua niktlakamati niman nikchiua tlen nechnauatia. 6 Nejua oniktemakak notlakayotsin para ma nechuijuitekikan, niman oniknokauilij ma nechtentsonuiuitlakan. Nejua xoninixtlapachoj ijkuak tlamach nechteneuiliayaj niman nechchijchayaj. 7 Pampa noTEKO yejua nechpaleuiya, xnechajmana tla tlamach nechteneuiliaj. Yejua ika, nejua ninemi ken sen ueyitetl yejuan kojtitikaj, pampa nikmati ika nejua xkaman ninopinajtis. 8 Notech nemi notemanauijkau. ¿Nemi yakaj yejuan nechtlauelita? ¡Ma nechuika itech sen juez! ¿Nemi yakaj yejuan kineki nechteixpanuis? ¡Ma uajla niman ma nechijliki! 9 ¡NoTEKO yejua nechpaleuiya. Yejua ika, ¿akinon uelis nechtlajtlakolmakas? Nochimej on notlauelikniuan popoliuiskej ken sen tlakentli yejuan tlakuanyoua.
10 'Nemejuamej yejuan nenkitlakaitaj toTEKO niman nenkakij ken mechnotsa iTekipanojkau, tla nenkistinemij kampa tlayouatok, kampa nion achijtsin xtlauilpan, xtlalikan nemoyojlo itech toTEKO, niman xmoyolchikauakan itech nemoDios. 11 Pero nemejuamej yejuan xnenkinekij nenkitlakamatiskej toTEKO niman xnenkistinemij ipan itlauil Dios, yej san nenkistinemij ipan nemejuamej nemotlauil, saniman nentlatlaskej ikan on tlitl yejuan ika nenmotlauiluiyaj.