ITekipanojkau toTEKO kinnotsas on naciones
49
ITekipanojkau toTEKO, ijkin okijtoj: "Xnechkakikan nemochimej chanejkej imanian itempan mar. Xnechkakikan yejuan uejka nennemij ipan on naciones. ToTEKO onechnots antes nitlakatis. Onechtokayotij ijkuak sanken ninemiya ijtik nonanaj. 2 Yejua okichiu para notlajtol de tlajtlakolmakalistli ma kipiya poder ken itlaj espada yejuan sanoyej tlateki, niman onechiyan ipan imatsin. Onechkuep ken itlaj tlaminajli yejuan sanoyej yakapitstik, niman sanoyej kuajli onechcuidaroj. 3 Onechijlij: 'Israel, tejua tinotekipanojkau; motechkopa nikteititis noueyilis.' 4 Niman nejua yej niknemiliaya: 'Sanenkaj yonitekit, sanenkaj yonisiau.' Pero nochi tlinon nikchiua, niktlalia ipan imauan toTEKO, niman Dios yejua nechmakas notlaxtlauil. 5 On yejuan okichiu ma ninochiua ijtik nonanaj para niitekipanijkau yes, onechtlalij para oksejpa itech ma nikinuajuika on israelitas, iuejkakoneuan Jacob. Yejua onechmakak tlakaitalistli niman onechmakak chikaualistli.6 NoTEKO ijkin onechijlij: "Tejua xsan tinoTekipanojkau yes, niman xsan tikinsentlalis on israelitas yejuan sanken nemij; yej no nikchiuas para tinemis ken sen tlauijli imimpan on naciones, para tikiktis notemakixtilis hasta kampa ontlami on tlaltikpaktli."
7 On toTEKO, toTemakixtijkau, akin iDios Israel niman akin Yektli, ijkin kinmijlia itlapejpeniluan yejuan sanoyej kintlauelitaj, yejuan xkiminnekij impan oksekimej naciones, yejuan esclavos intech on reyes yejuan sanoyej tetlajyouiltiaj: "Ijkuak on reyes niman inkoneuan mechitaskej, notelketsaskej para mechtlakaitaskej ijkuak nempanoskej intech, niman notlakuantelketsaskej nemixpan. In nochiuas pampa nejua yejuan nemoTEKO akin niiDios Israel niman akin niYektli, onemechtlapejpenij niman nochipa nicumpliroua notlajtolmakalisuan."
ITekipanojkau toTEKO kijtoua ika oksejpa kuektlalis Jerusalén
8 Dios no okinmijlij on israelitas: "Ijkuak nejua niknekis nemechnankilis ipan nemoueyikatsajtsilis, nemechnankilis. Ijkuak nenmomanauiskej intech on yejuan mechtlajyouiltiaj, nejua nemechpaleuis. Nejua nemechcuidaros, niman nemotechkopa nikchiuas sen pacto iminuan oksekimej naciones. Yejua ika, nemejuamej oksejpa nemechuikas ipan nemopaís para ompa nenchantiskej, niman on tlaltin yejuan onenkajtejkej, oksejpa nenmoyaxka yes. 9 Niman on yejuan okinmajsikej para okinuikakej Babilonia nikinmijlis: '¡Xkisakan ne Babilonia, niman xmokuepakan ipan nemopaís!' Niman on yejuan okintsakukej kampa tlayouatok nikinmijlis: '¡Xuajkisakan niman xkalakikan kampa tlauilpan!' Ijkuak ijkon nochiuas, nemejuamej nenyeskej kenon borregos yejuan kinextiskej miyek sakatl kampa tlakuajkuaskej; niman no, kinextiskej miyek sakatl ipan on tepetsitsimej kampa xkaman itlaj xojtli onkatka. 10 Yejuamej xkipiyaskej apistli nion amiktli, nion tonalmikiskej, nion tlatlaskej ikan on tonaltsintli, pampa nejua sanoyej nikintlajsojtla niman nikinyekana, niman nikinuikas kampa onokej ameyaltin. 11 Nejua nikintlapouilis sen ojtli ipan on tepemej, niman kampa tlauejuejkatlan nikintlaixmanilis. 12 Xkitakan, miyekej uejka youalejkej. Sekimej oualejkej kampaka norte, sekimej kampaka ikalakiyan tonaltsintli, niman oksekimej kampaka sur ipan iueyitlalpan Sinim.
13 '¡Cielo, xtsajtsi ikan paktli! ¡Tlaltikpaktli, xpaki sanoyej! ¡Tepemej, sanoyej xpakatsajtsikan! Ijkon xchiuakan pampa nejua nemoTEKO yonikinyoltlalij on notlapejpeniluan, yonikinmiknelij ipan intlajyouilis."
14 Pero on ueyikalpan Jerusalén kijtouaya: "ToTEKO yonechtlalkauij, noDios yonechelkau".
15 Niman toTEKO ijkin yokinankilij: "¿Ueli sen nantli kelkaua ikoneu? noso ¿ueli xok kitlajsojtla? Kas sen nantli ueli kelkaua ikoneu, pero nejua ka, xnimitselkauas. 16 Motoka tlajkuilolnestikaj ipan nomauan, niman on motepanchinanuan nochipa nikpiya ipan notlamachilis. 17 Pero saniman uajlaskej on yejuan oksejpa kichijchiuaskej motepanchinanuan, niman kintotokaskej on yejuan omitsxoxotonijkej niman sanoyej otlaxixinijtejkej. 18 Xontlacha moyeualkan niman xkita; xkita ken miyekej yonosentlalijkej niman ye uajlajtokej. Nejua nemoTEKO, ninotlajtolmaka sano ika notokatsin, ika nochimej yejuamej yeskej kenon mokualnesyouan yejuan tikinmotlaliltis, ken ikualnesyouan sen novia.
19 'Ipan mopaís sanoyej tlaxoxotonkan, sanoyej otlaxixinijtejkej. Pero on yejuan otlaxoxotonijkej, yoyajkej. Niman aman on israelitas yejuan uajchantiskej ipan motlal, hasta xonakiskej, pampa sanoyej tojlamej. 20 On mokoneuan yejuan tikuitiaya yotikimpolojka ijkin mitsijliskej monakasko: ‘Ipan in país semi xtonakij pampa xtlaueyi. Xtechmaka kanon tichantiskej.’ 21 Niman tejua san mojtikopa tikijtos: ‘¿Akinon onechiminmakak nochimej in nokoneuan? Nejua xnikimpiyaya nokoneuan, nion xniueliya nikimpiya; noselti ninemiya ipan okse país kampa onechuikakaj. ¿Akinon okinmiskaltij? Nejua noselti yonechkajkaj. ¿Kanon oualejkej?’ ”
22 ToTEKO ijkin kijtoua: “Nejua nikinnauatis on naciones yejuan xnechneltokaj para ma mitsinuajuikilikan on mokoneuan, tlakamej niman siuamej, ken ijkuak kinuajmayanaj kokonej. 23 On reyes mechtekipanoskej, niman on inmichpochuan kinkuidaroskej nemokoneuan. Nemixpan nopachoskej hasta ipan tlajli, hasta kipajpaloskej on tlalteutli yejuan onkaj ipan nemokxiuan. Ijkuakon tej, nenkijtoskej ika nejua melauak ninemoTEKO, niman on yejuan notech kitlaliaj inyojlo, xkaman pinauaskej.
24 '¿Uelis sen soldado kuiliskej on tlen okitekuilij ipan guerra? ¿Noso uelis sen rey yejuan xompayejyeua niman sanoyej tetlajyouiltia, kinkuiliskej on yejuan okinmajsik ipan guerra? Nesi ika ka. 25 Pero nejua nemoTEKO nikijtoua ika kemaj. On soldado kuiliskej on tlen okitekuilij ipan guerra, niman on rey yejuan xompayejyeua niman sanoyej tetlajyouiltia, kinkuiliskej on yejuan okinmajsik ipan guerra. Sano nejua nikinmixnamikis on yejuan mechuijsokiskej, niman mokoneuan nikinmanauis. 26 On yejuan mechtlajyouiltiaj, nikchiuas para sano yejuamej ma nomiktikan, niman ma tlauanikan sano ika iminyesyo ken koniskiaj vino. Ijki, nochimej on tlaltikpaktlakamej kimatiskej ika nejua nemoTEKO, ninemotemanauijkau. Yejuamej kimatiskej ika nejua akin niiDios Jacob, yejuan nochi ueli nikchiua, ninemotemakixtijkau."