On israelitas kitlalkauiyaj Dios chika nemiyaj ken esclavos ipan okse país
48
Isaías okijtoj: “Xkakikan tlinon nemechijlis, nemejuamej iuejkakoneuan Jacob, yejuan nenisraelitas niman nenteuejkakoneuan itech Judá. Nemejuamej nenmotlajtolmakaj ikan itokatsin nemoTEKO niman nenkiueyikatsajtsiliaj on iDios Israel, pero xnenkichiuaj ikan nemoyojlo niman ken kitocarorua. 2 Nemejuamej sanoyej nenmoueyiteneuaj pampa nenchantij ipan on yektli ueyikalpan Jerusalén, niman pampa mechpaleuiya yejua akin iDios Israel, yejuan itoka, Dios Yejuan Nochi Ueli Kichiua."3 Pero Dios kijtoua: "Nejua desde yeuejkaui onemechmachistij ika nochiuaskia on tlen yonochiu. Niman ijki ken onikijtoj nochiuas, melauak ijki onochiu. 4 Nejua nikmatstikaj ika nemejuamej sanoyej nentsontekonchikajkej kenon tepostli niman xnenkinekij nemokneliskej. 5 Yejua ika, desde yeuejkaui onemechijlij ika nochiuas on tlen yonochiu, para ijkon xnenkijtoskej nemodios noso nemoídolo yokichiu. 6 Nemejuamej yonenkakaj nochi in, niman aman yonenkitakej. Xuelis nenkijtoskej tla xnejli. Aman tej, nemechmachistis tlajtlamach tlen yenkuik, tlen iyantikaj yejuan xe nenkimatiyaj. 7 On tlen yenkuik nemechmachistis, xe kaman nemechijliaya niman xe kaman nenkakiyaj. Hasta aman nemechijlis para ijkon xnenkijtoskej ye nenkimatstikatkaj. 8 Nemejuamej xe kaman nenkakiyaj, nion xnenkimatiyaj, pampa ken nentsatsamej. Nejua nikmati ika xsan se nemoyojlo nenkipiyaj, niman nikmati ika sanoyej nenyoltechikajkej desde onentlakatkej.
9 'Pero ijki onemechijyouij para nochimej kimatiskej ika kuajli noyojlo, niman nechtlakaitaskej. Yejua ika xonemechmiktij. 10 Nejua onemechchipau de on nemotlajtlakoluan, pero xken kichipauaj on plata, yej onemechchipau ikan tlajyouilistli, ken nemechpanoltiskia ipan horno. 11 Pampa notlakaitalis, ipampa notlakaitalis onikchiu, pampa nochipa noneki nikselis tlakaitalistli. Nejua xniktekauilis yakaj okse ma kiseli ueyilistli, yej san nejua nikselis."
(ToTEKO kinmanauis on itlapejpeniluan)
12 ToTEKO kijtoua: “Xnechkakikan nemejuamej israelitas, iuejkakoneuan Jacob, yejuan onemechtlapejpenij. Nejua, san nejua niDios. Nejua nochipa oninen niman nochipa ninemis. 13 Ikan nomauan oniktlalij on tlaltikpaktli niman otikpatlau on cielo. Ijkuak san onikintokayotij, opeu nonextiaj. 14 Xmosentlalikan nochimej nemejuamej niman xnechkakikan: '¿Katlejua de nemoídolos yomechmachistijka in tlen nochiuas, ika on rey Ciro yejuan nejua yoniktlapejpenij yejua kichiuas on tlen yonikijtoj nikchiuilis on ueyikalpan Babilonia niman ichanejkauan?' 15 ¡Xakaj mechijliaya! Yej san nejua onikijtoj. Nejua oniknots niman onikuajuikak, niman nochi tlinon kichiuas, kuajli kisas. 16 Xmonisiuikan notech niman xnechkakikan. Desde yeuejkaui, nejua xkaman san onichtakatlajtoj; yej onikchipajkaijtoj on tlen nochiuas."
Niman Isaías okijtoj: "Niman aman, toTEKO Dios iuan iespíritu, yejuamej onechajtitlankej para ma nikteijli in tlajtojli. 17 On Dios de Israel akin Yektli, yejuan intemakixtijkau on israelitas, ijkin kijtoua: 'Nejua ninemoTEKO Dios. Nejua nemechititia tlen kuajli para nemejuamej; nemechyekana ipan on ojtli yejuan noneki nenkinejnemiskej. 18 Tla nemejuamej nenkitlakamatiskiaj notlanauatiluan, sanoyej kuajli nennemiskiaj kenon ayajtok yejuan xkaman uaki, yejuan yej noskaltijtiu, niman nemomelajkanemilis, kojtik yeskia kenon iakoxonajlo on mar. 19 On nemouejkakoneuan sanoyej miyekej yeskiaj, hasta xok ueliskia kimpouaskiaj, kenon xajli yejuan onkaj ipan mar. Nejua xkaman nikinmiktiskia.' "
20 Kemaj Isaías okinmijlij on israelitas: "Aman tej, ¡xkisakan de Babilonia, xkintlalkauikan on babilonios! Xteijlikan ikan miyek paktli in tlen toTEKO yokichiu nemopampa, niman xtemachistikan imanian on tlaltikpaktli. Xkijtokan: 'ToTEKO yotechmanauij tejuamej yejuan tiisraelitas, yejuan tiitekipanojkauan.' 21 Maski toTEKO omechuikak ipan on xalpatlajkan, xonenamikej, pampa yejua okichiu para ma kisa ueyi atl ipan on ueyi tetl. 22 Pero on xkuajkualtin tlakamej, uej xkaman kipiyaskej yolseuilistli. ToTEKO yejua ijki kijtoua."