Sen kuikatl de icastigo Babilonia (47.1 - 15)
On achtoj estrofa
47
ToTEKO kijtoua: “Tejua ueyikalpan Babilonia, yejuan ken tisen ichpochtli yejuan xe kipiya iueuentsin, xuajtemo niman xmotlali ipan on tlalkuechtli yejuan onkaj ipan tlajli. Xuajtemo de ne kampa titlamandaroua, tejua ichpokatl Babilonia, niman xmotlali ipan tlajli, pampa xokaman mitstokayotiskej 'kualtetsin niman maluijli'. 2 Aman tej, xkui momolino niman xkuecho monextamal. Xmokixtili on movelo yejuan ika timixtlapachoua niman xkajkokui mokue para xkintsotsolo mokxiuan, pampa aman tinejnemis para tikimpanos on ríos. 3 On motlalnakayo nochi tsotsoliuis, niman on mopinaualis nochimej kitaskej. Nejua nimitscastigaros, niman xakaj uelis nechteltis maski nechiknotlajtlanilis.”4 On toTemakixtijkau, iDios Israel, akin Yektli, yejuan itoka on Dios yejuan Nochi Ueli Kichiua, ijkin kijtoua:
On ika ome estrofa
5 "Tejua ichpokatl Babilonia, xuiya kampa tlayouatok, xmotlali niman maka xnauati, pampa xokaman mitstokayotiskej ‘reina de on naciones.’ 6 Ijkuak onikualan iminuan on israelitas, onikintlauelkau maski yejuamej notlapejpeniluan, niman onikintemaktilij tejua motech. Pero tejua xotikinmiknelij, yej nochimej hasta teuan on ueuentsitsimej, sanoyej otikinchikajkatekitiltij. 7 Otikijtoj: ‘Nejua nochipa nitlamandaros.’ Pero nion xotikixtlaloj ijkuak ijkon otitlajtoj, nion xotiknemilij kenijki tontlamis.
On ika yeyi estrofa
8 'Yejua ika, aman xkaki tlinon nimitsijlis, tejua ueyikalpan Babilonia yejuan ken tisen siuatl yejuan sanoyej kuelita nopaktia ikan nochi on tlen xkuajli. Tejua moyolika tinemi kampa titlamandaroua, niman mojtikopa tikijtoua: ‘Nejua, san nejua más niueyixtikaj, niman nejua xkaman nikaualtis, nion xnikimpolos nokoneuan.’ 9 Pero in ometipan, amanaman mopan nochiuas san ipan se tonajli: tejua tikaualtis niman tikimpolos mokoneuan maski tejua miyek naualyotl ueli tikchiua. 10 Tejua tikuitiaya xitlaj mopan nochiuas maski sanoyej tixompayejyeua; tikuitiaya xakaj mitsita. On motlamatkilis niman motlaixmatkilis omitsixkajkayajkej. Mojtikopa tikijtouaya: ‘Nejua, san nejua más niueyixtikaj.’ 11 Pero uajlas mopan tlen sanoyej xkuajli, niman xuelis tikteltis nion ikan monaualyo. Yejkos mopan tlen temojtij, yejuan tejua xuelis tikejkuanis. On tlajyouilistli san isijkapan yejkos mopan, nion xtikchixtias. 12 Sanken xchiua tej, miyek naualyotl yejuan yotikuajchijtiaj desde tikonetl. Tikitaskej tla uelis mitspaleuiskej; tikitaskej tla uelis inka tikinmomojtis on motlauelikniuan.
On sa ika nochi estrofa
13 'Tejua sanoyej tikimpiya yejuan mitstlakanonotsaj, hasta mitsyolajxitiaj. ¡Ma uajlakan tej, on yejuan kintaj on sitlalimej niman cada metstli mitsijliaj tlinon mopan nochiuas, niman yejuamej ma mitsmanauikan! 14 Pero yejuamej tlatlaskej kenon sakatl yejuan amanaman tlatla, niman xuelis nomanauiskej de on tlitl. Ijkon impan nochiuas pampa on tlitl kampa tlatlaskej, xsan yejua on tlitl yejuan ipan tlakxitiaj noso yejuan ika noskouaj. 15 Nochimej on nanaualtin yejuan mitstlakanonotsayaj, yejuan tejua ipan nochi monemilis iminuan otikmat, xuelis mitspaleuiskej más. Cada se de yejuamej oyaj ipan on xkuajli ojtli, niman aman, xnemi akinon mitsmanauis."