Inyoltlalil on israelitas ipampa ixoxotonilis Babilonia (46.1 – 48.22)
On xnejli dioses de Babilonia
46
Isaías kijtoua: "On dios Bel, ixakamani, niman on dios Nebo, uetsi ipan tlajli. Yejuamej in dioses kinuikaj impan yolkej, niman on yolkej sanoyej siauij pampa on dioses sanoyej yetikej. 2 On dioses kuelpachiuij niman uetsij ipan tlajli, niman kinuikaj ipan okse país pampa xuelij nonamauiyaj."3 Dios kijtoua: "Xnechkakikan nochimej nemejuamej israelitas, iuejkakoneuan Jacob, yejuan sanken nennemij. Nejua yonemechcuidaroj desde ijkuak xe nentlakatiyaj; onemechpaleuij desde ijkuak nennemiyaj ijtik nemonanaj. 4 Niman sanken ijki nemechpaleuis hasta ijkuak nenueuentsitsimej yeskej. Ijkuak nenkipiyaskej nemokuaistal, sanken nemopan nitlachas. Nejua onemechmakak nemilistli, niman sanken nemechpaleuis. Nejua nemechcuidaros niman nemechmakixtis.
5 '¡Akinon nenkijtoskej no ijki ken nejua? ¡Ken akinon nenkinemiliaj nitlajtlacha? 6 Sekimej kipiyaj miyek oro ipan imimbolsas, niman kitemachiuaj plata ipan on tlatemachiuajli. Kemaj kinauatiaj sen tlamachijchijketl para ma kinchijchiuilikan sen dios yejuan ixpan notlakuantelketsaskej niman kimauistiliskej. 7 Niman on imindios kechpanojtiuij ijkuak kuikaj. Niman kampa kitlaliaj ompa nokaua pampa xueli nolinia. Maski sanoyej itech noueyikatsajtsiliaj, yejua xkiminnankilia, nion xueli kiminmanauiya ipan imintlajyouilis.
8 'Nemejuamej tlajtlakolejkej, maka xkelkauakan nochi in tlen onikchiu; nochipa xpiyakan ipan nemotlamachilis niman kuajli xtlanemilikan. 9 Xkelnamikikan, nochi nejua yonikchiu desde yeuejkaui, pampa nejua niDios, niman xnemi okse. Nejua niDios, niman xnemi okse yejuan no ijki ken nejua. 10 Nejua desde antes niktemachistia tlinon nochiuas; nikijtoua tlinon nochiuas sakin. Nejua nikijtoua: Nochi tlinon yonikijtoj nikchiuas, nicumpliros. Nejua nikchiuas nochi tlinon yonikijtoj. 11 Yoniknots sen tlakatl yejuan ualeuas kampaka ikisayan tonaltsintli. Yejua uejka ualeuas kenon tototl itoka kuaktli, niman kichiuas tlinon nejua yoniknemilij nikchiuas. On tlen yoniknemilij nikchiuas, ijki nochiuas; ika onkaj nocumpliros tlinon yonikijtoj. 12 Xnechkakikan nemejuamej yoltechikajkej yejuan nenkinemiliaj sanoyej uejkauis para nemechmanauis. 13 Nejua xok uejkajtika ika nemechmanauis; nemechmanauis más saniman. Nejua nikmanauis Jerusalén, niman niktlalis notetlakaitalis imimpan on israelitas."