Yoltlalijli pampa toTEKO kitlalia on rey Ciro para ma kitekipano
ToTEKO okichiu para Ciro okalak rey de Persia
45
Isaías okijtoj: "ToTEKO okichiu para Ciro okalak rey ne Persia, niman okipaleuij para ma kintlani on reyes niman on naciones. Niman no, okichiu ma tlapouikan iueyitsakuijlouan on uejueyikalpanmej yejuan okinuijsok, niman xakaj ouel okitlatsakuilij. Ijki onochiu pampa toTEKO ijkin okijlij on rey Ciro: 2 'Nejua niyakatstias kampaka tias, niman nitlaixmantias kampaka tipanos. Nikintlajkalis on uejueyitsakuijlomej de bronce niman nikimpojpostekis on tepostrancas yejuan ika tlatsakuaj. 3 Nejua nimitsmakas nochi tlen patioj yejuan iyantikaj. Nimitsmakas riquezas yejuan yejtokej kampa xakaj kimati. Ijkon tej, tikmatis ika nejua niDios, niiminTEKO on israelitas, yejuan nimitsnotsa ikan motoka. 4 Pampa sanoyej nikintlajsojtla on notlapejpeniluan israelitas, iuejkakoneuan Jacob, yejuan notekipanojkauan, nejua nimitsnotsa ikan motoka, niman onimitstlalij para xueyixtia maski tejua xtinechixmati. 5 Nejua niDios, niman xnemi okse; xnemi okse dios, yej san nejua niDios. Maski tejua xtinechixmati, nejua onimitsprepararoj para xtetlani. 6 Ijkon yonikchiu, para nochimej on yejuan nemij desde kampaka ikisayan tonaltsintli hasta kampaka ikalakiyan, ma kimatikan ika xnemi okse dios, yej san nejua niDios. Nejua niiminTEKO niman xnemi okse. 7 Nejua nikchiua ma onya tlauijli niman nikchiua ma onya tlayouajlotl; nikchiua para nochi kuajli ma onya, niman nikchiua para itlaj xkuajli ma nochiua. Nejua nemoTEKO nikchiua nochi in.' "Dios yejua kipiya nochi poder
8 Dios no okijtoj: "Nejua, desde ne iluikak nimitsajtitlanilis tetlanilistli, ken nikuajtitlani ajuichtli desde ipan cielo niman kiautli desde ipan on moxtli, niman in tlaltikpaktli kiselia. Niman ipan in tlaltikpaktli onyas temakixtilistli niman melajkachiualistli.
9 'Sen kontli de tlalajmojli yejuan no ijki tlachijchijtli ken oksekimej kontin, xpeua kijlia on konchijchijketl tla xkuelita ika okichijchiu. On sokitl xkijlia: '¿Tlinon tikchijchiua?', nion on kontli kijlia on yejuan okichijchiu: 'Tejua xitlaj ueli tikchijchiua.' 10 No ijki, sanoyej xkuajli tla sen tekoneu kinmijlia itajuan: '¿Tline onennechtlakatilijkej?' "
11 Niman toTEKO, akin iDios Israel niman akin Yektli, yejuan okinmakak nemilistli on israelitas, ijkin kijtoua: "¿Tlen nemejuamej nennechijliskej tla kuajli noso xkuajli nemij nokoneuan, noso nemejuamej nennechtlatlajtlaliliskej tlinon nikchiuas? 12 Nejua onikchijchiu on tlaltikpaktli iminuan on tlaltikpaktlakamej yejuan ompa chantij. Onikpatlau on cielo ikan nomauan, niman onikinnauatij nochimej on sitlalimej ma nonextikan. 13 Nejua onikchiu para on rey Ciro ma tetlani, niman aman nikpaleuis ipan nochi tlen kichiuas. Yejua oksejpa kichijchiuas noueyikalpan, niman notlapejpeniluan oksejpa kinkauilis ma nokuepakan ipan impaís, san ijki, xikan itlaj tlaxtlauijli. Nejua nemoTEKO, akin nochi ueli kichiua, nejua nikijtoua ika ijki nochiuas."
14 ToTEKO ijkin kinmijlia on israelitas: “On tekitkej de Egipto, on tlanamakakej de Etiopía, niman on chanejkej ne Sabá yejuan uejueyitlakamej, nemotech notemakaskej niman nemoesclavos yeskej. Yejuamej nokneliskej nemixpan niman mechijliskej: ‘Melauak Dios nemi nemouan. Xnemi okse dios yejuan melauak, yej san yejua Dios.’ ”
15 Isaías okijtoj: "Melauak tej, tejua titoDios yejuan xueli timitsitaj; tejua tiiDios Israel niman tiitemakixtijkau.
16 'Nochimej on yejuan kinchijchiuaj ídolos, sanoyej nopinajtiskej, inka uetskaskej niman tlamach kinteneuiliskej. 17 Pero on israelitas kinmakixtis toTEKO, niman kinmakixtis para nochipa. Yejuamej xkaman nopinajtiskej niman xkaman inka uetskaskej.
18 'On toTEKO Dios yejuan okichijchiu on cielo, yejuan okichijchiu in tlaltikpaktli, niman kuajli okitlalij xpara san ijki onyas, yej para ipan ma chantikan on tlaltikpaktlakamej, ijkin kijtoua: 'Nejua ninemoTEKO niman xnemi okse dios. 19 Nejua xnitlajtoua san ichtaka, niman ipan on tlaltikpaktli xnitlajtoua kampa tlayouatok. Nejua, on iuejkakoneuan Jacob, xnikinmijlia: Maski nennechtejtemoskej xnennechnextiskej. Nejua akin ninemoTEKO, nikijtoua tlen melauak niman tlen melajki.
ToTEKO kijtoua ika on ídolos xueli tepaleuiyaj
20 'Nochimej nemejuamej yejuan nennemij ipan on naciones, yejuan xomechmiktijkej, xmosentlalikan niman xuajlakan. Sanoyej tontos on yejuan kajantinemij iminídolo de kojtli niman noueyikatsajtsiliaj itech sen ídolo yejuan xueli temakixtia. 21 Xtlajtokan para xmomanauikan; noso xmotlajtoltikan iminuan oksekimej tla kuajli ika nemoueyikatsajtsiliaj niman nenkinmauistiliaj on ídolos. ¿Akinon desde yeuejkaui okitemachistij nochi in tlinon kichiuas on rey Ciro? ¿Akinon okijtoj desde yeuejkaui ika ijkin nochiuas? On sano nejua akin ninemoTEKO onemechijlij. Xnemi okse dios yejuan melauak, yej san nejua niDios. Xnemi okse dios yejuan tetlanki niman temakixtia.
22 'Nochimej nemejuamej yejuan nenchantij nochiuiyan ipan on tlaltikpaktli, xuajlakan notech para nemechmakixtis, pampa san nejua niDios, niman xnemi okse. 23 Nejua oninotlajtolmakak sano ika notokatsin, niman on tlen onikprometeroj, ika onkaj nocumpliros: ika nochi tlakatl nixpan notlakuantelketsas, niman nochimej notlajtolmakaskej ikan notokatsin ika nechtlakamatiskej, 24 niman kijtoskej: 'ToTEKO san yejua kipiya poder niman tetlanilistli.' Nochimej on yejuan sanoyej nechtlauelitaj sanoyej nopinajtiskej. 25 Niman nopampa nejua, nochimej on israelitas tetlaniskej niman noueyiteneuaskej nopampa.”