ToTEKO san yejua Dios
44
ToTEKO kijtoua: "Aman xnechkakikan israelitas, iuejkakoneuan Jacob, notekipanojkauan yejuan onemechtlapejpenij. 2 Nejua ninemoTEKO, yejuan onemechmakak nemilistli. Nejua onikchiu para xmochiuakan ijtik nemonanaj ijkuak xe nentlakatiyaj; niman nejua nemechpaleuiya. Maka xmomojtikan israelitas, iuejkakoneuan Jacob, notekipanojkauan yejuan onemechtlapejpenij. 3 Nejua nikchiuas ma onya miyek atl ipan on xalpatlajkan. Nikchiuas ma onya ayajtoktsitsimej ipan on tlajli uaki. Nejua nikinmakas sen yenkuik nemilistli on nemouejkakoneuan, niman impan niktlalis notlatiochiualis. 4 Niman yejuamej kuajli noskaltiskej kenon xojtli yejuan kipiya miyek atl, kenon kojtin álamos yejuan onokej atempan. 5 Sekimej uelis kijtoskej: ‘Niteyaxka itech toTEKO’, niman oksekimej kijtoskej: 'Niteuejkakoneu itech Jacob'. Oksekimej, uej kijkuiloskej ipan inma: ‘Niiyaxka noTEKO’, niman notokayotiskej, Israel.”6 On toTEKO yejuan nochi ueli kichiua, yejuan iminRey on israelitas niman imintemakixtijkau, no ijkin kijtoua: “Nejua nochipa oninen niman nochipa ninemis. Nejua, san nejua niDios, xnemi okse. 7 ¿Akinon okse nemi yejuan okichiu on tlen nejua onikchiu? Ma tlajto, niman ma nechijli. ¿Akinon desde yeuejkaui okijtoj tlinon nochiuas sakin, niman kijtoua tlinon ye nochiuas? 8 ¡Maka xmomojtikan, yej xmoyolchikauakan! Nejua onemechijlij niman onemechmachistij desde yeuejkaui on tlen nochiuas, niman nemejuamej nennotestigos. Nejua, san nejua niDios akin melauak niDios. Xnemi okse dios yejuan temanauijketl. Xnikixmati okse."
On yejuan kinmauistiliaj ídolos, kichiuaj tontojyotl
9 Isaías okijtoj: "On yejuan kinchijchiuaj ídolos, sanenkaj tekitij, pampa on ídolos yejuan yejuamej kinchijchiuaj niman sanoyej kintlajsojkaitaj, nion achijtsin xitlaj ika tepaleuijkej. On yejuan kinmauistiliaj on ídolos, nemij ciegos niman semi tontos. Yejua ika, nopinajtiskej. 10 On yejuan kichijchiua sen ídolo niman kimauistilia ken sen dios, san tlanenkaua. 11 Niman nochimej on yejuan kimauistiliaj on ídolo, nopinajtiskej. On yejuan kinchijchiuaj ídolos, san tlaltikpaktlakamej. Tla nochimej yejuamej nosentlaliskej san sekan para nechixnamikiskej nejua yejuan niiminteyolkuitijkau, sanoyej nopinajtiskej niman sanoyej nomojtiskej.
12 'Ma tikitakan tlinon kichiua sen teposchijchijketl: yejua kixotlaltia sen tepostli ipan tlitl. Kemaj kitetsotsona ikan martillo niman peua kixneskayotijtiu sen ídolo. On teposchijchijketl chikauak tekiti ikan imauan, pero tla xtlakua, xok kojtik, niman tla xatli, siaui.
13 'Noso ma tikitakan tlinon kichiua sen kojxinketl: Yejua kitejtemachiua sen kojtli ika sen regla, niman kichijchiua sen tlaixkopinajli ika ilápiz. Kemaj ika sen tepostli peua kixima on kojtli, niman peua kixneskayotijtiu sen ídolo yejuan tlajtlacha ken sen tlaltikpaktlakatl. Niman ixko on ídolo kaua semi ken sen tlaltikpaktlakatl, para kemaj kitlalia ipan sen tiopan.
14 'Noso yakaj kintôka cedroskojtin, niman on kiautli kichiua ma noskaltikan. Niman ijkuak on cedroskojtin yonoskaltijkej, kinteki. Noso tlamo, kintôka on kojtin cipreses noso robles, niman kincuidaroua hasta kaman kuajli noskaltiaj ijtik on kojyoj. 15 Kemaj on kojtin kinmatsojtsontekij para ika tlatlatiaj. Niman on tlitl ika noskouaj niman ika kikxitiaj pan. Niman okseki on kojtli tlatsojtsontektli, kitekitiltiaj para ika kichijchiuaj sen ídolo yejuan ixpan notlakuantelketsaj para kimauistiliaj.
16 'Noso no, yakaj kitlatia seki on kojtli, niman ompa kikxitia nakatl para tlakua hasta kaman ixui. Niman no, ompa noskoua, niman kijtoua: '¡Sanoyej kuajli machisti in tlitl yejuan ika ninoskoua! ¡Aman ye nixotlatikaj!' 17 Niman okseki on kojtli yejuan nokaua, ika kichijchiua sen ídolo, niman ixpan notlakuantelketsa para kimauistilia, niman ijkin itech noueyikatsajtsilia: '¡Xnechmanaui, pampa tejua tinodios!'
18 'On yejuan ijkon kichiuaj sanoyej tontos, niman xkimatij tlinon kichiuaj pampa semi ixtsajtsakutokej. Xitlaj kajsikamatij pampa intlamachilis tsakutikaj. 19 Yejuamej semi nion xtlanemiliaj, nion xkipiyaj tlamachilistli niman kajsikamatilistli para uelis kijtoskej: 'Seki in kojtli ika onitlatlatij, niman ipan itlixochyo onikikxitij pan niman nakatl, niman kemaj onikuaj. Niman seki on kojtli yejuan onokau, ika onikchijchiu yejua in tetlajyeloj ídolo. Tla ijkon tej, on tlen nikmauistilijtikaj, san sen kojtlajko.' 20 On yejuan ijkon kichiuaj, ken kinkualtiskiaj tlikonextli pampa sanoyej kinkajkayajtokej, niman yejuamej kitlalijtokej iminyojlo ipan on yejuan xuelis itlaj ika kimpaleuis. Yejuamej nion xueli kinemiliaj ika on tlen kichiuaj nochi tlakajkayaualistli."
ToTEKO kinmanauiya niman kintlapojpoluiya on israelitas
21 ToTEKO okijtoj: “Nemejuamej israelitas, iuejkakoneuan Jacob, xkelnamikikan ika nemejuamej nennotekipanojkauan. Nemejuamej nennotekipanojkauan pampa nejua onemechmakak nemilistli. Nemejuamej israelitas, maka xnechelkauakan. 22 Nejua yonemechtlapojpoluilij nemotlajtlakoluan niman nochi on tlen xkuajli onenkichijkej. Yonikpopoloj nemotlajtlakoluan ken popoliui on moxtli. Xmokuepakan notech, pampa nejua yonemechmanauij.”
23 On tiotlajtojketl Isaías okijtoj: "Tejua cielo, ¡xmokuikati chikauak ikan paktli, ipampa on tlen toTEKO yokichiu! ¡Xtsajtsi ikan paktli, nochi tlaltikpaktli! ¡Nemejuamej tepemej niman on kojtin yejuan onkaj nochiuiyan kampa kojyoj, xtsajtsikan ikan paktli, pampa toTEKO yokiteititij iueyilis ijkuak okinmanauij on israelitas, iuejkakoneuan Jacob!"
24 On nemoTEKO, niman nemoTemakixtijkau yejuan okichiu para xmochiuakan ijtik nemonanaj antes nentlakatiskej, ijkin kijtoua: “Nejua ninemoTEKO, akin oniktlalij nochi tlen onkaj. Nejua, san nejua onikipatlau on cielo niman oniktlalij on tlaltikpaktli; xakaj onechpaleuij. 25 Nejua nikchiua para maka ma nocumpliro on tlen kijtouaj on yejuan tlakajkayajkej yejuan noteneuaj tiotlajtojkej, niman nikchiua para on yejuan tetlatejtemouiliaj ma tlamachilispoliuikan. Nejua nikchiua para maka nochiuas on tlen kijtouaj on tlamatkej, yej nikchiua para ma kichiuakan tontojyotl. 26 Pero on tlen notekipanojkauan kijtouaj nochiuas, uej nikchiuas para ma nocumpliro, niman nikchiuas para nochi kuajli ma kisa on tlen notemachistijkauan kijtoskej. Nejua nikijtoua ika ipan on ueyikalpan Jerusalén oksejpa nochantiuas. On uejueyikalpanmej de ne Judá oksejpa kinchijchiuaskej, niman nochi tlen okinxoxotonilijkej, oksejpa kichijchiuaskej. 27 Nejua uelis nitlanauatis ma uaki on mar, niman on ríos no ma uakikan. 28 Nejua nikijlia on rey Ciro: 'Tejua tinotlajpixkau para on notlapejpeniluan; motechkopa tejua, nikchiuas nochi tlen yonikijtoj nikchiuas.' Niman on ueyikalpan Jerusalén nikijlia: 'Tejua oksejpa mitschijchiuaskej.' Niman on ueyitiopan nikijlia: 'Oksejpa mitschijchiuaskej desde mopeuyan.' "