Yoltlalijli ipampa itemakixtilis on Dios de Israel (43.1 – 44.28)
Dios kintlajtolmaka on israelitas ika kinmakixtis
43
Pero aman, nemejuamej israelitas, iuejkakoneuan Jacob, ijkin mechijlia toTEKO yejuan omechmakak nemilistli: "Maka xmomojtikan, pampa nejua yonemechmakixtij. Nejua onemechnots ikan nemotoka, nemejuamej nennoyaxkauan. 2 Maski nenkipanoskej miyek tlajyouilistli, ken nenkipanoskiaj sen ueyi atl noso tlitl, nejua nochipa ninemis nemouan, niman xnenamimikiskej noso xnentlatlaskej. 3 Ijkon nochiuas pampa nejua ninemoTEKO niman ninemotemakixtijkau. Nejua niiDios Israel, akin niYektli. Nemejuamej nennoyaxkauan. Nejua oniktlajyouiltij on país Egipto, Etiopía niman Sabá para omechmakajkej, niman ijki, nejua oksejpa onemechnoyaxkatij. 4 Ijkon onikchiu pampa nejua sanoyej nemechpatiojkaita, nemechtlajsojkaita niman nemechtlajsojtla. Para onemechmanauij niman oksejpa onemechnoyaxkatij, onikintlajyouiltij on naciones niman miyek tlakatl.5 'Maka xmomojtikan, pampa nejua nemouan ninemi. Desde on naciones yejuan onokej kampaka ikisayan niman ikalakiyan tonaltsintli, nejua nemechajkuepas para san sekan nenmechsentlalis. 6 On naciones yejuan nokauaj kampaka norte nikinmijlis: ‘Xnechinkuepilikan nokoneuan', niman on naciones yejuan nokauaj kampaka sur nikinmijlis: ‘Xkinkauilikan ma uajuiyan. Xkinuajuikakan on nokoneuan tlakamej niman siuamej. Desde uejka kampa ontlantikaj in tlaltikpaktli, xkinuajuikakan. 7 Xkinuajuikakan nochimej on yejuan kijtoskej ika nejua niiminDios, pampa nejua onikinmakak nemilistli para ma nechueyilikan.' "
8 Dios kijtoua: "Xkinuajuikakan on notlapejpeniluan yejuan kipiyaj inmixtololojuan pero xtlachaj, niman kipiyaj iminnakasuan pero xtlakakij. 9 Xmosentlalikan nochimej kalpanmej niman nochimej naciones. ¿Akinon de nemejuamej nemoídolos yokitemachistijkaj ika ijkin nochiuas, noso yokijtojkaj ika nochiuas on tlen yonochiu? Nemejuamej ídolos, xkinuajuikakan nemotestigos niman xkijtokij, para ijkon oksekimej kimatiskej ika melauak tlinon nenkijtouaj."
10 ToTEKO ijkin kinmijlia on israelitas: “Nemejuamej nennotestigos, nennotekipanojkauan yejuan onenmechtlapejpenij para xnechixmatikan niman notech xtlalikan nemoyojlo niman xkajsikamatikan ika nejua san nejua niDios. Antes de nejua, xonen okse dios, nion xkaman okse nemis. 11 Nejua, san nejua ninemoTEKO, niman san nejua niueli nitemakixtia. 12 Nejua onemechijlij ika nemechmakixtis, niman melauak yonemechmakixtij. Xomechmakixtij sen dios yejuan xnenkixmatij, niman nemejuamej nennotestigos ika nejua ninemoDios. 13 Desde yeuejkaui niman para nochipa nejua niDios. Xakaj uelis nechkuilis tlen nomak onkaj. Xakaj uelis kixoxotonis tlen nejua nikchiua.”
Dios kintlajtolmaka on israelitas ika kipiyaskej tetlanilistli
14 ToTEKO, akin iDios Israel niman akin Yektli, yejuan nemotemanauijkau, ijkin kijtoua: “Para nemechmanauis, nikintitlanis miyekej soldados ne Babilonia para ma kinxinitij nochimej iuejueyitsakuijlouan. Niman impakilis on babilonios nokuepas tlajyouilistli ijkuak cholojteuaskej ipan inbarcos yejuan ika sanoyej noueyimatiyaj. 15 Nejua ninemoTEKO yejuan onemechmakak nemilistli nemejuamej israelitas. Nejua niDios, akin niYektli, niman ninemoRey."
16 No ijki kijtoua toTEKO: "Yeuejkaui, oniktlapoj sen ojtli ipan on mar; ijtik on ueyi Mar Rojo yejuan chikauak koxoniya oniktlalij sen ojtli. 17 Nejua onikinkixtij miyekej soldados ne Egipto ikan incaballos niman incarretas de guerra niman onikinmiktij. On soldados oamimikej ijtik on mar niman xouel onomanauijkej. Iminnnemilis otlan ken ijkuak san uajseui itliyo sen vela. 18 Aman ijkin nikinmijlia notlapejpeniluan: Makasa xkelnamikikan nion makasa xkonmojkamatstiakan on tlen yopanok. 19 Aman nikchiuas itlaj okse tlen yenkuik, niman saniman nenkitaskej. Niktlapos sen ojtli ipan on xalpatlajkan, niman nikchiuas ma onyakan ríos ipan on tlajli kampa xtlatlaki. 20 On tepeyolkej tekuanimej nechtlakaitaskej. Nechtlakaitaskej on yolkej imintoka chacales niman on uejueyimej totomej imintoka avestruces, pampa nikmeyaltis atl ipan on xalpatlajkan para nikinmatliltis. Niman no, nikchiuas ma onyakan ríos ipan on tlajli kampa xtlatlaki, para nemechatliltis nemejuamej notlapejpeniluan 21 yejuan onemechmakak nemilislti para nochiuiyan xteijlikan noueyilis.
22 'Pero nemejuamej israelitas, iuejkakoneuan Jacob, xonenmoueyikatsajtsilijkej notech, yej xok nennechnekij. 23 Xonennechmakakej nemoborregos para uentli yejuan nochi tlatla, nion xonennechtlakaitakej ikan okseki uentli. Nejua xnenmechyolajxitia para a fuerza nemechtlajtlanilia uentli, nion xafuerza nemechtlajtlanilia uentli de kopajli. 24 Xnenkouaj ajuiyalistin para nennechuentlaliliskej, nion xnenkinmiktiaj yolkej para nennechuentlaliliskej inchajka. Yej nemejuamej yonennechsiauitijkej ikan nemotlajtlakoluan. Yonennechkualanijkej ipampa nemoxompayejyeualis.
25 'Pero nejua, pampa ninemoDios, nemechtlapojpoluilis nemotlajtlakoluan, niman xok nikelnamikis tla onentlajtlakojkaj. 26 Pero tla nenkinekij itlaj nennechixkomakaskej, ma tikixtlalokan. Xtlajtokan para tikitaskej tla ueli nenmomanauiyaj. 27 On nemoachtojtajuan otlajtlakojkej, on nemotlayekankauan xipan onechitakej. 28 On nemotlapeliuikauan okijtlakojkej ika imintlajtlakoluan on noueyitiopan. Yejua ika, nemejuamej israelitas, iuejkakoneuan Jacob, onemechtekauilij para ma mechmiktikan niman nemoka ma nauiltikan.' "