Yoltlalijli ipampa iTekipanojkau on Dios de Israel (42.1 – 42.25)
On Tekipanojketl yejuan Dios okitlapejpenij
42
ToTEKO kijtoua: “Xkitakan, nikan nemi noTekipanojkau yejuan nikpaleuiya, yejuan oniktlalij ipan notekiu niman yejuan ipampa nipaki. Ipan yejua oniktlalij noEspíritu para kichiuas tlen melajki ipan nochi on naciones. 2 Yejua xtsajtsis, nion xitlaj chikauak kijtos, nion xitlaj kiteijlis ipan on kalpanojtin. 3 Xkintlajyouiltis más on yejuan tlajyouiyaj, niman xyej kinmiktis on yejuan semi ye miktokej. Yejua kichiuas para on jueces melauak ma kichiuakan tlen melajki. 4 Yejua xkaman noseuis niman nochipa noyolchikauas, hasta kaman kitlalia yolmelajkilistli nochiuiyan ipan in tlaltikpaktli. On chanejkej itempan mar, sa kichixtokej itlamachtil.”Iueyilis Dios
5 ToTEKO Dios, yejuan okitlalij niman okipatlau on cielo, niman okitlalij in tlaltikpaktli niman nochi on tlen ipan noskaltia niman tlaki; on yejuan kichiua para nijyotiaj niman nemij in tlaltikpaktlakamej, ijkin onechijlij nejua niiTekipanojkau: 6 “Nejua yejuan nimoTEKO, onimitsnots niman nimtsmayantiu, para motechopa onyas yolmelajkilistli ipan in tlaltikpaktli. Motechkopa tejua nikchiuas sen pacto iminuan notlapejpeniluan; tejua timochiuas ken tlauijli ipan on naciones. 7 Nikneki xkiminmaka intlachalis on yejuan ciegos, xkinkixti ipan cárcel on yejuan tsakutokej, niman xkintlauilui on yejuan nemij tlayouakan.
8 'Nejua nemoTEKO, niJehová. Ijki notoka. Niman xniktekauilis yakaj okse dios ma kiseli noueyilis. Nion xniktekauilis ma kintlakaitakan on ídolos, yej san nejua nechtlakaitaskej. 9 Xkitakan ika yonocumpliroj on tlinon on onikijtojka nochiuas, niman aman, oksejpa nikijtos tlinon nochiuas sakin; antes nochiuas, nemechmachistia nemejuamej.”
Kuikatl para toTEKO pampa yejua temakixtia
10 Isaías okijtoj:
"¡Xkuikatlalikan toTEKO ikan sen yenkuik kuikatl!
Desde kampa más uejka de in tlaltikpaktli,
xkuikatlalikan nemejuamej yejuan nenkistinemij ipan mar
niman nemejuamej yolkej yejuan ompa nennemij.
Xmokuikatikan nemejuamej chanejkej itempan on mar.
11 ¡Xpakikan chanejkej impan on uejueyikalpanmej de on xalpatlajkan!
¡Niman xpakikan nemejuamej yejuan nenchantij ipan on campamentos, yejuan nenkisaj itech itribu* Quedar!
¡Xmokuikatikan ikan paktli nemejuamej chanejkej ne Sela!
¡Xtsajtsikan chikauak desde inkuapan on tepemej!
12 ¡Ma kueyilikan toTEKO,
niman ma kiteijlikan nochiuiyan
para ma kuikatlalikan ipan on países
yejuan onokej itempan mar!
13 ToTEKO kisas ken sen tetlanki,
para yas ontlauijsokis ikan miyek itlauel
ken se yejuan yau ipan guerra.
Yejua tsajtsis chikauak ijkuak ye teuijsokis,
niman kintlanis on itlauelikniuan."
“Opanok miyek tiempo ijkuak xitlaj onikijtoj, nion xoninauat.
Pero aman nitsajtsis ken sen siuatl yejuan kitlakatilia ikonetsin;
niajmankatsajtsis niman ninejeltis.
15 Nejua nikinxoxotonis tepemej niman tepetsitsimej,
niman nikuatsas nochi on xojtli niman on kojtin.
On ríos nikinkuepas ken xalpatlajkan,
niman on amanaltin nikinuatsas.
16 On yejuan ciegos, nikinuikas ipan on ojtin yejuan xkixmatiyaj.
On tlayouajlotl nikuepas tlauijli inmixpan yejuamej,
niman ipan on ojtli kampa sanoyej teyoj, kuajli nitlaixmanas.
Nochi in, ika onkaj nikchiuas ken onikijtoj.
17 On yejuan kitlaliaj inyolo itech sen ídolo,
niman on yejuan kinmijliaj on ixneskayomej:
'Nemejuamej nentodioses'. Ikan miyek pinaualistli kintlalkauiskej on iminídolos."
On israelitas xkinekij kakiskej toTEKO
18 Isaías okijtoj: "¡Xnechkakikan, nemejuamej yejuan xnentlakakij! ¡Xixtlajtlapouikan para xtlachakan, nemejuamej yejuan xnentlachaj! 19 Xnemi yakaj yejuan sanoyej ciego, nion se yejuan semi xtlakaki, xken nemejuamej israelitas yejuan nenitekipanojkauan toTEKO, yejuan omechtlapejpenij niman nenitlajtojkauan. 20 Nemejuamej yonenkitakej miyek tlajtlamach, pero xnenkajsikamatij. Nemonakasuan kuajli tlakakij, pero ken xnentlakakiskiaj.
21 'Pampa toTEKO sen Dios yejuan temakixtia, okinek okiteititij ken sanoyej ueyixtikaj, niman ken sanoyej kualtsin on itlamachtiluan. 22 Pero aman, nemejuamej israelitas mechichtekij niman mechtlachtekiliaj. Nemochimej yomechtsakukej ipan cárcel niman ipan teostokaltin. Mechajsij niman xnemi akinon mechmanauis. Mechichtekij niman xnemi akinon nemopampa kitlaxtlauas para ma mechmakauan.
23 '¿Pero akinon de nemejuamej kineki kakis in tlinon nikijtoua? ¿Akinon kineki kakis on tlen nochiuas sakin? 24 ¿Akinon omechtekauilij nemejuamej israelitas, iuejkakoneuan Jacob, ma mechtlanikan niman ma mechajsikan? ¿Tlen xsano toTEKO omechtekauilij? Yejua omechtekauilij pampa onentlajtlakojkej ixpan, pampa xonenkinekkej onenyajkej ipan on ojtli yejuan omechititij, niman xonenkitlakamatkej on itlamachtiluan. 25 Yejua ika, toTEKO sanoyej okualan nemouan niman omechcastigaroj ikan sen temojtij nouijsokilistli niman ikan tlitl. Pero nion ijkon xonenkinekkej onenkitlakamatkej."