Yoltlalijli ipampa itlapaleuil on Dios de Israel (41.1 - 29)
Dios kitlakanonotsa Israel
41
ToTEKO okijtoj: "Maka xnauatikan, yej kuajli xnechkakikan nemejuamej chanejkej impan on tlaluaktin de on mar niman ipan nochi on tlaltikpaktli. Maka xnechmakajsikan, xuajlakan para titlajtlajtoskej. San sekan ma tikakikan akinon kijtoua tlen melauak.2 '¿Akinon okichiu para neka kampaka ikisayan tonaltsintli, ma ualeua on rey yejuan nochipa tetlani? ¿Akinon kichiua para ma kintlani on naciones, niman kichiua para on reyes itech ma noknelikan, para ikan iespada niman ikan iarco kinkuejkuechos niman kinchajchayauas ken polokatl? 3 ¿Akinon kipaleuiya para ma kintojtoka itlauelikniuan, niman para iyolika yau ipan on ojtli kampaka xkaman yaya? 4 ¿Akinon okichiu nochi on tlajtlamach yejuan onochiu? ¿Akinon okichiu para tlajtlamach ma uajnochijtiu desde ijkuak opeu in tlaltikpaktli? Onikchiu nejua nemoTEKO, yejuan san nejua niDios. Nejua nochipa oninen niman nochipa ninemis.
5 'On chanejkej impan on tlaluaktin de on mar, niman ipan nochi on tlaltikpaktli, sanoyej onomojtijkej ijkuak okitakej yeuajlajtikaj on rey Ciro iuan isoldados. Nochimej on tlaltikpaktlakamej okuekuetlakakej niman san sekan onosentlalijkej para nomanauiskej. ipan on tlaluaktin niman tlakamej nochiueyan 6 On tlakamej yejuan kinchijchiuaj ídolos sano yejuamej nopaleuiyaj niman noyolchikauaj. 7 On kojxinketl kiyolchikaua on yejuan kinchijchiua tlajmachyomej de oro. On tlatetsotsonketl ikan martillo, kiyolchikaua on teposchijchijketl, niman kijlia: 'Totekiu kuajli yokis.' Kemaj kitelketsaj on ídolo niman kitetsotsoniliaj clavos para maka uetsis.
Dios kimakas Israel chikaualistli
8 'Pero nemejuamej israelitas, iuejkakoneuan Jacob, notekipanojkauan yejuan nejua onikintlapejpenij, xnechkakikan. Xnechkakikan iuejkakoneuan Abraham, yejuan notlajsojkaikniu. 9 Nejua onemechkixtij desde kampa ontlantikaj in tlaltikpaktli. Onemechnots desde kampa más uejka nennemiyaj, niman onemechijlij: 'Nemejuamej nennotekipanojkauan.' Nejua, onemechtlapejpenij niman xkaman nemechkauas. 10 Maka xmomojtikan, pampa nejua nemouan ninemi. Xmoyolchikauakan, pampa nejua ninemoDios. Nejua nemechmaka chikaualistli niman nemechpaleuiya. Nejua nemechpiya ipan noyekma yejuan nochipa tetlani.
11 'Nochimej on yejuan mechtlauelitaj, sanoyej nopinajtiskej niman nokneliskej. On yejuan mechuijsokiskej, nochimej mikiskej. 12 Maski nenkintejtemoskej, xnenkinnextiskej. On yejuan mechuijsokiskej, para nemejuamej yes ken xnemiskiaj. 13 Pampa nejua nemoTEKO Dios, nemechmayantiu. Nejua nemechilia: 'Maka xmomojtikan. Nejua nemechpaleuiya.' ”
14 ToTEKO ijkin kijtoua: “Israelitas, iuejkakoneuan Jacob, maski semi nenachijtsitsimej niman semi xnenkojtikej, maka xmomojtikan, nejua nemechpaleuiya. Nejua, akin niiDios Israel niman akin niYektli, nejua ninemoTemakixtijkau. 15 Nejua nemechpaleuis para xkintlanikan nochimej nemotlauelikniuan hasta xkinkuejkuechtilikan. Nenkinkauaskej ken ijkuak se kisentlalia tlajsojli. 16 Niman kemaj nenkinajkotoktiskej para ma kinuika on ajakakiautli. Niman nemejuamej sanoyej nempakiskej notech nejua nemoTEKO, niman nemoueyiteneuaskej nopampa nejua akin niiDios Israel niman akin niYektli.
17 'Ijkuak on yejuan mayankej niman xitlaj kipiyaj, sanoyej amikiskej, hasta kamauakiskej, niman xitlaj kinextiskej, nejua niinTEKO nikinkakis iminueyikatsajtsilis niman xnikinkauas. 18 Nejua nikchiuas ma kueponi miyek atl ipan on tepemej kampa tlauajuaktok, niman nikchiuas ma meya atl ipan on ixtlauamej. No ijki, nikchiuas ma onya akomoltin ipan on xalpatlajkan, niman no, nikchiuas ma onya ayajtoktsitsimej ipan on tlajli uaki. 19 Nikchiuas para ipan on xalpatlajkan ma onya miyek kojtin, kojtin de cedros, acasias, arrayanes niman olivos. Niman nikchiuas para ipan on tlajli uaki ma onyakan kojtin de pinos, abetos niman cipreses. 20 Ijkon nikchiuas, para nochimej on tlaltikpaktlakamej ma kitakan niman ma kajsikamatikan ika nejua nemoTEKO, nejua nikchiua nochi on ikan nopoder. Nejua akin niiDios Israel, akin niYektli, nejua onikchiu para nochi on ma onya.”
Dios kijtoua ika on dioses xitlaj ueli kichiuaj
21 ToTEKO, iRey Jacob, ijkin kijtoua: “Xuajlakan ídolos, tla nenuelij xmomanauikan, xnechititikan tlinon ueli nenkichiuaj. 22 Xuajlakan, xtechijlikan tla itlaj nochiuas sakin, niman xtechijlikan tlinon youajnochijtiaj ye uejkaui, niman tikixtlaloskej. Xtechijlikan tlinon ye nochiuas, para tejuamej tikmatiskej tlinon topan nochiuas. 23 Xtechijlikan tlinon nochiuas más sakin, para tikmatiskej ika melauak nendioses. Xchiuakan san tlinon, kuajli noso xkuajli, para tejuamej sanoyej timechtlakaitaskej noso titomojtiskej. 24 ¡Pero nemejuamej sanenkaj, nion xitlaj ueli nenkichiuaj! Sanoyej nechkualaniaj on yejuan mechtlapejpeniaj para mechmauistiliaj.
25 'Nejua yoniktlapejpenij sen tlakatl yejuan ualeuas kampaka ikisayan tonaltsintli, niman peuas tlauijsokis desde kampaka norte, niman nechtlakaitas. Yejua, imimpan chojcholoua on tlamandarojkej, no ijki ken sen konchijketl kikxineloua on sokitl para kikuektlalia.
26 '¿Akinon okitemachistij achtoj ika ijki nochiuaskia para tejuamej ye tikmatstiaskiaj? ¿Akinon de nemejuamej ídolos okijtoj ika nochiuaskia on tlen yonochiu, para tikijtoskiaj ika melauak ijki onochiu? ¡Xakaj! ¡Nion semej nemejuamej ídolos xonenkijtojkej! 27 Yej san nejua desde ye uejkaui onikinmachistij on chanejkej Jerusalén on tlinon nochiuaskia. Nejua onitlatitlan para ma kimachistitij on ueyikalpan Jerusalén, ika on israelitas ye nokuepaskej ipan imimpaís. 28 Onikintejtemoj, pero nion sen ídolo xkaman okijtoj on tlen nochiuas. Niman maski itlaj nikintlajtoltia, xuelij nechnankiliaj. 29 ¡Nochimej yejuamej sanenkaj! Xitlaj uelij kichiuaj. Yejuamej san ídolos yejuan xkipiyaj nemilistli."