Yoltlalijli para Jerusalén
40
On nemoDios ijkin kijtoua: “Xkinyoltlalikan on notlapejpeniluan, xkinyoltlalikan. 2 Xkinyemankanotsakan on chanejkej Jerusalén, niman xkinmijlikan ika aman xok esclavos yeskej. Xkinmijlikan ika yonikintlapojpoluilij intlajtlakoluan, niman sanoyej yonikincastigaroj ipampa nochi intlajtlakoluan.”3 Isaías okijtoj: "Yakaj nemi ne kampa xalpatlajkan niman ijkin chikauak kijtoua: 'Xyektlalikan nemoyojlo pampa ye uajlau toTEKO; xmelauakan nemonemilis para Dios mechselis. Xchiuakan ken ijkuak nenkuejkuektlaliaj niman nenkimejmelauaj sen ojtli pampa uajlas sen tlakatl yejuan ueyixtikaj. 4 Cada ixtlauatl xpanuetsitikan, niman nochi tepetl niman tepetsintli xxotonikan para ma tlaixmani. Xmelauakan on ojtli yejuan xmelajki niman xkixmanakan on ojtli yejuan xixmanki. 5 Ijkuakon, nochi tlaltikpaktlakatl kitas kenijki toTEKO temakixtis, niman ijki, toTEKO kiteititis iueyilis. ToTEKO yejua yokijtoj.'
6 'Yakaj onikak onechijlij: 'Xtlajto chikauak'. Niman nejua oniktlajtoltij: '¿Tlinon noneki nikijtos chikauak?' Yejua on tlajtojli onechnankilij: 'Xkijto ika nochi tlaltikpaktlakatl, inemilis ken itlaj on xojtli. ¡Tonalkuetlaxiui ken itlaj tepexochitl! 7 On xojtli, uaki, niman on xochitl pilini ijkuak toTEKO kilpitsa ika on ajakatl chikauak yejuan ualeua ipan xalpatlajkan. Niman on tlaltikpaktlakamej no ijki mikij ken ijkuak pilini niman uaki on xochitl yejuan toTEKO kilpitsa. 8 On xojtli, uaki, niman on xochitl pilini, pero itlajtoltsin toDios onkaj para nochipa.' ”
9 Dios okijlij Isaías: "Xtlejko ikuatipan sen tepetl, niman xtlajto chikauak para tikinmijlis ichanekauan Jerusalén on kuajli tlajtojli. Xtlajto chikauak, maka xmomojti, niman xkinmijli on uejueyikalpanmej de Judá: '¡Nikan yeuajlau toDios! 10 ToTEKO uajlau ikan poder, niman uajlau para tlamandaros. Kinuajuika itlapejpeniluan yejuan yokinmanauito. 11 Yejua uajlau ken sen tlajpixki yejuan kincuidaroua iborregos, yejuan kiminnapaloua iborreguitos niman kinuika ipan iyelpan. Niman on iborreguitos yejuan kemach tlakatij, sanoyej kuajli kincuidaroua.' "
Yoltlalijli ipampa iueyilis on Dios de Israel
12 Isaías okijtoj: " ToTEKO san yejua ueli kitemachiua íau on mar ikan imakpal, niman ikan imajpiluan ueli kitemachiua on cielo. Yejua kimati kechkich onkaj tlalkuechtli de in tlaltikpaktli; kimati kech ika yetikej on tepemej niman on tepetsitsimej. 13 ToTEKO xakaj uelis kijlis tlinon kuajli noso tlinon xkuajli. Nion xakaj uelis kimachtis noso kitlajtolyekanas. 14 ToTEKO xkijijliskej tlinon kichiuas, nion xkijliskej kenijki kajsikamatis tla itlaj. Xakaj okititij ken melajki teyolkuitis. Xakaj okititij ken tlaixmatki yes. Xakaj okimachtij para ma tlamatki. 15 Para yejua, on naciones ken sen tlachipinijli atl, ken achijtsin tlalkuechtli ipan sen tlatemachiuajli. Nochi on países yejuan onokej ipan on tlaluaktin ipan mar, kinta ken sentejtsin xajli. 16 Nochimej on yolkej yejuan nemij ipan on tlajli Líbano, xkajxilis para kimakaskej uentin yejuan nochi tlatla, niman nochi on kojtin yejuan ompa onkaj, xkajxilis on tlatilkojtli para ika kitlatiskej on uentin. 17 Ixpan toTEKO, nochimej on naciones xitlaj kijtosnekij. Para yejua, xitlaj kijtosnekij nion achijtsin.
18 'Dios xakaj ijki ken yejua. Yejua xuelis kitaskej ipan sen ixneskayotl. 19 Yejua xijki ken sen ídolo yejuan sen tlakatl kichijchiua, nion ken sen ídolo yejuan sen tlakatl kalauilia oro niman ipan kitlalia teposcadenitas de plata para kikualtsintia. 20 Sen tlakatl yejuan mayanki, xueli koua oro noso plata para kalauilis iídolo. Yejua ika, kikui sen kojtlajko yejuan xpalani, niman kitkilia sen tlakatl yejuan kinchijchiua ídolos para ma kichijchiuili sen ídolo yejuan kuajli kisasaloua para maka uetsis.
21 '¿Tlen xnenkimatij? ¿Xkaman mechijliaj kenijki nochi opeu onkaj? ¿Xkaman nenkakij ken Dios kijtoua okichijchiu in tlaltikpaktli? ¿Tlen nion achijsin xitlaj nenkimatij? 22 Dios kipiya itrono ikuapan on cielo, niman kinualitstikaj on tlaltikpaktlakamej pipitikej ken tapachichimej. Yejua okitlalij on cielo ken itlaj tojtompilojlia; okipatlau ken itlaj kajli de tela. 23 Yejua kichiua para on uejueyixtokej tlakamej niman on tlayekankej makasa itlaj ma intekiu. 24 Yejuamej kenon plantas selikej yejuan kemach okintôkakej, yejuan kemach noneluayotijtokej. Tla Dios kichiua ma ajaka impan, nimantsin pilinij, niman on ajakakiautli kinmajkotoktia ken polokatl.
25 'On Dios yejuan Yektli techtlajtoltia: '¿Akinon nenkijtoskej no ijki ken nejua? ¿Nemi yakaj yejuan no ijki ken nejua?' "
26 Isaías okijtoj: “Xontlachakan tlakpak ipan cielo niman xkitakan: ¿Akinon okinchijchiu nochi on sitlalimej? Dios okinchijchiu sesentemej. Okintlalij kampa onokej, niman cada se okitokayotij. Ijkin okinchijchiu pampa yejua sanoyej kojtik niman kipiya ueyi poder, niman nion se sitlalin xpoliui.
27 'Israelitas, iuejkakoneuan Jacob, ¿tline ikan tlaueltlajtojli nenkijtouaj nochi tlen xkuajli nemopan nochijtikaj? ¿Tline nenkijtouaj toTEKO xok nemopan tlacha niman xok mechiknelia? 28 ¿Tlen xnenkimatij? ¿Xkaman nenkakij? ToTEKO Dios yejuan nochipa nemi, yejuan okichijchiu nochi in tlaltikpaktli, xkaman siaui. On itlamachilis xkaman tlami. 29 Yejua, kimaka chikaualistli on yejuan siaui niman yejuan xok kojtik. 30 Hasta on telpokamej kamanian siauij niman xok kojtikej; hasta on yejuan más kojtikej, siauij niman uetsij. 31 Pero on yejuan kitlaliaj inyojlo itech toTEKO, oksejpa kojtikej yeskej kenon totomej kuaktin yejuan tlakpak patlanij. Maski notlaloskej, xijyotlamiskej, niman maski uejka nejnemiskej, xsiauiskej.”