Ezequías kinselia on tlakamej de Babilonia
(2 R 20.12-19; 2 Cr 32.27-31)
39
Ipan on tonaltin, on rey de Babilonia, yejuan itoka katka Merodac-baladán, ikoneu Baladán, okimat ika Ezequías okualok niman opajtik. Yejua ika, okintitlan keskimej itlajtojkauan para okiktilijkej amatlajkuiloltin niman sen tetlayokolijli. 2 Niman Ezequías okinselij ikan paktli on tlajtojkamej, niman okintitij nochi on tlajtlamach tlen patioj yejuan kipiyaya. Okintitij plata, oro, ajuiyalistin niman aceite yejuan patioj. No okintitij kampa kinmejeuaya nochi imintepos on soldados niman nochi on tlajtlamach tlen kipiyaya ipan ikaltlayejyeualoyan. Nochi okintitij tlen onkatka ipan ipalacio niman tlen onkatka nochiuiyan kampa yejua tlamandarouaya. 3 Kemaj on tiotlajtojketl Isaías okitato on rey Ezequías, niman ijkin okitlajtoltij:—¿Kanon oualejkej on tlakamej, niman tlinon omitsijlijkej?
Ezequías okinankilij:
—Yejuamej oualejkej uejka, oualejkej ipan on país Babilonia.
4 Kemaj Isaías okitlajtoltij:
—¿Man tlinon okitakej ipan mopalacio?
Ezequías okinankilij:
—Okitakej nochi tlen ompa onkaj. Semi nochi onikintitij tlen nikpiya ipan nokaltlayejyeualoyan.
5 Kemaj Isaías okijlij Ezequías:
—Xkaki tlinon kijtoua toTEKO yejuan nochi ueli kichiua: 6 “Yejkos tonajli ijkuak nochi tlen onkaj ipan mopalacio niman nochi tlen okisentlalijkej mouejkatajuan hasta in tonajli, mechkuiliskej para kiktiskej Babilonia. Niman nikan xokuitlaj nokauas. 7 Hasta sekimej mouejkakonehuan no kinuikaskej Babilonia. Yejuamej kincaparoskej niman kitekichiuiliskej on rey ipan ipalacio.”
8 Ezequías okinemilij ika san chika yejua nemi, onyas yolseuilistli niman nochi kuajli onyas. Yejua ika ijkin okijlij Isaías:
—On tlen omitsijlij toTEKO para xnechijliki, nikita sanoyej kuajli.