Ezequías okualok pero opajtik
(2 R 20.1-11; 2 Cr 32.24-26)
38
Ipan on tonaltin, Ezequías temojtij okualok, niman on tiotlajtojketl Isaías, ikoneu Amoz, oyaj okitato, niman okijlij:—ToTEKO ijkin kijtoua: “Kuajli xtlatlajtlali ipan mochan niman ipan mofamilia, pampa tejua xok tipajtis, yej timikis.”
2 Kemaj Ezequías ononajsakatekak, okonixnamik tepantli niman ijkin onoueyikatsajtsilij itech toTEKO: 3 "NoTEKO, nimitstlajtlanilia xkelnamiki ika nejua nochipa onimitstekipanoj ikan nochi noyojlo, niman nochipa onikchiu tlen kuajli mixpan.” Ezequías sanoyej oajmankachokak.
4 Kemaj toTEKO okinauatij Isaías 5 para ijkin ma kijliti Ezequías: “ToTEKO, yejuan iDios mouejkatataj David, ijkin kijtoua: ‘Nejua yonikak moueyikatsajtsilis, niman yonikitak mochokilis. Yejua ika tej, nimitskauilis xnemi okse 15 xipan. 6 Tejua niman Jerusalén xnemechtekauilis itech on rey de Asiria. Nejua nikmanauis in ueyikalpan.’ ”
21 Kemaj Isaías okinnauatij itlakeualuan Ezequías ma kichijchiuakan sen tlanelojli de higos para okitlalilijkej on rey kampa nokokouaya, niman on rey opajtik. 22 Niman Ezequías ijkin okitlajtoltij Isaías:
—¿Tlen neskayotl nikselis para nikmatis ika uelis nias ipan iueyitiopan toTEKO?
7 Kemaj Isaías okijlij Ezequías:
— In yejua neskayotl yejuan toTEKO mitsmakas para mitsititis ika cumpliros ipromesa: 8 Ipan on escaleras yejuan Acaz okichijchiu, on tlaseuajlotl tsinkisas majtlaktli tlacholojli.
Niman melauak ijki onochiu. On tlaseuajlotl otsinkis majtlaktli tlacholojli ipan on escaleras.
Ikuikau Ezequías de tlaxtlauijli
9 Ijkuak Ezequías, on rey de Judá, opajtik de on kualolistli, okijkuiloj in kuikatl:
10 Nejua ijkin yoniknemilijka:
Noneki nias kampa nemij on mikatsitsimej,
aman ijkuak sanken nechpolouaya ninemis más xipan?
11 Niknemiliaya:
"Xokaman nikitas toTEKO ipan in tlaltikpatli,
niman xokaman nikintas on tlaltikpaktlakamej.
12 Nonemilis nechkuiliaj
ken ijkuak kixoxotoniaj ikajkal sen tlajpixki.
Nonemilis no ijki ken ijkuak yotlan kichijchiuaj on tela,
niman kemaj kitektiuij para kinemakaj niman ijki tlantiu.
Ipan tonajli niman ipan yeuajli, tinechtlajyouiltia.
13 Nochi tlayoua nitsajtsi pampa ninokokoua,
ken nechomiyopojpostekiskia sen León.
Ipan tonajli niman ipan yeuajli, tinechtlajyouiltia.
14 Nichoka kenon tototl golondrina,
niman kenon paloma.
Nixtololojuan siauij ijkuak ontlachaj ipan cielo,
niman ijkin oninoueyikatsajtsilij:
'¡NoTEKO, xnechpaleui pampa machisti nimikis.'
15 ¿Pero tlinon uelis nikijlis toTEKO
tla sano yejua onechajtitlanilij in kualolistli?
Hasta xok ueli nikochi
pampa noalma sanoyej tlajyouiya.
16 On yejuan toTEKO kincuidaroua, kipiyaskej nemilistli,
niman nejua, no nikpiyas nemilistli.
aman yej nikpiya yolseuilistli.
Tejua otinechmanauij de on temojtij tlalkontli,
pampa otinechintlapojpoluilij nochi notlajtlakoluan.
18 On mikatsitsimej,
xuelij mitsmauistiliaj;
on yejuan nemij ipan imintlalkon,
xuelij mitsueyiteneuaj;
on yejuan yokintlaltôkakej,
xok uelis kineltokaskej
ika tikchiuas nochi tlen tikijtoua.
19 San on yejuan yoltokej
uelij mitsmauistiliaj,
ijkon ken nejua nimitsmauistilia aman.
On tatajtin kintlajtlajtouiliaj inkoneuan
ika nochipa tikchiua tlen tikijtoua.
20 ToTEKO nikan nemi para nechmakixtis.
Ma tikintsotsonakan toarpas,
niman ma titokuikatikan ipan iyektiopan toTEKO
mojmostla ipan nochi tonemilis."