ToTEKO kimanauiya on ueyitlalpan Judá de on rey Senaquerib
(2 R 19.1-37; 2 Cr 32.20-23)
37
Niman ijkuak on rey Ezequías otlan kinkaki, onotlakentetsayan, niman okitlalij iajmankatlaken para okiteititij ika sanoyej najmana. Kemaj oyaj ipan iueyitiopan toTEKO. 2 Kemaj nimantsin okititlan Eliaquim, yejuan itekitlayekankau katka ipan ipalacio, niman Sebna, on itlajkuilojkau, niman on tiopixkej yejuan más uejueyitlayekankej katkaj, para ma kitatij on tiotlajtojketl Isaías, ikoneu Amoz. Nochimej yejuamej okitlalijkej inajmankatlaken. 3 Niman okijlijkej: "Ijkin kijtoua on rey Ezequías: 'In tonajli tikpiyaj ueyi ajmantli, tikseliaj castigo niman sanoyej toka uetskaj. Titomatij kenon siuatl yejuan ye kitlakatilis ikonetsin, pero xok ueli pampa xok kojtik. 4 Ma toTEKO Dios ma kaki on tlen okijtoj isoldadojtlayekankau on rey de Asiria yejuan okuajtitlan. Okuajtitlan para okuijuikaltiko on Dios yejuan melauak nemi. Dios ma kincastigaro ipampa on tlauijuikaltilistin yejuan sano toTEKO okak. Xchiua tej, sen oración impampa on israelitas yejuan sanken nemij.' "5 Ijkon tej, on itlapaleuijkauan on rey Ezequías oyajkej okitatoj on tiotlajtojketl Isaías, 6 niman Isaías ijkin okinmijlij ma kijlikan inteko: “ToTEKO ijkin kijtoua: 'Maka xmomojti de on tlen otikak onechteneuilijkej itekitkauan on rey de Asiria. 7 ¡Xkaki, nejua nikchiuas para on rey de Asiria ma kijlikan ika itlaj xkuajli nochijtikaj ipan ipaís para yejua ma nokuepa, niman ompa kimiktiskej.’ ”
8 Ijkuak on soldadojtlayekanki asirio okimat ika on rey de Asiria yokis ipan on ueyikalpan Laquis, yejua no okis Jerusalén, niman okinextito on rey de Asiria kuijsoki on ueyikalpan Libna. 9 Kemaj on rey de Asiria okimat ika on rey Tirhaca de Etiopía oyaj iuan isoldados para konuijsokiskej yejua. Yejua ika, yejua oksejpa otlatitlan itech on rey Ezequías para ijkin ma kijlitij:
10 “MoDios, yejuan itech tiktlalia moyojlo, mitsijlia ika nejua xkaman niktlanis Jerusalén, pero on san mitskajkayaua. 11 Tejua kuajli tikmatstikaj kenijki on reyes de Asiria okinxoxotonijkej nochimej on países yejuan okintlankej. ¿Man tejua uej tiknemilia timomanauis? 12 Nion on dioses xouelkej okinmanauijkej on naciones yejuan noachtojtajuan okinxoxotonijkej. Kenon naciones Gozán, Harán niman Resef. Niman no, okinmiktijkej on yejuan ualeuayaj ipan on kalpan Edén niman chantiyaj ipan on kalpan Telasar. 13 ¿Kanon nemij on reyes de on uejueyikalpanmej Hamat, de Arfad, de Sefarvaim, de Hena niman de Iva?”
14 Ezequías okiselij on amatlajkuilojli yejuan okiktilijkej, niman okinomachtij. Kemaj oyaj ipan iueyitiopan toTEKO, niman ompa ixpan toTEKO okipatlau on amatlajkuilojli, 15 niman ijkin okichiu oración: 16 “NoTEKO, Dios de Israel, akin nochi ueli tikchiua, niman akin tikpiya motrono ipan on querubines: tejua, san tejua tiDios ipan nochimej on naciones de in taltikpaktli. Tejua otikchijchiu on cielo niman in tlaltikpaktli. 17 Xkaki noTEKO tlinon mitsijliaj on asirios , xuajtlacha niman xkinta. Xkaki nochi tlinon omitsijlij on rey Senaquerib para omitsuijuikaltij tejua, akin tiDios yejuan melauak tinemi. 18 On melauak, noTEKO, ika on reyes de Asiria okinxoxotonijkej on naciones iuan iminuejueyitlalpanuan, 19 niman okintlatilijkej imindioses, pampa on xmelauak dioses katkaj, yej katkaj san ixneskayomej de kojtli niman de tetl, yejuan on tlakamej okinmachijchijkej. Yejua ika tej, ouel okintlatijkej. 20 Aman tej, toTEKO niman toDios, xtechmanaui de on rey Senaquerib, para nochimej on naciones de in tlaltikpaktli ma kimatikan ika tejua toTEKO, san tejua tiDios.”
21 Kemaj Isaías otlanauatij ijkin ma kijlitij on rey Ezequías: “Ijkin kijtoua toTEKO, Dios de Israel: ‘Nejua yonikak moueyikatsajtsilis. Yonikak tlinon otinechijlij itechkopa Senaquerib, on rey de Asiria.’ ” 22 In yejua okijtoj toTEKO ijkuak okiteneu de on rey de Asiria:
“On ueyikalpan Sión, ken sen ichpochtli yejuan san mitsuejuetskilia tejua rey Senaquerib. Jerusalén hasta nokuauiuixoua para moka uetska ijkuak mitsita tontlaksa. 23 ¿Akinon tlamach otikteneuilij niman otikuijuikaltij? ¿Akinon tlamach otikijlij niman otikititij ika sanoyej timoueyimati? ¡On sano nejua, yejuan niDios de Israel yejuan niYektli! 24 Intechkopa motlapaleuijkauan tlamach xkuajli otinechteneuilij. Otikijtoj: ‘Ikan miyek nocarretas de nouijsokilistli, oniaj inkuatipan on tepemej, niman onajsik kampa más tlakpak ipan on tepetl Líbano. Kemaj onikintsontek on cedroskojtin yejuan más ueuejkapanmej, niman on okomej yejuan más kualtsitsimej. Onajsik kampa más tlakpak de on tepemej, kampa sanoyej kualtsin kojtitlan. 25 Ipan oksekimej países onikinchijchiu atlaltekontin, niman onatlik. Ijkuak onipanok ipan on tlajli Egipto, onikinuats nochimej on ríos para nosoldados ouel opanokej ompa.’
26 'Pero xtikmati, tejua Senaquerib, ika nejua akin niDios, nejua onimitspaleuij para nochi on otikchiu. Desde yeuejkaui yonikijtojka ika nikchiuas on tlen aman yonikchiu motechkopa. Yejua ika tej, tejua ueli tikinxoxotonia on uejueyikalpanmej yejuan yeualtsakutokej ikan tepanchinantli niman tikinkaua teolocholtin. 27 On chanejkej impan on naciones xuelij nomanauiyaj, sanoyej nomojtiaj niman noyolpopolouaj. Yejuamej no kenon tepexojtli, kenon xoxojki sakatl niman kenon xojtli yejuan kisa tlapani ipan kajli, yejuan pilini ika on ajakatl yejuan ualeua kampaka ikisayan tonaltsintli.
28 'Nejua nikmati kanon tikistinemi; niman nikmati nochi tlinon tikchiua. Nikmati ika sanoyej tikualani nouan. 29 Niman pampa sanoyej tinechtlauelita niman timoueyimati, nimitstlalilis sen tepospipilojli ipan moyak niman sen teposkamatepitskuajli ipan mokamak, niman nikchiuas para oksejpa xuiya kampaka otiualeu.”
30 Kemaj Isaías ijkin okijlij Ezequías: “In yejua yes sen neskayotl de on tlen nochiuas: In xipan niman on ika ome xipan, nenkikuaskej trigo yejuan san yejua kisas ipan nemotlal, pero ipan on ika yeyi xipan, nentôkaskej niman nemkipixkaskej trigo, nenkitôkaskej uvas niman nenkikuaskej ijkuak yotlak. 31 On chanejkej Judá yejuan xmikiskej, oksejpa miyekiyaskej. Yeskej kenon kojtin yejuan oksejpa nonejneluayotiaj niman kuajli tlakij, 32 pampa ne Jerusalén, nokauaskej yejuan xmikiskej. Ipan on tepetl Sión, nemiskej yejuan nomanauiskej. ToTEKO, yejuan nochi ueli kichiua, yejua kichiuas nochi in, pampa sanoyej mechtlajsojtla.
33 'ToTEKO ijkin kijtoua de on rey de Asiria: ‘Nikan Jerusalén, on isoldados Senaquerib, xkalakiskej, nion sen flecha xika kimotlaskej. Xkintekitiltiskej iminescudos, nion sen escalera xkichijchiuaskej iyeualkan in ueyikalpan. 34 Senaquerib, oksejpa yas kampaka oualeu. Ipan in ueyikalpan xkalakis. ¡Nejua nemoTEKO ijki nikijtoua! 35 Nejua nicuidaros in ueyikalpan niman nikmanauis, ijkon ken onikprometerouilij notekipanojkau David niman ipampa notlakaitalis.’ ”
36 Ipan on tlayoua on ángel yejuan toTEKO okuajtitlan, oyaj ipan imincampamento on asirios, niman okinmiktij 185 mil soldados. Uajmostla ijkuak otlanes, on campamento tentikatka ikan mikatsitsimej. 37 Kemaj Senaquerib, on rey de Asiria, onokuep ipan ipaís, niman ochantik ipan on ueyikalpan Nínive. 38 Pero se tonajli, ijkuak kimauistilijtikatka on dios Nisroc ipan itiopan, on ikoneuan yejuan intoka katkaj Adramelec niman Sarezer, oyajkej ompa niman okimiktijkej. Kemaj ocholojtejkej, niman oyajkej ipan on región itoka Ararat. Sakin, kej ikoneu otlamandaroj ken rey, yejuan itoka katka Esar-hadón.