On rey Senaquerib okalak ipan on ueyitlalpan Judá
(2 R 18.13-37; 2 Cr 32.1-19)
36
Ijkuak on rey Ezequías kuikaya majtlaktli uan naui xipan ika tlamandarouaya ne Judá, Senaquerib, on rey de Asiria, oyaj ne Judá para okinuijsokito nochimej on uejueyikalpanmej de Judá yejuan yeualtsakutikatkaj ikan tepanchinantli, niman okintlan. 2 On rey asirio nemiya ipan on ueyikalpan Laquis, niman desde ompa okontitlan sen soldadojtlayekanki ne Jerusalén, iminuan miyekej isoldados, para okitatoj on rey Ezequías. Niman onoteltitoj nisiu iapanko on amanalchijchijtli yejuan onkaj tlakpakopa, ipan on ojtli yejuan yau kampa itoka “Tlapakaloyan ikan Tlakentin”. 3 Ompa, okinnamikito Eliaquim, ikoneu Hilcías, yejuan tekitlayekanki katka ipan ipalacio on rey Ezequías; niman iuan yaya Sebna, yejuan tlajkuilojketl katka. No, ompa yaya Joa, ikoneu Asaf, yejuan iamamoxtlajkuilojkau katka on rey Ezequías.4 Niman on soldadojtlayekanki asirio, ijkin okinmijlij:
"Xkijlikan on rey Ezequías ika ijkin kijtoua on ueyixtikaj rey de Asiria: '¿Tline tiknemilia tinechtlanis? 5 Para tinechtlanis, xsan titlajtlajtos, yej noneki tikimpiyas miyekej soldados yejuan sanoyej kimatij ken tlauijsokij para tetlanij. ¿Akinon itech timoyolchikaua ika tikneki tinechixnamikis? 6 Yonikmat ika tiktlalia moyojlo itech itlapaleuil Egipto. Pero Egipto ken sen akatl yejuan tlapanki. Tla yakaj ipan nokitskis, ipan ima tlalakis. Ijkin mopan nochiuas pampa tiktlalia moyojlo itech irey Egipto.'
7 ' Niman tla tinechijlis: 'Tejuamej tiktlaliaj toyojlo itech toTEKO Dios', tla ijkon, ¿tline otikinxoxotonij tejua Ezequías on kampa kimauistiliayaj Dios, niman otikinxoxotonij on tlaixpantin, niman otikinnauatij on chanejkej Judá niman on chanejkej Jerusalén para ma kimauistilikan on Dios san ipan se tlaixpan?"
8 Kemaj on soldadojtlayekanki, oksejpa ijkin okijtoj: "Xchiua sen pacto iuan noteko, on rey de Asiria, niman nejua nimitsmakas ome mil caballos, tla no tikpiyas ichkich tlakamej yejuan caballojyetinemiskej. 9 Maski tla tiknemilia mitspaleuis Egipto ikan caballos niman carretas de nouijsokilistli, xuelis tikixnamikis nion sen soldadojtlayekanki asirio yejuan semi xueyixtikaj. 10 Xkita, nejua oniuajlaj onikuijsokiko in país niman onikxoxotoniko, pampa nemoTEKO onechajtitlan."
11 Kemaj Eliaquim, Sebna niman Joa, ijkin okinankilijkej on soldadojtlayekanki asirio:
—Xtechchiuili sen favor, xtechnotsa ikan tlajtojli arameo. Tejuamej kuajli tikakij on tlajtojli, pero maka xtechnotsa ika on tlajtojli hebreo, pampa on tlakamej yejuan nemij ipan on ueyitepanchinantli uajtlakaktokej.
12 Pero on soldadojtlayekanki asirio ijkin okinmijlij:
—On tlen onechnauatij on rey de Asiria ma nemechijliki, xsan para nemejuamej iuan nemorey Ezequías, yej no, para on tlakamej yejuan nemij ipan on ueyitepanchinantli, pampa sanken yejuamej niman nemejuamej, nenkikuaskej nemoxixalis niman nenkoniskej nemotlapias, pampa sanoyej nenmayanaskej niman nenamikiskej.
13 Kemaj on soldadojtlayekanki onotelkets kampa tlakpak, niman chikauak okinmijlij on yejuan nemiyaj ipan on ueyitepanchinantli ikan tlajtojli hebreo:
"Xkakikan, on ueyixtikaj rey de Asiria mechijlia: 14 'Maka ma mechkajkayaua on rey Ezequías. Yejua xuelis mechmanauis.' 15 Tla Ezequías kichiua para xtlalikan nemoyojlo itech nemoTEKO, niman mechijlia: 'Melauak toTEKO techmanauis; yejua xkitekauilis para in ueyikalpan ma uetsi imak on rey de Asiria', 16 maka xneltokilikan. On rey de Asiria, kijtoua kineki noyoltlalis nemouan, niman kineki itech xmotemakakan, niman ijkon, cada se uelis kikuas tlen tlakis ipan iuvajtlatôk niman ipan on ihiguerajkojyoj, niman konis on atl yejuan kixtis ipan iatlaltekon. 17 Kemaj, mechuikas ipan sen país yejuan no ijki ken nemopaís. On país kimpiyas tlatoktin de trigo niman uvasyoj, para nenkichijchiuaskej pan niman vino. 18 Tla on rey Ezequías mechijlia mechmanauis nemoTEKO, maka xneltokilikan, pampa nion semej on dioses de oksekimej naciones, xouelkej okimanauijkej imimpaís imak on rey de Asiria. 19 ¿Kanon nemij on dioses de on uejueyikalpanmej Hamat niman Arfad? Niman ¿kanon nemij on dioses de on ueyikalpan Sefarvain? ¿Ouelkej on dioses okimanauijkej Samaria de ipoder on rey de Asiria? 20 ¿Katlejua de nochimej on dioses de on países ouel okimanauij ipaís imak on rey de Asiria? ¿Tline nenkinemiliaj nemoTEKO uelis kimanauis Jerusalén?' "
21 Pero yejuamej xonauatkej niman xitlaj ika okinankilijkej, pampa on rey Ezequías okiminnauatij maka kinankiliskej. 22 Kemaj Eliaquim, yejuan tekitlayekanki katka ipan ipalacio on rey Ezequías, niman Sebna, yejuan tlajkuilojketl katka, niman Joa, yejuan iamamoxtlajkuilojkau katka on rey Ezequías, sanoyej onajmankej. Yejua ika, onotlakentetsayankej. Kemaj oyajkej okitatoj on rey Ezequías para okitlajtlajtouilitoj on tlen okinmijlij on soldadojtlayekanki asirio.