ToTEKO kintiochiua on israelitas (35.1–39.8)
On israelitas oksepa nokuepaskej Jerusalén
35
Isaías no okijtoj: "Ipan on tonajli, on xalpatlajkan niman on tlaluatsalkan, sanoyej pakanesiskej pampa xochiyouaskej. 2 Xochiyouaskej ken ijkuak poni on liriojxochitl; hasta nesiskej ken nokuikatiaj ikan yolpakilistli. Dios kichiuas para ma kualnesikan kenon kojyoj Líbano; ma xoxouikan kenon tepetl Carmelo, niman kualtsin ma tlatlakitikan kenon ixtlauatl Sarón. Ijkuakon nochimej kitaskej ikualtsinueyilis toTEKO Dios.3 'Ma noyolchikauakan on yejuan najmanaj; ma nokojtilikan on yejuan siautokej. 4 Xkimijlikan on yejuan nomojtiaj: '¡Xmoyolchikauakan, maka xmomojtikan! ¡Nikan nemi nemoDios yejuan mechmakixtis, niman on nemotlauelikniuan kincastigaros ken kinmelaua!'
5 ' Ijkuakon, on yejuan ciegos tlachaskej, niman on tsatsamej tlakakiskej. 6 On uilatsitsimej tsikuiniskej kenon masamej, niman on nontsitsimej pakilistsajtsiskej. Ipan on xalpatlajkan niman ipan on tlaluatsalkan, kueponis sanoyej miyek atl. 7 On xalpatlajkan nochiuas sen amanalko, on tlaluatsalkan kipiyas miyek ameyaltin. Kampa aman chantij on yolkej chacales noskaltis miyek akatl niman asakatl.
8 ' Niman ompa ipan on xalpatlajkan onyas sen ueyi niman melajki ojtli yejuan kitokayotiskej 'Yekojtli'. On yejuan xyolchipajkej xueliskej yaskej ipan on ojtli; on yejuan xtlamatkej xuelis panoskej ipan on ojtli. 9 Ompa ipan on ojtli xnemiskej leones; xnonisiuiskej on yolkej tekuanimej. Ipan on ojtli san nejnemiskej on israelitas yejuan okinmakajkej kampa esclavos katkaj. 10 On yejuan toTEKO kinmanauis, kalakiskej Jerusalén nokuikatijtiaskej, niman nochipa nemiskej ikan paktli. Ompa nochipa kipiyaskej ueyipaktli, niman on ajmantli niman nochi on tlen tekokoj, nochi popoliuis."