On tlen sanoyej xkuajli impan nochiuas on naciones
34
Isaías okijtoj: "¡Nemejuamej chanejkej ipan on naciones niman ipan on kalpanmej, xmonisiuikan niman kuajli xnechkakikan tlinon nemechijlis! ¡Nochi in tlaltikpaktli iuan nochi on tlen ipan onkaj niman ipan tlaki, ma nechkakikan tlinon nikijtos! 2 ToTEKO sanoyej kualantikaj iminuan on naciones niman iminuan nochimej insoldados, yejua ika yokintlajtouilij ika kintlaxoxotonilis niman kinmiktis. 3 Impan on tepemej notlalos miyek yestli, niman nochimej on mikatsitsimej kinxinijteuaskej ipan tlajli niman ompa moloniaskej. 4 On tonaltsintli, on metstli niman on sitlalimej xok onyaskej; on cielo mimiliuis ken itlaj petlatl, niman nochimej on sitlalimej xiniskej ken ijkuak xojyoxini on uvajxojtli noso on higuerajkojtli."On tlen sanoyej xkuajli ipan nochiuas Edom
5 ToTEKO okijtoj: "Ika tlen melauak, noespada yotlan itekiu ne iluikak niman ye listo para uajuetsis impan on chanejkej Edom, impan on tlakamej yejuan yonikintlajtouilij mikiskej. 6 Kemaj Isaías okijtoj: "Iespada toTEKO sanoyej yejyesyouas, niman chauis ken ijkuak kinuentlaliaj on borreguitos niman on chivos. ToTEKO tlauentlalis ne ipan on ueyikalpan Bosra; miyekej kinmiktis ne ipan on ueyitlalpan Edom. 7 Hasta on tlakamej yejuan sanoyej kojtikej ken uakaxtin mikiskej, niman on telpokamej no mikiskej iminuan on soldados. On tlajli sanoyej patsiuis ikan yestli niman sanoyej chauis. 8 Melauak tej, yejkos on tonajli ijkuak toTEKO tetlakuepiltis; ajsis on xipan ijkuak kincastigaros on yejuan xkuajli tlen okichiuilijkej on ueyikalpan Jerusalén.
9 ' On iayajtoktsitsiuan Edom nokuepas chapopojtli, itlalkuechyo nokuepas azufre, niman nochi on tlajli nokuepas chapopojtli yejuan kauantias. 10 On tlitl xkaman seuis; nochi tonajli niman nochi yeuajli tlikuitias, niman nochipa popokatias. On tlajli kitlalkauiskej para nochipa; xokaman yakaj panos ompaka. 11 Ompa san nochantiskej on tetekolomej, niman kichijchiuaskej intepajsol on kakalomej niman on pajpaktekolomej. ToTEKO kichiuas para on país ma nokaua iselti, niman makasa yakaj ompa ma nemi. 12 Xokaman kimpiyaskej iminreyes; xok nemiskej on yejuan tlayekanaskej. 13 Ipan impalacios niman ipan on kaltin kampa chantij on soldados yejuan tlacuidarouaj, noskaltis tsitsikastli niman okseki uitstli. Ompa nochantiskej on yolkej tekuanimej intoka chacales niman on uejueyimej totomej avestruces. 14 On tepemistonmej iminuan on yolkej chacales ompa san sekan nemiskej, niman on tepechivos sano yejuamej nonotsaskej. No, ompa chantiskej on yolkej yeualnenkej, niman ompa kinextiskej kampa noseuiskej. 15 On tekolotl ompa kichijchiuas itepajsol, tlatlajkalis, tlatlapanaltis niman kincuidaros ikoneuan. Niman no ompa miyekej nosentlaliskej tsojpilomej; cada okichtototl ompa nemis iuan isiuau.
16 'Xmomachtikan iamamox toTEKO niman xkitakan ken kijtoua: Xkitakan ika xitlaj poliuis nion se de on yolkej nion totomej; xitlaj okichyolki niman xitlaj okichtototl kipolos isiuau. Ijki nochiuas pampa toTEKO ijki yotlatlajtlalij. Yejua ikan iespíritu kinsentlalis nochimej in yolkej ipan on tlajli Edom. 17 Nochi yolki yokititij kanon nokauas. Ikan itlanauatil yokimakak tlajli kampa chantis, niman ompa nochipa nemiskej. Para nochipa ompa nokauaskej."