On tlen sanoyej xkuajli ipan nochiuas Asiria
33
Isaías ijkin okimachistij on país Asiria: "¡Sanoyej titlajyouis tejua Asiria, país yejuan titlaxoxotonijketl, pampa tejua no mitsxoxotoniskej; tejua akin titepannokuepaketl no mopan nokuepaskej. Ijkuak tlamis titlaxoxotonis, no mitsxoxotoniskej; ijkuak tlamis tepan yotimokuepas, no mopan nokuepaskej."2 Isaías no ijkin okijtoj: "Tejua toTEKO Dios, xtechikneli pampa motech titlamachaj. Tejua xtechyolchikaua cada kualkan, tejua xtechmakixti ijkuak sanoyej titlajyouiyaj. 3 On totlauelikniuan ontlatlaksaj ijkuak kakij on motlajtol ikan sen chikauak tlakomonalistli; on naciones nochajchayauaj ijkuak tejua tikintitia moueyipoder. 4 Nochi iminriquezas on totlauelikniuan tikinkuiliskej; tiaskej intech ken ijkuak miyekej chapolimej yauij ipan sen ueyi tlatôktli niman kikuaj nochi on tlakijlotl.
5 '¡Sanoyej tiueyixtikaj toTEKO! Tejua yejuan tichanti ne iluikak, tikchiua para ne Jerusalén ma onya yolmelajkilistli niman yolchipaualistli. 6 No ijki, nochipa tikincuidaroua on ompa chanejkej para inyolika ma nemikan. On tlamatkilistli niman on tlaixmatkilistli yejuan tiktemaka, ken itlaj on tesoro yejuan temakixtia. On tetlakamatilistli motech tejua toTEKO, techmakas in tesoro.
7 'Xkakikan israelitas ken ajmankatsajtsij ipan on kalpanojtin on uejueyixtokej tlajtojkamej yejuan otlajtlanitoj yolseuilistli intech on nemotlauelikniuan, niman xokinselijkej. 8 Ipan on uejueyi ojtin xok yakaj nojuitia; xok nemij akinnomej nojuitiskej. On tlajtolmakalistin kimpopolouaj; xok yakaj kitlakaitaj. 9 On tlajli xok ueli tlatlakitia. Ne Líbano youajuakkej on kojtin niman xok tlaxoxouixtok. Ipan on iixtlauayo Sarón sanoyej tlauajuaktok. No ijki, ipan on tepetl Basán niman ipan on tepetl Carmelo yotlatetsotsoliu."
10 Niman toTEKO ijkin kinmijlia on naciones: "Aman ninoteititis; aman nikteititis noueyilis niman nochi tlen ueli nikchiua. 11 Nochi on tlen nenkinemiliaj nenkichiuaskej niman nochi on tlen nenkichiuaj, xitlaj kijtojtikaj; nochi on, ken itlaj tlajsojli yeskia yejuan nejua nikijyopitsas para nochi ma tlatla. 12 Nemochanejkauan tlatlaskej kenon temej ijkuak kintlatiaj para kixtiaj tenextli; ken itlaj uitstli yejuan yokitsojtsontekej, kakauakaskej ipan tlitl. 13 Nemejuamej yejuan nennemij uejka, xkakikan tlinon yonikchiu, niman yejuan nennemij nisiu, xkitakan tlinon ueli nikchiua ikan nopoder.
14 'On tlajtlakolejkej yejuan nemij ne Jerusalén sanoyej mojkakuekuetlakaj, niman on xkuajkualtin tlakamej sanoyej yonomojtikej niman kijtouaj: '¿Akinon de tejuamej uelis nemis ipan on tlitl yejuan tetlatia, niman ipan on tlimilinajli yejuan xkaman seuis?' "
15 Isaías okijtoj: "On yejuan kichiua nochi tlen kuajli niman kijtoua tlen melauak, yejuan xtepal ricojtia ika on tlen xkuajli techiuilia niman xkiselia ichtakatlaxtlauijli, yejuan xteuan nokalaktia para temiktis niman xkuelita kitas on tlen xkuajli kichiuaj oksekimej, 16 yejua nemis iyolika. Nomanauis ipan sen ueyi techinantli yejuan sanoyej kojtik. Nochipa kipiyas tlen kikuas, niman xkaman kipolos atl."
On ueyilistli yejuan kipiyas Jerusalén
17 Isaías ijkin okinmijlij on israelitas: "Nemejuamej nenkitaskej sen Rey ikan sanoyej kualtsin iueyilis, niman nenkitaskej sen país yejuan sanoyej uejka ajsi itlamiyan. 18 Ijkuak nenkelnamikiskej ika nennemiyaj ikan nemojtijli, nenkijtoskej: '¿Manin kanon nemi on tlacobrarojketl katka yejuan kipouaya on riquezas yejuan kitekuiliaya ipan on nouijsokilistin niman techchiualtiaya ma tiktlaxtlauakan on impuestos? ¿Manin kanon nemi on tlastlakojketl katka yejuan kimpouaya on totorresuan?' 19 Nemejuamej xok nenchantiskej intsajlan on yejuan noueyimatij, yejuan tlajtouaj ikan on tlajtojli yejuan xnenkajsikamatij. 20 Xontlachakan ipan on tepetl Sión kampa titlaluichiuaj; xontlachakan ne Jerusalén, on ueyikalpan yejuan sanoyej kuajli onkaj niman xitlaj kipajsoloua. Yejua yes ken sen campamento kampa kuajli okintelketskej on kaltsitsimej de tela, kampa xuelis kojkopiniskej on estacas niman xuelis kojkotoniskej on mekamej yejuan impan sasalijtokej on kajkaltin de tela. 21 Ompa toTEKO techititis iueyipoder. Yejua nemis ken sen patlauak río yejuan techmanauis, kampa on totlauelikniuan xuelis apanoskej para techuijsokiskej. 22-23 On mekamej xok ueli kisasalouaj ipan on ueyakkojtli yejuan kitelketsaj itlajkotian cada barco kampa kinsasalouaj on telas intoka velas. Yejua ika, on barcos xok ueli kinyekanaj ikan on ajakatl niman xueli apanouaj ipan on patlauak río para techuijsokiskej. Tikinkuiliskej nochi inriquezas on totlauelikniuan. Hasta on ciegos niman uilatsitsimej no kiseliskej tlen kintocaroua. ToTEKO yejua tojuez, yejua techmandaroua, niman yejua techmakixtis. 24 Ijkuakon, xok yakaj kijtos: 'Nikualo', niman toTEKO kintlapojpoluilis imintlajtlakoluan on chanejkej ne Jerusalén."